Read ngakarimojong Isa. 43 Bible Online

Isa. 43 - ngakarimojong bible

Isa. 43

¹Nai tokona Ekapolon ŋolo ikisubuni iyes ŋiletok a Yakob, iŋes ŋolo ikisubuni iyes ŋituŋa a Isirael iŋes alimu atemar: Nyikuryaketa, anerae adau ayoŋ alakun iyes; akanyar ayoŋ iyes a ekiro, ido iruworosi iyes ŋituŋa kaŋ.

²Apaki ŋina itoryoto iyes kidiŋ ŋakipi, ikirukit ayoŋ ka iyes; kori apaki ŋina itoryoto iyes naŋololin, nyepedorete ŋakipi akiwok iyes; apaki ŋina itoryoto iyes kidiŋ akim, nyikinomi akim iyes ka nyikinomiari iyes arira a akim a ŋin;

³anerae arae ayoŋ Ekapolon Akuj kus, Akuj ŋina asegan ŋina a Isirael, ekaiunan kus. Ajali ayoŋ Ijipit aŋuna ka alacakinia iyes, ajali ayoŋ Esiopia ka Seba aŋuna ka akilokonyunia iyes.

⁴Aŋuna iraakatar iyes alokiŋaren kaŋ ŋituŋa ŋulu ijokak nooi, ŋituŋa ŋulu ikitopolooritae ka ŋulu amina ayoŋ, epotori ayoŋ ŋituŋa aŋuna ka aryamun iyes, epotori ayoŋ ŋituŋa a ŋakwapin aŋuna ka akilokonyunia akiyar kus.

⁵Nyikuryaketa, anerae ikirukit ayoŋ ka iyes, ayauni ayoŋ ŋiletok kus alo Kide ka akacununi ayoŋ iyes alo To.

⁶Alimokini ayoŋ ŋituŋa ŋulu alo Kide ebe, “Tojala ikes,” alimokini ayoŋ ŋituŋa ŋulu alo Kwap ebe, “Nyiwouniata ikes; yautu ŋidwe kaŋ ŋulusapa aneni alwanan ka ŋidwe kaŋ ŋulupesur anakisaleta a akwap.

⁷Yautu daadaŋ ŋulu enyaritae a ekiro kaŋ, ŋulu abu ayoŋ osub aŋuna ka akitopoloor ayoŋ, ŋituŋa ŋulu abu ayoŋ oyeu ka osub.”

⁸Yautu kiŋaren ŋituŋa ŋulu emudukaka toyakatar bo ŋakonyen, ŋulu ekiŋimaka, toyakatar bo ŋaki!

⁹Emaikina ŋituŋa a ŋakwapin tocunakinos kaapei, emaikina ŋituŋa tocunakinos. Ŋae alokidiŋ kec abu tolimu ŋakiro nu ka todwar neni yok ŋakiro ŋuna alunyar? Emaikina ikes yaut ŋisuudae kec toyenunere atemar iyookino ikes, emaikina ikes kiirasi, ido temasi, “Erae ŋakiro nu ŋuna a kire.”

¹⁰Ebala Ekapolon, irae iyes ŋisuudae kaŋ ka ŋiketiyak kaŋ ŋulu abu ayoŋ oseu, ikotere iyes ikiyenunete ayoŋ ka ikinupete ayoŋ, ido toyenut atemar ayoŋ bon arae Akuj. Ayoŋ bon arae Akuj, mam akuj ace mam akuj ace ayai ekiŋaren, mam ace jik eyakaun ekaku.

¹¹Ayoŋ arae Ekapolon, mam akaiunan ace mati ayoŋ bon.

¹²Abu ayoŋ olimu, oiu, ido eserau, abu ayoŋ etiya ŋun apaki ŋina amamukar akuj ace ŋinagela alokidiŋ kus; ido irae iyes ŋisuudae kaŋ.

