Read ngakarimojong Isa. 46 Bible Online

Isa. 46 - ngakarimojong bible

Isa. 46

¹Erae na adaunet a ŋakujo a Babilon! Arae sek Bel ka Nebo ŋakujo ŋuna elipeneneo neni kec, nai tokona idokokinitoe ikes losigirya, aruworosi akiwokitoi ŋina apotyon aneni a ŋityaŋ a ŋulu sek eupit.

²Ani eupi ŋityaŋ ŋul euryanikin, ŋakujo daŋ kidoŋo nenipei, nyepedorito aiun ŋulu iwokito ikes, ikes daŋ aŋatar nakwapin ŋace.

³“Okoe ŋituŋa a ekal a Yakob, kiirasi ŋakiro kaŋ, iyes daadaŋ ŋipiya a ekal a Isirael, kiirasi ŋakiro kaŋ, kiirasi ŋakiro kaŋ iyes ŋulu abu ayoŋ ekedar ameun anapaki a ŋina ikidounere, iyes ŋulu abu ayoŋ okodak tari eriŋa iya nakookyes atatoto kus.

⁴Arubakini ayoŋ arae Ekapolon kus tari anapaki a ŋina imojoŋiata iyes, tari apaki ŋina ekwaŋuniata ŋitim anakyes kus akadaki ayoŋ iyes. Abu ayoŋ okosub iyes, ido akadaki ayoŋ iyes, akadaki ayoŋ iyes ka akalakuni.

⁵Ŋae ipedorete iyes akisikwaanikinia ayoŋ, kori ŋae ikitiriyaniata iyes ayoŋ? Ŋae ikitamyata iyes ayoŋ esibit ikikwaan?

⁶Eyakasi ŋituŋa ŋulu ebukununuyete egolid alocweei kec, ido kipima esilipa anakiloi kec; kipaŋgata eketyakan egolid kitiyau akuj, tosodo toryediko alokiŋaren akuj ŋin kilipa neni keŋ.

⁷Eryoŋeneneete ikes akuj ŋin aloseketa kec, kiwoko, tosodo tosipokis nakibois ŋina eseunito ikes aŋuna keŋ, kimyekinae ewoi a nen; nyepedori akuj ŋin akiyotokin a nen. Ani kilip ituŋanan neni keŋ, emam aboŋokinet eryamuni ituŋanan ŋin, kori nyepedori akuj ŋin alakun idiotuŋanan alocan.

⁸“Iyes ŋikasecak, totamunito ŋakiro nu ka totamatamata,

⁹totamunito ŋakiro ŋuna alunyar koloŋ sek, anerae arae ayoŋ Akuj, emam ace arae ayoŋ Akuj ka emam akuj ace ŋina ikikwaan ka ayoŋ.

¹⁰Abu ayoŋ olimu ŋakiro ŋuna esidyok anakisyakinet ka abu ayoŋ alimu anapakio a ŋuna akoloŋ ŋakiro ŋuna ariŋa nyitiyakina otema, ‘Iyookin ŋakiro ŋuna ayeunit ayoŋ ka erikakini akitiya ŋuna acamit kitiyakin.’

¹¹Anyarauni ayoŋ ituŋanan ŋini amunyaran kiuwuaun ikwa egole alo Kide, anyarauni ayoŋ iŋes anakwap a ŋina alwanan akitiya ŋuna ayeunit ayoŋ. Adau ayoŋ alimun ŋakiro, ido eturuwori ayoŋ ikes ŋuna itiyakin; adau ayoŋ ayeun ŋun, ido etiyakini ayoŋ ŋun.

¹²“Iyes ŋituŋa ŋulu egogoŋ ŋakyes, iyes ŋulu ilwaka analakuno!

¹³Etaapu ayoŋ alakuno neni kus, nyeriŋa elwana, ido nyedidi aiun kaŋ iyes; ewuakini ayoŋ aiuno Sion aŋuna a Ŋisirael a ŋituŋa kaŋ.”