Read ngakarimojong Isa. 26 Bible Online

Isa. 26 - ngakarimojong bible

Isa. 26

¹Akoloŋit ŋin, eeikinio eete lo anakwap a Yudaya: Ikiyakar isua etaun ŋolo agogoŋon, Akuj ikiinanakini isua akiloun, lopite ŋolo ikiinakinia arwatata, kori aduketait ŋinajiet.

²Toŋaasi ŋipukei, ikotere elomunete ŋituŋa a akwap a ŋina iyookino ŋituŋa keŋ, ŋituŋa ŋulu iricito ŋuna ka akikinyoma.

³Iyokit iyoŋ a ekisil ŋulu nyiryaŋiryaŋasi anatameta kec, iyokit iyoŋ ikes, anerae ikikinyomito iyoŋ.

⁴Kikinyoma Ekapolon ŋikaru ka ŋikaru, anerae Ekapolon Akuj, iŋes erae neni iryamuniata iyes aiuno ŋina a ŋikaru ka ŋikaru,

⁵anerae acaku iŋes kwap ŋulu eboiyete anakiboisyo a ŋuna aoyak, Acaku iŋes kwap etaun ŋolo ayai naitae. Aritaki etaun ŋol kwap ka eturuwo ŋalup.

⁶Ipudao tokona etaun ŋol, ipudaete ŋikulyak, ipudaete ŋikilames a ŋulu eyakatar akiitanit.

⁷Esulut erot a ŋituŋa a ŋulu iyookino. Okoe Ekapolon ŋolo iyookino, itusulutut iyoŋ erot a ŋulu iyookino.

⁸Anakiwuapit ŋikisila kon, ikidarit isua iyoŋ okoe Ekapolon, ekiro kon ka ayenenu kon, iŋes erae akiitanit a akiyar kosi.

⁹Ekeitanit ayoŋ iyoŋ nakwaare, ikiwarit iyoŋ etau kaŋ eŋirikinit nooi; anerae ani iyauni iyoŋ ŋikisila kon nakwap, eyeunete ŋituŋa ŋulu iboiyete anakwap ŋuna ka akiyookino.

¹⁰Ani kitoodikin ajokis neni a ŋituŋa a ŋulu itiyaete aronis, nyeyenunete ŋituŋa ŋul ŋuna ka akiyookino; itiyaete ikes ŋuna aronok tari eyakasi nakwap a ŋulu iyookino, nyemitakinito ailiil ŋina ke Ekapolon.

¹¹Okoe Ekapolon, itenit iyoŋ akisican ikes, nai nyiteete ikes ŋun. Kimyek ikes kiŋolikis alelakinit kon ŋituŋa kon, ido kiruma ikes ŋileec. kimyek kitoŋopiya ikes aŋoit kon ŋina iŋoikinitor iyoŋ ŋimoe kon.

¹²Okoe Ekapolon, ikiinakini iyoŋ isua ekisil, anerae kire, ŋuna daadaŋ etiyae isua, itiya iyoŋ aŋuna kosi.

¹³Okoe Ekapolon Akuj kosi, ikipukata isua ŋikapolok ŋice ŋulu nyerae iyoŋ, nai ekiro kon bon enyaritae isua.

¹⁴Nyeyarete ŋikatwak, nyeboŋununeete nakwap ŋitorubei a ŋikatwak, anerae ibu iyoŋ kisican ikes ka tomunya ikes, kitoŋopiya ikes tojoŋoi atamunit jik.

¹⁵Okoe Ekapolon itolalau iyoŋ akwap kosi, iyatak iyoŋ akwap kosi alowaetin a daadaŋ; aŋun ikitopolooritae iyoŋ.

¹⁶Okoe Ekapolon, apotu ikes ikiwara iyoŋ apaki ŋina ayakatar locan, apotu ikes kilipa neni kon, apaki ŋina isicania iyoŋ ikes.

¹⁷Okoe Ekapolon, aponi isua kibelibeloi ka kigworoi alokiŋaren kon eryabae lopite ŋolo eryabar aberu ŋina eapi akidoun.

¹⁸Aponi isua kibelibeloi ka toryebakinetei, nai mam ibore aponi isua kidounoe. Nyerauna isua ŋikelounak alojie a edio ka mam ituŋanan idounitoe erae ŋini ka akwap.

¹⁹Eyarunete ŋituŋa kus ŋulu apotu totwaka, eyarununete ŋawat kec. Okoe iyes ŋulu ikinukitae nalup, tonyoutu, toeikisi aŋuna ka alelyanu. Ikwaanikin ayarun kus ka ŋakopi ŋuna ekilikilete taparacu, ipuduni akwap ŋulu elomarito nalup.

²⁰Potu ŋituŋa kaŋ, tolomasi nagulei kus, togolokis ŋikekya kus kidaut alomar tooma, toŋopa apaki adio akitodol ŋina edaunor anyunyura ŋina ka Akuj.

²¹Ebuni Ekapolon anakibois keŋ, akisican aŋuna a ŋasecisya kec ŋituŋa ŋulu iboiyete anakwap. Isileereuni akwap ŋituŋa daadaŋ ŋulu aponi toarae; nyiwuai nabo akwap ŋituŋa ŋulu aponi toarae.