Read ngakarimojong Isa. 22 Bible Online

Isa. 22 - ngakarimojong bible

Isa. 22

¹Ŋakiro ŋuna adwaritae aŋuna ka akadipaalat a ŋina ka akisileerekinet. Anukiro ikisicanito iyes idokaryata iyes kidiama ŋakais? Kaanukiro idokaryata iyes daadaŋ kidiama ŋakais?

²Okoe iyes ŋituŋa ŋulu igurosi nooi! Okoe iyes ŋituŋa a etaun a ŋolo ileleba egurigur ka ŋasuban! Pa aaryo ŋituŋa kus ŋulu atwaka a ekileŋ pa tari atwakete alojie.

³Aema ŋikapolok kus daadaŋ kaapei aponi kikamarae ikes pa egumaritae ekaleŋeleŋet edio. Aponi ikikamar iyes daadaŋ ŋulu aponi ikiryamun tari daŋ sek kikiemitotor ŋikapolok kus neni alwanan.

⁴Aŋun, abu ayoŋ otema, “Nyipotu neni kaŋ, kimyekinae ayoŋ egwor nooi; nyikisirworiut ayoŋ aŋuna amunyarere ŋituŋa kaŋ ŋuluminan.”

⁵Esubakinit Ekapolon a ŋajoresyo akoloŋit, akoloŋit ŋina ka akiguro ka akipuda ta akibiler, itiyakin ŋun anakadipaalat a ŋina a akisileerekinet, akoloŋit ŋina eritakinere ŋarwatatain ka ŋina igworotor ŋituŋa enyarito ŋimoru kiŋarakis ikes.

⁶Apotu ŋasigarya a Elam potu etiŋito ŋatorosya a ŋikaleŋeleŋe, emeto ŋagaari ŋuna iritae a ŋaŋolei ka eyakatar ŋasigarya ŋuna ameto ŋaŋolei, apotu ŋasigarya a Kir kisileereut ŋaupala kec.

⁷Eleleba ŋagaari ŋuna eritae a ŋaŋolei nakadipaalae kon ŋuna ajokak a ŋalup ka apotu ŋasigarya ŋuna ameto ŋaŋolei torebuwasi ŋipukei a ŋitaunio.

⁸Enyasun ŋarwatatain ŋuna sek eiunito ŋituŋa a Yudaya. Akoloŋit ŋin ipotu iyes kiwara ŋiboro ŋulujiet alokai a ŋina ka Amoni,

⁹ido ipotu iyes kiŋolikis elalak ŋiolei anarwatatain a etaun a Daudi ka ipotu iyes tookut ŋakipi anabwal a ŋina ayai nenidipal.

¹⁰Ipotu iyes kimara ŋakais ŋuna aya Yerusalem, ido ipotu toritaanasi ŋakais aŋuna ka adukio ŋaduketa ŋunajiet narwatata.

¹¹Ipotu iyes tobokakis abwal kidiŋ ŋarwatatain ŋunaarei kilunyokin nabwal ŋinaŋorot. Nai ipotu iyes nyikinyoma ŋolo etiyauni abwal ŋin, kori nyitoodiut akitopoloorit ŋolo abu koloŋ sek toyeu akitiyaun abwal ŋin.

¹²Apaki ŋin abu Ekapolon Akuj ŋolo a ŋajoresyo ikinyarau iyes akigworo ka akiolol, akibany ŋitim kus ka akinap ŋiguniyae,

¹³nai akilo iyes ayakau nakiro ŋun, ipotu iyes toyakaunotor alelyanu ka akinumunum ŋasuban, ipotu iyes toara ŋimoŋin ka toŋola ŋamesekin ka ipotu tonyama akiriŋ ka tomata epiini. Ipotu iyes temasi, “Emuja ka omata, anerae ikitwaki moi taparacu.”

¹⁴Adau Ekapolon ŋolo a ŋajoresyo akisiirar ayoŋ ŋakiro nu, “Kire jik, nyikisyonio iyes aŋuna ka aronis a ŋin tari ŋina itwakyata iyes.”

¹⁵Ŋakiro nu ikes alimu Ekapolon Akuj ŋolo a ŋajoresyo ebe, “Bua, tolot neni a ŋolo epolokinit ŋuluce a ŋolo enyaritae Sebina, a ŋolo epolokinit ŋiboro alokai ka apukan, ido tolimok iŋes tema,

¹⁶‘Apedor ani iyakar iyoŋ ne? Ata ŋae erae ŋiyeneta kon a ne, ibokakinia iyoŋ akipany ne aŋuna kon, ibokakinia iyoŋ akipany kidiama ne ka iwuakinia neni ieŋunia iyoŋ lokamukumukut?

¹⁷Eapi Ekapolon akimasar iyoŋ a nen eryenyaana ekaakone; ikikamuni iŋes iyoŋ ka agogoŋu,

¹⁸ikisirimok iyoŋ ŋarwa ŋuna alalak, ido ikicuta iyoŋ nariet nakwap ŋina alalan, itwanikini iyoŋ nen ka idoŋete nen ŋagaari ŋuna sek iruunitor iyoŋ. Okoe iyoŋ ŋolo iyau ŋileec lotuŋa a ekapolon kon!

¹⁹Akalemari ayoŋ iyoŋ alotic kon ka eketiditeuni ayoŋ iyoŋ tojoŋo apolou.

²⁰“‘Akoloŋit ŋin anyarauni ayoŋ eketiyan kaŋ Eliakim lokoku a Ilikia,

²¹etanapikini ayoŋ iŋes ekaaso kon ka akoroba kon. Ainakini ayoŋ iŋes apedor ŋina sek iyakar iyoŋ, ido eruwor iŋes papa a ŋituŋa a ŋulu iboiyete alo Yerusalem ka papa a ŋiletok a Yuda.

²²Ainakini ayoŋ iŋes kipuka ŋiletok a Daudi, ŋuna ecamit iŋes akitiyakin mam ŋini eŋeri ka ŋuna nyecamit iŋes akitiyakin, mam ŋini itiyakini.

²³Ewuakini ayoŋ iŋes napolou torubak eyai nen ikwa asesit, eruwor iŋes ekepukan ŋolo itopolooritae ipukat ŋiletok a papa.

²⁴Idaŋidaŋi iŋes ŋakiro a ŋiletok apapa keŋ, ŋakiro a ŋidwe keŋ ka ŋuna a ŋituŋa a ŋuluce a ŋulu iboiyoto iŋes. Irici iŋes ŋiboro kec daadaŋ ameun anabakuli alokopoi tari namoti daadaŋ.’

²⁵Ebala Ekapolon Akuj ŋolo a ŋajoresyo ebe, ‘Akoloŋit ŋin, elemari asesit ŋina sek ebubukinitoe nakibois ŋina emam ibore elemarya, eyeparyo, ido toukor, ecakakin kwap ibore daadaŋ ŋini sek ayai nen tomunaar,’ ” anerae adau Ekapolon alimun ŋun.