Read ngakarimojong Isa. 29 Bible Online

Isa. 29 - ngakarimojong bible

Isa. 29

¹Ekaŋ iyoŋ Ariel, Ariel, etaun ŋolo abu Daudi kiboikin! Kimoryanak ŋikaru elunyanar a ŋipeipei, kimyek ŋasuban daadaŋ ŋuna a ŋolokaru torubakinae itiyao.

²Kikote neni daŋ esicani ayoŋ Ariel, eyakaun nen akigworo ka akiwolol, ikwaanikin Yerusalem aneni kaŋ ka Ariel.

³Abuni ayoŋ akiboikin Ariel lopite ŋolo abunio Daudi kiboikin nen, erikauni ayoŋ Ariel, odukok ŋaduketa ŋuna aoyak kiryama etaun, ido ewuak akititis kiŋa arwatata ŋina ke etaun kus.

⁴Ekaku irworikinete iyes ŋituŋa ka Ariel alokwap ŋalup iiraryo ŋitoilon kus alokwap ŋalup; iiraryo ŋitoilon kus alokwap esibit etoil a ekipye, iiraryo ŋitoilon kus iŋaiŋaasi analup.

⁵Nai ielaryo ŋimoe kus ŋulu alalak, kielar ikwa apuwa, ielaryo ŋiryenyaanotin lopite ŋolo ielarotor ŋamilo alokuwuam. Atipei anapaki a ŋina euruwuana,

⁶ebuni Ekapolon ŋolo a ŋajoresyo akipeyokin iyes, ebuni iŋes ka agiro ka amaran ŋina ka akwap ta etoil ŋolo apolon nooi, ebuni iŋes a ekuwuam a ŋolo ipiripiri ka ŋolo aryenyaanan ta akim ŋina enomiyari akwap.

⁷Tosodi ŋituŋa a ŋakwapin ŋulu alalak ŋulu itijiete ŋituŋa ka Ariel, ikes daadaŋ ŋulu itijiete Ariel ka ŋaduketa keŋ ŋunajiet, ikes ŋulu eteryamut Ariel ŋican, ikwaanikin ikes ka akiruja, kori etorube ŋolo iŋolikinio anakiruja.

⁸Ikwaanikin ŋun ka epite ŋolo irujaa ituŋanan ŋini enyamit akoro imuji, nai ani ekyenyuni toryamu eriŋa enyamit akoro; kori epite ŋolo irujaa ituŋanan ŋini enyamit akure emasi, nai ani ekyenyuni toryamu eriŋa enyamit akure. Ikokinete ŋakiro nen aneni a ŋituŋa a ŋulu alalak a ŋulu a ŋakwapin a daadaŋ a ŋuna itijiete ŋituŋa ŋulu eya lomukura Sion.

⁹Tobaŋaaniyasi toruwor ŋulu ibaŋaaka, tomudukaniyasi toruwor ŋulu imudukaka. Tomerakinos, nai meere a epiini, kiteriterokinos, nai meere aŋuna a ŋagwe aŋuna adwarak!

¹⁰Ikiinak Ekapolon iyes etau ŋolo ijotoorotor nooi; agol iŋes ŋakonyen kus, iyes ŋikadwarak, emuko iŋes ŋakyes kus, iyes ŋiketeyenunak.

¹¹Ikwaanikin aneni kus akisileerekinet na ka ŋakiro ŋuna eya lokitaabo ŋolo ipucaritae, lokitaabo ŋolo ani keinakin ŋulu eyenete akisyom, elimokinitae ebe, “Tosyoma ekitaabo lo,” etemarete ikes, “Nyikipedori isua, anerae ipucitae.”

¹²Ani keinakin neni a ŋulu nyeyenete akisyom ebookoi, “Tosyoma ekitaabo lo,” etemarete ikes, “Nyikipedori isua akisyom.”

¹³Alimu Ekapolon ebe, “Eapiyete ŋituŋa lu aneni kaŋ anakiro aŋuna irworosi ka eketopoloorito ayoŋ anakiro aŋuna irworosi, nai elwaka ŋitai kec aneni kaŋ, erae akilip kec neni kaŋ ŋina iwuapitere ŋikisila ŋulu etatamyo ikes eboonokin alimunun.

¹⁴Aŋun, etiyae ayoŋ nabo ŋakiro ŋuna ka aumokin lotuŋa lu, ŋakiro ŋuna eteryaŋakinak ka ŋuna ka aumokin. Eŋopiyari aosou a ŋikaosok kec, epuripuryaar aneni a ŋipiiryanotin apiiryanut ŋina ka ayenut ŋakiro.”

¹⁵Ekaŋ iyes ŋulu iwuaito nooi aneni ke Ekapolon ŋakiro ŋuna iyeete akitiya, iyes ŋulu itiyaete ŋakiro kus anakiryonut, iyes ŋulu ibasi, “Ŋae mono ikite iwon? Ŋae mono ikiyeni iwon?”

¹⁶Ibuburete iyes ŋakiro! Epedoryo mono atemar erae ekayan ŋamoti ecoto a? Epedori mono ibore ŋini eyeunitae alimokin ekayeunan keŋ ebe, “Meere iyoŋ ikiyeuni ayoŋ” kori epedori mono ibore ŋini itiyaunitae alimokini eketiyaunan keŋ ebe, “Mam ibore iyeni iyoŋ”

¹⁷Alotooma apaki ŋina euruwuana nyeruwor mono Lebanon emanikor ŋolo erai ŋaraito ŋuna alalak, ido nyeruwor mono emanikor ŋolo erai ŋaraito ŋuna alalak amoni a?

¹⁸Akoloŋit ŋin, iirarete ŋikiŋimanotin ŋakiro ŋuna igiritae lokitaabo, ido anakiyaloloŋ kec ka anakiryonut iŋolikinete ŋakonyen a ŋimudukanotin.

¹⁹Eryamunete ŋulu iyapara alelyanu ŋina kitete aneni ke Ekapolon ka itopoloorete ŋulu eyakatar akiitanit alotuŋa a Ekapolon Akuj ŋina a Isirael ŋina asegan;

²⁰anerae edaun eryenyaanot, eŋopiyari ŋini ejamuwarit ŋuluce, emunyaryo daadaŋ ŋulu iitanito akitiya aronis.

²¹Emunyaryo ŋulu imyeanakinete ŋikaronok nyisicana, ŋulu edapito alopukei ŋikatubok ŋakiro ka ŋulu etubonokinete ŋulu emam aronis itiyato.

²²Aŋun, alimu Ekapolon ŋolo abu tolaku Aburaam ŋakiro nu aŋuna a ŋiletok a Yakob atemar: Nyeriŋa nabo isirumyo ŋiletok a Yakob ŋileec, nyeriŋa nabo ikes itonyorididete ŋireetin;

²³anerae ani iŋolikinete ikes alokidiŋ kec ŋidwe kec ŋulu asubuni ayoŋ, ecamunete ikes asegis a Akuj a ŋina asegan a ŋina a Yakob, itopoloorete ikes Akuj a Isirael.

²⁴Eyenunete ŋulu esecito alotai kec ŋakiro, ecamunete ŋulu iŋuruŋurasi ŋakiro ŋuna itatamyo.