Read ngakarimojong Isa. 16 Bible Online

Isa. 16 - ngakarimojong bible

Isa. 16

¹Kiyakiyasi ŋikaalei ŋulumesekin alo Sela, neni ke ekepukan ka akwap, kitoryoto lorot ŋolo ka aloŋisat, yaasi lomukura ŋolo a ŋituŋa a Sion.

²Etubonorosi ŋituŋa a Moab alodoketa a aŋolol Arinon, etubonorosi ikes esibito ŋikyeny eporete car, etubonorosi ikes esibito ŋicwi ŋulu ealar alokai.

³Elimonokinete ŋituŋa a Moab ŋituŋa a Yudaya ebe, “Kitatamae isua, tolimokinae ŋuna emaikina kitiyae, kimukoroe isua lopite ŋolo ikimukorya akiryonut kidiŋ apaaran, kiwuae isua ŋulu ikirae ŋirikon, nyikilukis isua ŋulu ikirae ŋikadokinok anakwap kosi.

⁴Kimyekinae isua ŋirikuno anakwap a Moab kiboikinetei kaapei ka iyes, kiboikinetei ikirae ŋikadounok aneni a ekamunyaran.” Ani etwani ekesicanan, edaun ŋinyas ka edaun ekesicanan anakwap,

⁵eruwor nai ipei a ŋiletok a Daudi erwosit, ipukae iŋes ŋituŋa ka amina a ŋina nyiryaŋiryaŋa, eruwor iŋes erwosit ŋolo ipukat anakiyookino ekepukan ŋolo iwarit akiyookino ŋolo iburiburi atipei akitiya ŋuna iyookino.

⁶Temasi ŋituŋa a Yudaya neni a ŋituŋa a Moab, “Aponi isua kiirarae epite ŋolo iturotor ŋituŋa a Moab, isupasi ikes nooi, iturosi ka eŋoito, nai erae akituro kec koŋin.”

⁷Aŋun, kimyekisi ŋituŋa a Moab kiwololoto, kimyekisi ŋituŋa daadaŋ kiwololoto aŋuna a Moab. Kigworo, kigworo ikiilorito ŋakiro aŋuna ka akimuj a ŋina ajokan a ŋina imujete iyes alo Kir-Areses.

⁸Arinyiyosi ŋimanikorin ŋulu a Esibon, arinyiyosi ŋimanikorin ŋulu a ŋikito a epiini ŋulu a Sibima daŋ, epudaasi ŋikepukak a ŋakwapin a ŋikito a epiini ŋulu ajokak nooi, ŋulu sek aponi yaarae epiini kec tari Yaser ka lotuŋa daadaŋ ŋulu aya naloŋisat; aponi yaarae epiini ŋol tari lotuŋa ŋulu aya nanam ŋina Areŋan.

⁹Aŋun, egworo ayoŋ lopite ŋolo igworotor ŋituŋa a Yaser egworo ayoŋ aŋuna a ŋikito a epiini a Sibima. Okoe Esibon ka Eleale egworo ayoŋ abuki ŋakiyo aŋuna kus, anerae adaun ecelet ŋolo sek eyai elemio ŋaraito ka ŋikinyom.

¹⁰Alemar alakara ka alelyanu aneni a ŋimanikorin a ŋulu araak, ido adaun ituŋanan eriŋa eeo alomanikorin a ŋikito a epiini mam ituŋanan eriŋa ecela a nen, mam ituŋanan eriŋa ecui epiini anacuet, anerae alema ayoŋ ŋulu sek ecelasi a nen.

¹¹Aŋun, idoŋae etau kaŋ iyaloloŋi aŋuna a Moab ka iyaloloŋi akiyar kaŋ aŋuna a Kir-Eres.

¹²Ani ecunakinosi ŋituŋa a Moab akilip nakibois kec ŋina aoyan, ituupasi akilip a nen koŋin; ani elosete ikes akilip nakiriket kec, emam ibore eryamunete.

¹³Erae ŋun ŋakiro ŋuna abu Ekapolon kirwor koloŋ sek aŋuna a ŋituŋa a Moab.

¹⁴Nai tokona irworo Ekapolon ebala; “Alotooma ŋikaru ŋiuni, ŋikaru ŋulu eriyan ka ŋulu aminae akipaŋga ituŋanan akitiya etic, ejamuwaryo apolou a Moab tari kelalak nooi ŋituŋa keŋ, eruwor ŋidikudyo bon ŋulupalag idoŋete Moab.”