¹³Arae ayoŋ Akuj ka arubakini arae Akuj jik, mam ituŋanan epedori aiun iyes anapedor kaŋ. Ani ketiyak ayoŋ ŋadi, ŋae ekesipiyori ayoŋ akitiya ŋun?

¹⁴Alimu Ekapolon, ekalakunan kus, Akuj ŋina asegan ŋina a Isirael ŋakiro nu ebe, “Aŋuna ka aiun iyes, eyakiyari ayoŋ ŋasigarya toremo Babilon, aritaari ayoŋ ŋipukei a etaun, ido eturuwori ayoŋ acela a Ŋibabiloniyae ŋina ka alakara akiwolol.

¹⁵Arae ayoŋ Ekapolon, Akuj kus ŋina asegan, ekasuban a Ŋisirael ka arae erwosit kus.”

¹⁶Alimu Ekapolon ŋolo abu koloŋ kiwuak erot kidiŋ anam, ŋolo abu kiwuak erot kidiŋ ŋakipi ŋuna alalak nooi,

¹⁷Ekapolon ŋolo abu toriko amunyar ŋagaari ka ŋaŋolei, ŋasigarya ka ŋikajiok; eperete ikes alokwap, nyeriŋa eyarunete, adaun ikes akitoŋopiyar jik, adaun akituduŋere ikwa ausi ŋina enoki.

¹⁸Alimu iŋes ebe, “Nyitamut nabo ŋakiro ŋuna alunyar, kori nyitamatamata nabo ŋakiro ŋuna ŋorok.

¹⁹Eapi ayoŋ akitiyakin ibore ŋini kitete, ageu ibore ŋin akitiyakin, eriŋa iyes nyeyenuna a? Ewuakini ayoŋ erot naloŋisat ka ewuakkini ŋaŋololin naonite.

²⁰Eketopoloorete ayoŋ ŋityaŋ ŋulu ka ariet, ŋikweei ka ŋikaleeso, anerae ewuakini ayoŋ ŋakipi naloŋisat ka ŋaŋololin naonite, ikotere ŋituŋa kaŋ ŋuluseuna emasete,

²¹ŋituŋa ŋulu abu ayoŋ osub aŋuna kaŋ a elope, topedoryata ikes akipuro ayoŋ.

²²“Kikote neni daŋ, okoe ŋiletok a Yakob, ipotu iyes nyikinyarata ayoŋ; nai okoe ŋiletok a Isirael, abu ikiup iyes akiwuapit ŋakiro kaŋ.

²³Nyeyauna iyes neni kaŋ ŋamesekin kus ikwapei ŋainakineta ŋuna epeyo, kori nyikitopolooro iyes ayoŋ a ŋamuronisya kus. Nyicana ayoŋ iyes a ŋainakineta, kori nyituupa ayoŋ iyes anainakin ayoŋ ekinyate.

²⁴Nyeyauna iyes neni kaŋ ŋakasirim ŋuna abobok kaapei ka ao, kori nyisimwonikina iyes ayoŋ a ŋasepwa a ŋamuronisya kus. Nai ikican iyes ayoŋ a ŋasecisya kus; ikituupa iyes ayoŋ a ŋaronisya kus.

²⁵“Arae ayoŋ Akuj ŋina ikisyoni iyes ŋasecisya kus, aŋuna kaŋ a alope, ido nyatamuni ayoŋ ŋasecisya kus nabo.

²⁶Kisitakinae ayoŋ, apena loikiiko; tolimutu ŋakiro kus, ikotere eyenunere atemar iyookino iyes.

²⁷Abu papaa kus ŋolo esyaunan tosec ka apotu ŋikerworok aŋuna kus toseca neni kaŋ.

²⁸Aŋun, abu ayoŋ ojamuwa ŋikapolok anakibois kaŋ a ŋina asegan ka abu epotok ŋiletok a Yakob namunyaro ka emyek ŋiletok a Isirael erae ŋulu ejamuwaritae.”