Read ngakarimojong Isa. 30 Bible Online

Isa. 30 - ngakarimojong bible

Isa. 30

¹Irworo Ekapolon ebala, “Okoe iyes ŋidwe ŋulu aŋerok, ŋulu eyeete ŋakiro, nai meere ŋuna kaŋ, iyes ŋulu icamununosi, nai anakimanit ŋuna acamit ayoŋ;

²iyes ŋulu ilot itiyarosi Ijipit eriŋa nyiŋita ŋakiro aneni kaŋ, iyes ŋulu ilot akiuryaro aneni a Parao ka aryamun neniŋopet alo Ijipit.

³Aŋakiro aŋun, eruwor akiuryaro aneni a Parao ŋileec aneni kus ka eruwor aŋopit kus alo Ijipit ajamuwaro.

⁴Tari keyakasi ŋikapolok a ŋasigarya keŋ Soan ka tari kedolito ŋikiyakitono keŋ Anes,

⁵irumete ŋileec ŋituŋa a Yudaya daadaŋ aŋuna a ŋituŋa a ŋulu nyepedorete akiŋarakin ikes, ŋituŋa ŋulu nyeyaunete adiojokis, kori adiokiŋarakinet neni kec, nai ŋileec ka ajamuwaro.”

⁶Erae nu ŋakiro ŋuna aponi todwarae aŋuna a ŋityaŋ a ŋulu eya Negeb: Elosete ŋikiyakitono itorito nakiboisyo ŋuna a ŋatyokisyo, ŋuna eya ŋican, nakiboisyo ŋuna eya ŋaŋatunyo ka ŋiŋatunyo ŋulu ipopolaete, nakiboisyo ŋuna eya ŋapomya ka ŋimuno ŋulu eporete. Elosete ikes nen iwokito abaru kec a ŋisigirya ka iwokito ŋisiliŋa kec a ŋikaala, eayete ikes ŋiboro ŋul neni a ŋituŋa a ŋulu nyepedorete akiŋarakin ikes.

⁷Eayete ikes ŋiboro ŋul nakwap a Ijipit ŋina erae akoŋinait, ŋina emam ibore eyakar, aŋun, anyar ayoŋ iŋes “Raab ŋina emam ibore itiyae.”

⁸Tolot tokona, kigir ŋakiro nu alokiŋaren kec namoru ŋinadapal, kigir ikes lokitaabo, ikotere eruwor ŋuna a ŋapakio a ŋuna eponito ka eruwor esuuda ŋolo a ŋikaru ka ŋikaru;

⁹anerae erae ikes ŋituŋa ŋulu aŋerok, ŋidwe ŋulu emam akikinyomit eyakatar, ŋidwe ŋulu nyepupete ŋakiro ŋuna itatami Ekapolon,

¹⁰ŋulu elimonokinete eketeyenunan ebe, “Nyiyenut ŋakiro” ka neni a ŋikadwarak ebe “Nyidwara neni kosi ŋakiro ŋuna iyookino, tolimonokinae isua ŋakiro ŋuna ajokak, todwara neni kosi ŋakiro ŋuna ka alyokonu.

¹¹Nyiwuapa ŋakiro ŋuna ajokak, kimyekisi akitiya ŋuna iyookino, nyikilimonokis nabo isua ŋakiro ŋuna ka Akuj a Isirael a ŋina asegan.”

¹²Aŋun, irworo Akuj a Isirael ŋina asegan ŋakiro nu, “Aŋuna iŋeryoto iyes ŋakiro kaŋ, ido ikinyoma nakisican ŋuluce ka namodiyo ka iyarikis nakisican ŋuluce ka namodiyo,

¹³aŋun, ikokini asecit ŋin aneni kus akabaat ŋina eyai narwatata ŋina aoyan, akabaat ŋina enya, ŋina eapi aritaar arwatata, toritakin atipei alotooma apaki ŋina euruwuana.

¹⁴Ikwaanikin abwaŋabwaŋar a arwatata a ŋin ka neni ebwaŋar amot ŋina ebwaŋio ka anyunyura, ŋina nyepedoryo aryamun tari itabok ŋini ekurorere akim, kori aokunio ŋakipi alokare.”

¹⁵Irworo Ekapolon Akuj ŋina asegan ŋina Isirael ŋakiro nu, “Ani kerae toboŋunito iyes neni kaŋ, toryamunito akieŋun, kiuna; ani kerae kiapara iyes aneni kaŋ, ikikinyoma ayoŋ, kiryamunito agogoŋu.” Nai ipotu iyes nyicamut ŋun,

¹⁶ido tolimut temasi, “Mam, nyikiemi isua ikidokit ŋaŋolei.” Aŋun iemete iyes! ido temasi nabo, “Ikiemi isua edokitae ŋaŋolei ŋuna apiranak.” Aŋun, ikiwuapete iyes ŋimoe kus ekerete akilo iyes!

¹⁷Esuri ituŋanan ipei ŋituŋa aliput, iemete iyes daadaŋ aŋuna a ŋituŋa a ŋikan ikirisete ikes iyes tari ŋina idoŋio ituŋanan ipei bon esibit epir ŋolo ka abendera alokidiama emoru, esibit akitoodikinet ŋina esipokinitae kidiama ekamukumukut.

