Read ngakarimojong Isa. 41 Bible Online

Isa. 41 - ngakarimojong bible

Isa. 41

¹Ebala Akuj ebe; “Okoe ŋituŋa ŋulu iboiyete alodiyete anam, kililiŋa, topupokinae ayoŋ. Emaikina ŋituŋa toryamut agogoŋu kec nabo; emaikina ikes potu kiŋaren kaŋ, ido kirworo; emaikina iwon oyakaun kaapei neni etubere ŋakiro.

²“Ŋae etonyou ekelounan ŋolo alo Kide, ŋae anyarau iŋes akitiya etic keŋ? Ŋae ainakini iŋes akiloun ŋirwosi ka ŋapukasinei? Aridaa iŋes ŋirwosi a ekileŋ keŋ lopite ŋolo etwaarere apuwa, eela iŋes a ŋikaleŋeleŋe keŋ ŋirwosi lopite ŋolo ielarya ekuwuam ŋanya kiwok.

³Iwuapi iŋes ikes elosi kiŋaren emam ŋace, elosi iŋes ikomae nooi esibit nyipudaete ŋakejen keŋ akwap.

⁴Ŋae etiyae ŋun ka ŋae eturubak ŋun itiyasi? Ŋae enyaraununui ŋanyameta ŋinapei anakisyakinet? Ayoŋ Ekapolon, arae ŋolo a ekiŋaren, ayakaun ayoŋ tari apaki ŋina esidyon.

⁵Eŋolikis ŋituŋa ŋulu iboiyete alodiyete anam ŋakiro ŋun ka akuryaketa ikes, amaranikis ŋituŋa ŋulu eya nakisaleta a akwap; acunun ikes ka apotu kiŋaren.

⁶Iŋaranakini ikes make, ebasi neni a ŋinice ‘Totitinyoto!’

⁷Isimukekini eketiyan ŋiboro a ŋakito ituŋanan ŋini eyeni akitiya ŋiboro a egolid ka isimukekini ŋolo ibubui ŋiboro a enyondo ituŋanan ŋini ityeki anakityeket. Ebala iŋes neni a ŋini imadi ka asuwat ebe, ‘Itiyat iyoŋ ejok;’ tosodo nai ikes kibubukis etorube a akuj a ŋisumari, ikotere eenikin ejok.

⁸Nai iyes Ŋisirael, ŋituŋa kaŋ, iyes ŋiletok a Yakob ŋulu adau ayoŋ aseun, iyes ŋiletok ka Aburaam a ekone kaŋ;

⁹iyes ŋulu abu ayoŋ ocun anakisaleta a akwap, ŋulu abu ayoŋ okonyarau alokoonae a akwap a ŋulu alwanak, ŋulu abu otema neni kus, ‘Irae iyes ŋiketiyak kaŋ, akaseu ayoŋ iyes ka nyekeritari ayoŋ iyes;’

¹⁰nyikuryaketa, anerae ikirukit ayoŋ ka iyes, nyikuryaketa, anerae arae ayoŋ Akuj kus, eketogogoŋi ayoŋ iyes ka ekeŋarakini ayoŋ iyes. Akaiuni ayoŋ iyes a apedor kaŋ a ŋina elounan.

¹¹“Kire, ikes daadaŋ ŋulu ikiremokino iyoŋ, isirumyo kire jik ŋileec ka elemaryo aneni kec ajokis; ikes ŋulu ikitepegete iyoŋ, eruwor ŋikoŋinae ka etwakete.

¹²Iwarete iyes ŋituŋa ŋulu ecamito akitijiore iyes, nai nyiryamunete iyes ikes jik; eruwor ŋikoŋinae jik ŋulu ikitijiyete iyes ikiremokino.

¹³Ayoŋ Ekapolon Akuj kus atiŋi ŋakan kus ŋuna aloteten; ayoŋ akalimokinit iyes ebe, ‘Nyikuryaketa, ekeŋarakini ayoŋ iyes.’

¹⁴“Iyes ŋituŋa a Yakob ŋulu ipalag, nyikuryaketa, iyes ŋituŋa a Isirael ŋulu ikudyoko, nyikuryaketa. Ekeŋarakini ayoŋ iyes, Akuj ŋina asegan ŋina a Isirael iŋes erae akalakunan kus.

