Read ngakarimojong Isa. 28 Bible Online

Isa. 28 - ngakarimojong bible

Isa. 28

¹Ekaŋ iyoŋ Isirael akwap ŋina iturotor ŋikamerak a Epuraim, akwap ŋina ecucukaiya akibuses ikwa ŋatur ŋuna itanapikinitae neni a ŋikapolok; a ŋulu imujete ŋamuja ŋuna ajokak; akwap ŋina a ŋulu eumiya epiini!

²Kiirasi eyakar Ekapolon ituŋanan ŋini etiron ka ŋini agogoŋon, ŋini ikimunyari lopite ŋolo emunyaryata akiru ŋina a ŋakoko ka ekuwuam akwap; ŋini ikimunyari lopite ŋolo emunyaryata ekuwuam ŋolo agogoŋon ka ŋakipi ŋuna eleleete akwap; ijukuni iŋes a apedor keŋ nakwap akiru ka ekuwuam.

³Ipudao alokwap ŋulu iturotor ŋikamerak a Epuraim,

⁴ŋulu ecucukaiya akibuses kec ikwa ŋatur ŋuna itanapikinitae neni a ŋikapolok a ŋulu imujete ŋamuja ŋuna ajokak, ikwaanikin ikes ka ŋaboboryo ŋuna ekokete eriŋa akamu, ŋuna elemari ituŋanan ca daadaŋ ŋini iŋolikini.

⁵Akoloŋit ŋin eruwor Ekapolon ŋolo a ŋajoresyo aikit a ŋatur ŋina apolon ka ebokot ŋolo ka akibuses aneni a ŋipiya a ŋituŋa keŋ,

⁶einakini etau ŋolotubet ŋakiro anakiyookino neni a ŋini etubi ŋakiro ka agogoŋu neni a ŋulu ebwaŋete ŋimoe alopuke apaki ŋina ke ejie.

⁷Etooliyo epiini lu daŋ, ido iteriterosi aŋuna ke epiini a ŋolo adwaran; aoliyosi ŋisacaradotin ka ŋikadwarak anakimat epiini ŋolo adwaran, esimatimataiya ikes epiini, iteriterosi aŋuna ke epiini a ŋolo adwaran; nyisiyoonokinete ŋuna isileerekini Akuj ikes anakiruja, nyetubete ŋakiro a ŋituŋa a akiyookino.

⁸Ibwaliyarito ŋalekan ŋuna ka asiilyo ŋimesae kec, mam akibois ŋina eseg.

⁹Ebasi ikes make, “Ŋae epedori Ekapolon akitatam aosou, ŋae epedori iŋes akisileerekin ŋakiro? Epedori iŋes akitiya ŋun neni a ŋidwe a ŋulu ariŋa epetoryo, neni a ŋulu ariŋa iteesikinio akinak.

¹⁰Ikitatami iŋes iwon ŋikisila ka ŋikisila, ŋikisila ka ŋikisila, elain a ŋakiro epei ka ŋoloce, elain a ŋakiro epei ka ŋoloce, ŋadi a ne, ŋadi ka ama.”

¹¹Kire jik, irwori Ekapolon neni a ŋituŋa keŋ ikajikaja, irwori neni kec a ŋajep a ŋituŋa aŋulugelae,

¹²a ŋulu abu iŋes tolimok tema, “Erae ne neni kieŋunet, kisiyeŋutu ŋulu eupit, erae iŋes neni kieŋunet”; nai apotu ikes nyepupokis ŋakiro kaŋ.

¹³Ŋakiro ŋun iŋes elosyo Ekapolon alimun ebe, “Kitatamae ikes ŋikisila ka ŋikisila, ŋikisila ka ŋikisila, elain a ŋakiro epei ka ŋoloce, elain a ŋakiro epei ka ŋoloce, ŋadi a ne ka ŋadi ka ama;” ikotere nai ani elosete ikes kimasar ekaukau tobilas, kikamarae ka torikoroe.

¹⁴Aŋun, kiirasi ŋakiro a Ekapolon iyes ŋulu ijamuwarito ŋakiro a Ekapolon, iyes ŋulu ipukato ŋituŋa lu alo Yerusalem;

¹⁵anerae itemasi iyes, “Acamunoi isua ka atwanare, acamunoi isua ka akibois ŋina a ŋikatwak; apaki ŋina eponiata ŋican ŋulu apipilak, nyepote neni kosi; anerae ikiuna isua analyokonu ka ikiŋopit isua anakirworo alyokonu.”

