Read ngakarimojong Isa. 17 Bible Online

Isa. 17 - ngakarimojong bible

Isa. 17

¹Ŋakiro ŋuna adwarit Ekapolon aŋuna a Damasko ikes nu, “Kiirasi, ejoŋoe Damasko araakau etaun, ido eruwor iŋes ŋatukon a ŋamoru ka ŋamatapali ŋuna adukitere.

²Eesikinete ŋituŋa ŋitaunio keŋ ŋikaru ka ŋikaru; eruwor ŋitaunio ŋul neni eya ŋisipanin a ŋamesekin, eruwor nen neni euryaniata ikes ka emam ituŋanan esurusurui ikes.

³Elemaryo aduketait ŋinajiet alo Epuraim ka elemaryo apukan alo Damasko, ido ikwaanikinosi apolou ŋina a ŋipiya ka Aram ka ŋina a Ŋisirael.

⁴Akoloŋit ŋina itiyakinotor ŋun, elemaryo apolou aneni a ŋituŋa a Yakob ka edaun ebari kec toruworos ŋikulyak.

⁵Ikwaanikin apaki ŋin ka apaki ŋina elemyata ŋikalemak ŋikinyom ŋulu ewuasi inieunuyete ŋakyes a ŋikinyom, ikwaanikin apaki ŋin ka ŋina elemarere ŋikinyom anakadipaalat a ŋina a Rapaim,

⁶kori ikwaanikin ka apaki ŋina etwaere ŋaraito alokitoe ka Olipa kidoŋo ŋadikudyo bon lokitoe, kidoŋo ŋaarei kori ŋauni bon naten ŋuna alokidiama ekitoe, kori kidoŋ ŋaomwon, kori ŋakan naten ŋuna igoonoto.” Ayoŋ Ekapolon adau alimun ŋun!

⁷Akoloŋit ŋin, ikinyomete ŋituŋa ekasuban kec ka Akuj apei ŋina asegan ŋina a Isirael.

⁸Nyikinyomete nabo ŋamuroeta kec ka ŋiticisyo ŋulu a ŋakan kec, ido nyiŋolikinete ikes ŋitorubei ŋulu apotu ikes kitiyaut, nyiŋolikinete ŋipirin ŋulu a ŋitalyo, kori ŋamuroeta ŋuna ecunyere ekinyate.

⁹Akoloŋit ŋin, ikwaanikinosi ŋitaunio kec ŋulu edukitoe ŋaduketa ŋunajiet ka ŋireŋoroto ŋulu a Ŋiipi ka Ŋiamori, ŋireŋoroto ŋulu apotu ikes kimyekis apaki ŋina aemyata ikes aneni a Ŋisirael, ido eyakaun ekasile Damasko.

¹⁰Itiyakin ŋun, anerae ikimuryak iyes Akuj ŋina ikilakuni iyes ka nyitamunito iyes Akuj ŋina erae ataaba ŋina ka aiuno, aŋun, tari kitaete iyes ŋinyomen ŋulu ajokak, todupete ŋaten a ŋikito a ŋulu eyaununitae aiwace,

¹¹tari kituruput iyes ŋinyomen ŋul akoloŋit ŋina idupakiniata ka toturout ataparacu ŋinapei edupakinere, kire eruwor akilem akoŋinait akoloŋit ŋina a ŋican ka aryeba ŋina nyiŋaleunio.

¹²Okoe epupyo ŋitoilon a ŋituŋa a ŋulu alalak, irurumaete ikes lopite ŋolo irurumaata ŋakipi ananam! Okoe epupyo akiruruma a ŋakwapin, irurumaete ikes lopite ŋolo irurumaata ŋakipi ŋuna alalak nooi!

¹³Irurumaete ŋituŋa a ŋakwapin lopite ŋolo irurumaata ŋakipi ŋuna alalak, nai ikilakini Ekapolon ŋituŋa ŋul, ido toema neni alwanan nooi, iritaryo ikes lopite ŋolo ekutarya ekuwuam ŋamilo alokidiama ŋimoru ka lopite ŋolo ipiripirya apuwa alokuwuam.

¹⁴Ani edoli eboŋ bu ekabule atipei, nai ani iwalari akwap, toŋopiyasi ikes. Erae ŋun ŋakiro ŋuna itiyakinosi neni a ŋulu enyasut akwap kosi ka erae ŋuna eryamunete ŋulu aŋatasi ŋiboro kosi.