¹⁵Kiirasi, ekesikwaanikini ayoŋ iyes ka aramet ŋikinyom, aramet ŋikinyom ŋina eriŋa ekitetena erami ejok; iramete iyes ŋamoru kiryaasi kituruwosi apuwa koŋin, iramete iyes ŋikamukumukui kitiditeut kituruwosi ŋamilo koŋin;

¹⁶ipyetarete iyes ikes, ido tokuta ekuwuam nariet ka kiela ikes ekuwuam ŋolo ekusi nooi. Ipote nai iyes alelyan aneni ke Ekapolon; ipote nai iyes akipuro Akuj ŋina asegan ŋina a Isirael.

¹⁷“Ani epote ŋikulyak ka ŋituŋa ŋulu eyakatar akiitanit iwarito ŋakipi, ido nyeryamut ŋadi, tooko ŋaŋajepa kec aŋuna ka akure, ayoŋ Ekapolon aboŋokini ikes, ayoŋ Akuj a Isirael nyemyekini ikes.

¹⁸Aŋaari ayoŋ ŋaŋololin toleleut anaonitei a ŋuna alokidiama ŋimoru aŋaari ayoŋ ŋilelyan toitut alokidiŋ ŋakadipaalae; eturuwori ayoŋ aloŋisat neni esipotor ŋakipi ka eturuwori ayoŋ neni sek eonit anakwap neni ileleba ŋicowae ŋulu eya ŋakipi.

¹⁹Eturupuni ŋikito a Cedar analoŋisat, eturupuni ayoŋ ŋikito ka Akacia, ŋikito ŋulu ikwaan ka ŋikamurya, ŋikito a Olipa analoŋisat; eturupuni ayoŋ ŋikito a Cipres analoŋisat aneni eonit, eturupuni ayoŋ analoŋisat ŋikito ŋulu aoyak ka ŋulu arubak togogoŋ,

²⁰ikotere iŋolikinete daadaŋ ka toyenut; ikotere etamatamaete ŋituŋa daadaŋ ka toyenut atemar Ekapolon etiya ŋun a apedor keŋ ka eyenunete atemar, Akuj ŋina asegan ŋina a Isirael iŋes emyek ŋun itiyakin.”

²¹Alimu Ekapolon ebe, “Potu, tolimutu ŋakiro ŋuna idyekanarotor iyes. Alimu erwosit a Yakob ebe, ‘Tolimutu ŋakiro ŋuna isitatar iyes,

²²Kimyekisi ŋakujo ŋun, potu kiŋaren todwara aŋuna yok ŋuna eponito. Emaikina ikes itolimokis iwon ŋakiro ŋuna etiyakin, ikotere iwon ikitamatamae apolou kec, ido oyenutu ŋuna epote aŋuna a ŋakiro a ŋun; kori tolimokinae isua ŋakiro ŋuna eponito.

²³Tolimokinae isua ŋakiro ŋuna epote ekaku, ikotere ikiyenuni isua atemar irae iyes ŋakujo; kitiyakisi adiojokis, kori adioronis, ikotere ikikuryaniar isua ka ikibuli.

²⁴Kire jik, iraakasi iyes ŋakoŋinae ka erae ŋiticisyo kus ŋikoŋinae; ituŋanan daadaŋ ŋini eseuni akiwuap iyes erae ŋini esiilyana.

²⁵Abu ayoŋ eketoŋoik iyes ituŋanan ŋini alo Kuju ka adau iŋes abunore, aponi iŋes tonyaraunae a ekiro keŋ aneni elomununia akoloŋ. Ipudaari iŋes ŋikepukak ikwa erukere ibore a elepit, ipudaari iŋes ikes ikwa ipudaa ekayan ŋamoti ecoto.

²⁶Ŋae alimori anakisyakinet ŋakiro ŋun, ikotere isua ikiyenuni, ŋae alimori ikes ekiŋaren,’ ikotere isua ikitemari, ‘Iyookinit iŋes?’ Mam ituŋanan abu tolimu ŋakiro ŋun, mam ituŋanan abu kiserau ŋun, mam ituŋanan abu kiira ŋakiro kus.

²⁷Ayoŋ abu ekiŋaren olimo ŋakiro ŋun neni a ŋituŋa a Sion ka abu oinak ŋituŋa a Yerusalem ekalimoron ŋakiro ŋuna ajokak.

²⁸Nai ani eŋoliyari ayoŋ inaa, mam ituŋanan eyai nen; mam ituŋanan alokidiŋ kec ŋini erae ekeŋarakiniton, ŋae abu okoboŋok ayoŋ ŋakiro apaki ŋina eŋitar ayoŋ.

²⁹Mam ipei daŋ, erae ikes daadaŋ ŋikalyokonok; erae ŋiticisyo kec ŋikoŋinae; erae ŋitorubei kec ekuwuam koŋin.”