Read ngakarimojong Isa. 3 Bible Online

Isa. 3 - ngakarimojong bible

Isa. 3

¹Kiirasi, apuu tokona Ekapolon ŋolo etiron, ŋolo a ŋajoresyo, alemar alo Yerusalem ka anakwap a Yudaya akiŋarakinet daadaŋ ka agogoŋu, ejoŋoo ainanakin ikes akimuj ka ejoŋoo ainanakin ikes ŋakipi.

²Elemari Ekapolon a nen ekile ŋolo etiron ka esigarit, ekatubon ŋakiro ka ekadwaran, emuron ka ekasikout,

³ekapolokiniton ŋasigarya ŋatomonikan ka ŋolo epol akilo iŋes, eketataman ka ekekukujan ŋolo eyeni etic keŋ ejok ta ekapilan.

⁴Ituruwori Ekapolon ŋidyain ŋikapolok kec ka ipukaete ŋidwe ŋulucicik ikes.

⁵Iteryamun ŋituŋa make ŋican, imanakin ŋituŋa make, imanakin ŋikidunyet make, eremokin ŋisorok ŋikasikou ka nyitopoloorete ŋituŋa ŋulucaryo ŋikapolok kec.

⁶Ikamuni ituŋanan iyenet keŋ ŋini ka ateker keŋ, tema, “Inapit iyoŋ lopite ŋolo enapitotor ŋikarikok, emaikina iyoŋ toruwor ekarikon kosi, ikipolok isua anapaki a na a ŋina a ŋican.”

⁷Nai akoloŋit ŋin, eceluni ŋini ikamunio tema, “Nyapedori ayoŋ alemar ŋican kus, emam akimuj, kori ŋilowi alokai kaŋ; nyikituruwosi ayoŋ ekarikon a ŋituŋa.”

⁸Kire, iteriterosi ŋituŋa a Yerusalem ka ebusokin ŋituŋa a Yudaya, anerae ŋakiro ŋuna irworosi ka ŋuna itiyaete ikes, erae aŋuna ka aŋeryo ka aremokinor apolou ŋina a Ekapolon!

⁹Elimorit epite ŋolo etakaniata ŋireetin kec aremokino kec Ekapolon, iseraete ikes asecit kec lopite ŋolo etiyaata ŋituŋa a Sodoma nyimunonito ikes asecit kec. Aca kec! Ayaut ikes ŋilam neni kec.

¹⁰Tolimokisi ŋulu iyookino atemar ejokak ŋakiro aŋuna kus, anerae imujete ikes akimuj ŋina a ŋakinyinyir kec.

¹¹Ekaŋ iyes ŋulu ikiilit aŋuna ka asecit kus! Erokyata nooi ŋakiro aŋuna kus, anerae itiyakinio neni kec ŋuna apotu ikes kitiyata neni a ŋuluce.

¹²Ŋidwe ikes isicanito ŋituŋa kaŋ ka ŋaberu ikes ipukato. Okoe ŋituŋa kaŋ ikitooliyosi iyes ŋikarikok kus, ikitoŋopikis ikes iyes ŋuna emaikina iyes kiwuapa.

¹³Aten tokona Ekapolon alimokin ŋituŋa aronis kec, aten tokona Ekapolon atubokin ŋituŋa.

¹⁴Egeiyari Ekapolon atubokin ŋikarikok ka ŋikapolok a ŋituŋa keŋ, itoroniyarit ikes a ŋakiro a nu, “Imunaasi iyes emanikor a ŋikito a epiini, eya nakais kus ŋiboro ŋulu eŋatununuyo aneni a ŋikulyak.

¹⁵Anukiro ilosikinito iyes isicanito ŋituŋa kaŋ ka itonyorididito ŋireetin a ŋikulyak? Ekapolon Akuj ŋina a ŋajoresyo alimu ŋun.”

¹⁶Ebala Ekapolon, “Aŋuna iturotor ŋaberu a Sion, tolosete itenarito ŋimosiriŋin, eŋoleŋoleete ka ikinikinasi, ituruyete ŋitworoi ŋulu cicik ŋulu enapito ikes anakejen,

¹⁷“Aŋun, itolomuni Ekapolon ŋajemei anakyes ikec, itorotokini ikes emam ŋilowi enapito anacirin.”

¹⁸Akoloŋit ŋin, elemari Ekapolon anaberu aŋuna a Yerusalem ŋiboro ŋulu isiritotor ikes, ŋinapen ŋulu a ŋakejen, ŋulu a nakyes, ŋulu amilimilak ŋulu a ŋidokolei,

¹⁹ŋinapen ŋulu a ŋaki, a ŋakan ka ŋikitambarae ŋulu a ŋidokolei,

²⁰ŋakitambarae ŋuna enapito ikes anakyes, ŋausyo ŋuna eenito ikes nakan, ŋinapen ŋulu a ŋacirin, ŋicupae ŋulu a ŋamyeta a ŋuna akukunyok ka ŋikito ŋulupipaet,

²¹ŋikabobooe ŋulu a ŋimoyo ka ŋulu a ŋikumes,

²²ŋilowi ŋulu a ŋasuban, ŋanaŋgae ŋuna erwatae, ŋikotyo ka ŋikikapwa,

²³ŋilowi kec ŋulu ecayete, ŋilowi ŋulu amilimilak, ŋakitambarae ŋuna enapitae alodokolei ka ŋakitambarae ŋuna itukitukitae nakyes.

²⁴Eyakaun nen abosis meere eure a akimyet a ŋina akukunyon, enapi ŋinituŋanan auno meere ausi, edaun anakyes kec ŋitim ŋulu sek eoitoe ejok, enapete ikes ŋiguniyae meere ŋilowi ŋulu ajokak, edaun akibuses aneni kec ka irumete ŋileec ikes.

²⁵Earyo ŋikilyok kus a ekileŋ ka etwakete ŋikajiok kus alojie.

²⁶Iwololoete ka igworete ŋituŋa alopukei a Sion. Eruwor Sion etaun ŋolo a ŋican, ikwaanikin ka aberu ŋina iboi alokwap emam ŋiboro enapit.