Read ngakarimojong Isa. 23 Bible Online

Isa. 23 - ngakarimojong bible

Isa. 23

¹Ŋakiro ŋuna adwarit Ekapolon aŋuna a ŋituŋa a Tiro ikes nu: Kiwololoto iyes ŋituŋa ŋulu imeto ŋameeli ŋuna a Tarisis, anerae enyasun akibois kus, edoŋ emam akai ka emam neni elomarere nakwap. aponi tolimokinae ikes ŋun eboŋunete alo Kupuro.

²Okoe iyes ŋituŋa ŋulu iboiyete alodiyete anam nyiryaŋiryaŋasi. Okoe iyes ŋimucurus a Sidon, atubo ŋikiyakitono kus anam,

³ido eyakasi kidiŋ anam, amaikina iyes toryamut ikwapei ibore ŋini elemyo aŋuna kus ŋikinyom ŋulu alo Sior, ŋikinyom ŋulu elemyo alomanikorin a ŋulu a aŋolol Nile; irae sek iyes ŋimucurus a ŋakwapin.

⁴Okoe ŋituŋa a Sidon, emaikina iyes ikiruma ŋileec, anerae erworo anam ka aduketait ŋinajiet ŋina eyai diyete anam ebasi, “Nyeryabakina ayoŋ, kori nyidouno, nyitanuna ayoŋ ŋikilyok ŋulusorok, kori nyitopolouno ayoŋ ŋaberu ŋunasorok.”

⁵Ani kedolo ŋakiro neni a ŋituŋa a Ijipit, ebuli ikes iirarete ŋakiro a Tiro.

⁶Todoka anam toloto Tarisis; okoe iyes ŋituŋa ŋulu iboiyete alodiyete anam, kiwololoto.

⁷Erae kire lo etaun ŋolo eturuunito alo Tiro a? Etaun ŋolo kedukio koloŋ sek a? Etaun ŋolo eyakiyanari ŋituŋa keŋ akikamar ŋakwapin a?

⁸Ŋae ayeu ŋakiro nu imanit Tiro, etaun ŋolo itopolooritae nooi, ŋolo arae ŋimucurus keŋ ŋirwosi, ŋolo arae ŋikagyelanarak keŋ ŋulu etopolooritae anakwap a daadaŋ.

⁹Ayeu Ekapolon ŋolo a ŋajoresyo ŋakiro nu, alemar akituro aneni a ŋikapolok a daadaŋ, akisurum ŋileec daadaŋ ŋulu itopolooritae anakwap.

¹⁰Toboŋosi nakwap kus, okoe iyes ŋameeli a Tarisis, nyeriŋa nabo nege erae edoket a anam.

¹¹Ayeu Ekapolon anapedor keŋ akisican ŋulu eya nanam, etubul ŋapukasinei. Alimu Ekapolon ŋakiro ŋuna a Kanaan, atemar kinyasunae ŋaduketa keŋ ŋunajiet.

¹²Ebala Ekapolon, “Nyilakarosi iyes nabo, okoe ŋituŋa a Sidon ŋulu ikisicanitae, tonyoutu, todokasi Kupuro, tari alo Kupuro nyiryamunete iyes akieŋun.”

¹³Kiŋolikisi mono iyes akwap a Ŋibabiloniyae, amam koloŋ sek ŋituŋa ŋul a nen. Arae ŋituŋa ka Asiriya esyakinete akisiboikin ŋituŋa kec nen ŋulu eboiyete sek analoŋisat. Apotu ikes kituruwosi Tiro neni iboiyoto ŋityaŋ, todukokis nen ŋaduketa ŋuna aoyak ŋuna erikaunitere etaun, apotu kielasi ŋakais a Tiro ŋuna ka apukan, kituruwosi etaun ereŋorot.

¹⁴Kiwololoto, iyes ŋituŋa ŋulu imeto ŋameeli a Tarisis, anerae enyasun aduketait kus ŋinajiet.

¹⁵Ameun akoloŋit ŋin nyetamunio nabo Tiro ŋikaru ŋatomonikanikaarei, apaki ŋina ka akiyar a erwosit. Ekaku a ŋikaru a ŋatomonikanikaarei, itiyakinosi Tiro ŋuna eya loete lo ŋolo ka amalaat:

¹⁶Tolemu aduŋgu kirimok etaun, iyoŋ amalaat ŋina nyeriŋa ikitamunitae! Toramak aduŋgu kon toru neni ajokan, toeik ŋieosyo ŋulu alalak, ikotere ikitamunio iyoŋ.

¹⁷Ekaku a ŋikaru a ŋatomonikanikaarei ebuni Ekapolon Tiro, ido eboŋokinete ŋituŋa keŋ amucuruso, emalaaketa ikes a napukasinei a daadaŋ a ŋuna eya nakwap.

¹⁸Italeikinio neni ke Ekapolon ŋiboro keŋ ŋulu egyelanari iŋes ka ŋisiliŋa ŋulu eryamununui iŋes anagyelanar, nyiŋadaaryo ŋiboro ŋulu eryamuni iŋes anagyelanar, kori nyituruworete ikes ŋulu kec, nai eryamunete ŋulu itopoloorito Ekapolon akimuj kec ŋina alalan ka ŋilowi kec aloboro a ŋulu a Tiro.