¹⁶Aŋun, alimu Ekapolon ebe, “Ewuak tokona ayoŋ Sion amoru ŋinakisyakinet aduketait, amoru ŋina agogoŋon nooi, amoru ŋina egogoŋ egyelit ŋina itowoi aduketait jik. Nyekadakini ituŋanan ŋini ikinyomit neni keŋ.”

¹⁷Akitub ŋakiro a akiyookino iŋes eruwor akipimet a amoru a ŋin, akiyookino iŋes erikini neni emagul; Inyasunete ŋakako ŋirotin a akiyar kus ŋulu iyarikinito iyes, inyasuni akalele a ŋakipi ŋakiboisyo ŋuna iŋopitotor iyes.

¹⁸Elemaryo acamunet kus ka atwanare, ikisaryo acamuna kus ka akibois ŋina a ŋikatwak; ani epote neni kus ŋican ŋulu etubulok, ikimunaarete iyes.

¹⁹Apaki daadaŋ ŋina eponiata ŋican ŋul neni kus, ikiarete iyes; anerae epote ŋican ŋul a ŋinataparacu ka a ŋinapaaran, epote ŋican ŋul neni kus naparan ka nakwaare. Ikibuli iyes ŋinapaki daadaŋ iyenuniata iyes ŋakiro ka Akuj.

²⁰Euruwaniar ekitaada, nyepedori ituŋanan arwaar ŋakejen, editiyar ibore ŋini imukore, nyepedori ituŋanan akimukor akuwan keŋ daadaŋ.

²¹Eji Ekapolon lopite ŋolo abunio tojiyo alomoru Perasim, eŋoi iŋes lopite ŋolo abunio toŋoya anakadipaalat a Gibeon. Ebuni iŋes akitiya etic, egelaana epite ŋolo itiya iŋes, ebuni iŋes akitiya etic keŋ, ekujuwuana epite ŋolo itiya iŋes.

²²Aŋun tokona, nyijamuwasi ŋakiro ŋuna adau ayoŋ alimun, ani kijamuwasi iyes ŋakiro kaŋ, etyokioto ŋakiro aŋuna kus, anerae eira ayoŋ atubunet a Ekapolon Akuj ŋina a ŋajoresyo, atubunet ŋina ka amunyar akwap daadaŋ.

²³Topupokisi, kiirasi ŋakiro kaŋ. Topupokisi ejok, ido kiirasi ŋakiro ŋuna erworo ayoŋ.

²⁴Itaete mono jik ŋiketak aŋuna ka aekin ŋikinyom a? Erubakinete mono jik ikes ikurete ŋalup a ŋimanikorin a?

²⁵Ani mono kedau eketan akinapinap ŋalup a emanikor, nyepedori mono iŋes aekin ŋikinyom ŋulu a edia a ŋolo itoboboe akimuj a? Nyedupakinete mono ikes ŋikinyom ŋulu esibito erau a ŋilaino, ido todupakis ŋaganoi neni emaikina todupakinae, ido torekinae nawae a?

²⁶Itiyaete ikes ŋun, anerae itatamitae ikes ejok; itatami Akuj kec ikes.

²⁷Nyeramyo a ekukoŋ ŋicok alodia a ŋolo itoboboe akimuj, kori nyiragao a akokoro a gaari ŋicok alodia a ŋolo itotoboe akimuj, nai eramyo ŋicok a edia a ŋol a ebela, kori a akitoe.

²⁸Iryeo ŋikinyom aŋuna ka akimuj, nai nyerami ituŋanan ŋikinyom ŋul a ŋinakoloŋit; epedori ituŋanan akiram ŋikinyom a ekukoŋ, kori akiraga a akokoro a agaari, nai nyinyaadiyarete ŋul ŋikinyom.

²⁹Eponito nu daŋ aneni a Ekapolon a ŋolo a ŋajoresyo, itatami iŋes ŋakiro ŋuna ajokak ka eyakar iŋes aosou ŋina iloit.