Read ngakarimojong Isa. 39 Bible Online

Isa. 39 - ngakarimojong bible

Isa. 39

¹Ŋirwa ŋul, kiira erwosit a Babilon ŋolo anyaritae Merodak-baladan ŋolo arae lokoku a Baladan atemar kedyaka erwosit Esekia ka aŋaleu. Aŋun, abu iŋes kiyaki ŋituŋa inasi Esekia ŋabaruwae ka ainakinet.

²Abu Esekia kijau ŋipeyok ŋul, kitoodik ikes akai keŋ ŋina a ebari keŋ, kitoodik ikes esilipa, egolid, ŋikito ŋulu akukunyok, akimyet ŋina epol egyelit, ŋiboro ŋulu ke ejie daadaŋ, ŋiboro daadaŋ ŋulu eŋadatae nakais ŋuna iŋadao ŋiboro. Mam ibore alokai keŋ, kori anakwap a ŋina epukat iŋes a daadaŋ ŋini abu Esekia nyitoodik ŋipeyok ŋul.

³Bu nai ekadwaran Isaya neni a erwosit Esekia, kiŋit tema, “Ŋakiro a nu irworosi ŋituŋa ŋul? Ai aponiata ikes neni kon?” Toboŋok Esekia tema, “Eponito ikes neni kaŋ anakwap a ŋina alwanan nooi, a ŋina enyaritae Babilon.”

⁴Kiŋit Isaya erwosit tema, “Inyoni eŋolikis ikes alokai kon?” Toboŋok Esekia tema, “Eŋolikis ikes ibore daadaŋ alokai kaŋ, mam ibore anakais a ŋuna eŋadat ayoŋ ŋiboro ŋini nyitoodikina ayoŋ ikes.”

⁵Abu nai Isaya tolimok erwosit Esekia tema, “Kiira akirot a Ekapolon a ŋolo a ŋajoresyo na ebe,

⁶‘Ebunit apaki ŋina ecunarere ibore daadaŋ ŋini eyai kai kon kaapei ka ŋiboro daadaŋ ŋulu apotu atapapaa kon kiŋadata, ŋiboro ŋulu eya tari tokona. Iudaryo ikes daadaŋ Babilon, mam ŋini idoŋi;

⁷tari ŋiletok kon ŋice ŋulusapa erikoryo kitokolupanae, toruworos ŋiketiyak alokai a erwosit a Babilon.’ ”

⁸Tolimok nai Esekia Isaya tema, “Ejok akirot a Ekapolon ŋina ilimu iyoŋ.” Atamatamae Esekia ikona, “Abe ejok bo erae ca keyakaun ekisil, akinapakina alorwa a ŋulu ayarya ayoŋ.”