¹⁸Kikote neni daŋ ecamit Ekapolon akitiya ajokis neni kus, aŋun ebuni iŋes akisyon iyes; anerae erae Ekapolon Akuj ŋina ka akiyookino, erereŋ daadaŋ ŋulu idarito iŋes.

¹⁹Kire jik, okoe ŋituŋa a Sion, ŋituŋa ŋulu iboiyete alo Yerusalem, nyigworete iyes nabo jik. Itiyae iŋes ajokis neni kus apaki ŋina iirarya akigworo kus, ani iirari iŋes akigworo kus, ikiboŋokini iŋes iyes.

²⁰Tari kikiinak Ekapolon iyes ŋimoe ka ŋican, nyeŋopiyari Eketataman kus nabo, nai iŋolikinete iyes Eketataman kus.

²¹Ani kilot iyes lowae ŋolo aloteten, kori lowae ŋolo alokedyeny, iirarete iyes etoil alokaku kus ebala, “Erot lo, tomekisi.”

²²Tosodi nai, inyasunete iyes ŋitorubei a ŋakujo kus ŋulu eburusiyaritae a esilipa ka ŋitorubei ŋulu eburisikinitae egolid. Icakarete iyes ikes esibito ŋaraco ŋuna asiilyanak, itemarete iyes neni kec, “Nyikicamit isua iyes!”

²³Iyakuuni iŋes akiru a ŋuna a ŋikinyom a ŋulu iekinete iyes nalup, ido akimuj ŋina elomuni analup, eruwor ŋina etuman ka ŋina alalan nooi. Akoloŋit ŋin, epote ŋaatuk kus adak neni ca daadaŋ eya ŋinya;

²⁴enyamete ŋimoŋin ŋulu itaete ka ŋisigirya ŋulu itaete ŋinya ŋulu iŋadatae ŋulu elemyo a akitiyo ka auma ŋina apolon.

²⁵Akoloŋit ŋina earere ŋimoe kus ŋulu alalak ŋina eritarere ŋaduketa ŋuna aoyak, eyakaunosi ŋayona ŋuna elelyaata ŋakipi alomoru a ŋulu aoyak a daadaŋ ka alokamukumukui a ŋulu aoyak a daadaŋ.

²⁶Akoloŋit ŋina imadya Ekapolon neni ewanan alotuŋa keŋ ka ŋina itaŋaleunio Ekapolon ŋajemei ŋuna abu iŋes kiteryamu ŋituŋa keŋ, ecauni elap ikwa akoloŋ ekwaŋiar akica a akoloŋ akilo tari ŋarwa ŋakanikaarei, ikwaanikin akica ŋin bon ka ŋina a ŋirwa a ŋikanikaarei.

²⁷Kiirasi, ebunit ekiro a Ekapolon aneni alwanan, ebunit anaŋoit a ŋina erirae ka anapuru a ŋina iryono cuc a ŋina eremit kidiama; ileleba anyunyura nakituk keŋ, ido ikwaan aŋajep keŋ ka akim ŋina ikinomiyari.

²⁸Ikwaan ekieŋanu keŋ ka ayonae ŋina ilapit elele, ŋina edolete ŋakipi lodokole erae kidok. Iwokori iŋes ikwa arimama ŋituŋa a ŋakwapin namunyaro, irepakini iŋes ŋaunoi loŋitiny a ŋituŋa torikorere ikes nariet tooliyosi

²⁹Ieikinete iyes eete lopite ŋolo ieokinioto nakwaare apaki ŋina a ŋasuban a ŋuna asegak, eyakaun alakara lotai kus lopite ŋolo erotokinio ituŋanan iirari eruye a apilu a ŋina enyaritere ŋituŋa alosit lomoru a Ekapolon neni a Ekapolon a ŋolo arae ataaba a Isirael.

³⁰Isiirari Ekapolon ŋituŋa etoil keŋ ŋolo ailiilon ka iŋolikinete ŋituŋa apedor a Ekapolon ebuni kwap, ebuni apedor ŋin eyakar aŋoit ka akim ŋina ikimunyari, ebuni eyakar ŋidouwon, akiru ŋina ireta egiro ka ŋakako.

³¹Ebuli ŋituŋa ka Asiriya iirarete etoil a Ekapolon apaki ŋina isicania iŋes ikes.

³²Apaki daadaŋ ŋina eramarya Ekapolon ebela keŋ ŋolo isicania ŋituŋa ka Asiriya iiraryo eruye ŋolo esibit eruye a ŋiburin ka ŋaduŋgui. Itiji Ekapolon ikes a akan keŋ a ŋina iikikyo.

³³Itemokinitoe sek ka aŋorot akibois, itemokinitoe akibois ŋin aŋuna a erwosit ka Asiriya. Ecukul ka elapat neni inokakinitae akim ŋin ka elal akim a nen ka elalak ŋakito. Ekieŋanu a Ekapolon itule akim ŋin torirau ikwa apetoron.