Read ngakarimojong Isa. 18 Bible Online

Isa. 18 - ngakarimojong bible

Isa. 18

¹Okoe iyoŋ akwap ŋina eruwor emaase alokekwaye ŋaŋololin a Esiopia,

²akwap ŋina iyakiyanari ŋikawoikinitok kon emeto aŋolol Nile, todokito ŋatubae ŋuna itiyaunitae a ŋasasaka, iyes ŋikiyakitono ŋulu apiranak, toloto nakwap a ŋituŋa a ŋulu aoyak tosulut ŋawat, lotuŋa ŋulu ekeritae alodiye kec ka aneni alwanan, toloto nakwap ŋina agogoŋon ŋina iloununui ŋimoe keŋ, nakwap ŋina etyakito ŋaŋololin.

³Iyes ŋituŋa daadaŋ ŋulu iyakasi nakwap, iyes ŋulu iboiyete anakwap, ani ikyaaryo abendera alokidiama emoru, emaikina iyes kiŋolikis ani ekutakinio amomwara a emesek, emaikina iyes topupokis!

⁴Ŋakiro ŋuna akalimoki ayoŋ Ekapolon ikes nu, “Eŋoliuni ayoŋ ekililiŋat anakibois kaŋ, lopite ŋolo emwanunia akoloŋ ekililiŋat, lopite ŋolo emwanunia nakwaare kikopik akwap apaki ŋina elemere.

⁵Eriŋa nyedolo apaki ŋina elemere, apaki ŋina edaunotor ŋatur a ŋikinyom, toruworos ŋatur ŋaraito a epiini ŋuna akoko, etubori Ekapolon a ekileŋ ŋatalijei, ido etubori iŋes ŋaten ya nariet.

⁶Imyekinio ikes alomoru toruworos akimuj a ŋikyeny ka akimuj a ŋityaŋ a ŋulu ka ariet. Enyamete ŋikyeny ikes akamu tutur ka enyamete ŋityaŋ ŋulu ka ariet ikes akiporo tutur.

⁷“Apaki ŋin eyaunio ŋainakineta neni ke Ekapolon a ŋolo a ŋajoresyo, eyaunio aneni a ŋituŋa a ŋulu aoyak tosulut ŋawat aneni a ŋituŋa a ŋulu ekeritae alodiye kec ka aneni alwanan, aneni a ŋituŋa a akwap a ŋina agogoŋ ka a ŋina iloununui ŋimoe keŋ, nakwap ŋina etyakito ŋaŋololin. Epote ŋituŋa ŋul lomukura Sion neni enyaritere ekiro a Ekapolon a ŋolo a ŋajoresyo.”