Read ngakarimojong Isa. 47 Bible Online

Isa. 47 - ngakarimojong bible

Isa. 47

¹Iyes ŋituŋa a Babilon, totiyaunos anakitopolooro kus, potu kiboikinos napuwa, ŋituŋa a Babilon, kiboikinos kwap emam akitopolooro, anerae nyeriŋa nabo iyes ikinyarao ŋulu idisyak ŋulu epatana akiŋo.

²Tolemutu ŋamoru ŋunakiryeet, kiryeut akimuj, tolemasi ŋakitambarae anakyes kus, tolacasi ŋikaasoi kus, tolacasi ŋamuk anakejen kus, todoka ŋaŋololin.

³Ilerokinete iyes alokiŋaren ŋituŋa ka iŋolikinete ŋituŋa ŋileec kus. Alosi ayoŋ akinyaŋar, tosodi mam ituŋanan aesikini ayoŋ.

⁴Akuj a Isirael ŋina asegan iŋes ikilakuni isua, erae ekiro keŋ Ekapolon ŋolo a ŋajoresyo.

⁵“Iyes Ŋibabiloniyae kiboikinos ililiŋete, tolomasi nakiryonut! Nyeriŋa nabo ikinyarao iyoŋ Babilon arwosit a ŋakwapin a daadaŋ.

⁶Abu ayoŋ oŋoik ŋituŋa kaŋ, abu ayoŋ etiya neni kec esibit nyerae ikes ŋituŋa kaŋ; abu ayoŋ oinak ikes napedor kon, ido ibu iyoŋ nyitoodik ikes akisyon; ibu iyoŋ totiŋ erono nooi tari ŋulu amojoŋito.

⁷Ibu iyoŋ tema, ‘Aruwor ayoŋ arwosit ŋikaru ka ŋikaru.’ ido ibu nyitamu ŋakiro ŋun, kori nyitamatam ŋuna itiyakin anakiro a ŋun ekaku.

⁸“Aŋun tokona kiirasi ŋakiro nu, iyes ŋulu iminasi ŋakiro ŋuna ikitalakarito iyes ŋikulepek, iyes ŋulu iboiyete emam ŋace, iyes ŋulu itamete make alotai kus ebe, ‘Ayai ayoŋ ikikwaan ka Akuj, emam ice mati ayoŋ bon; nyeboikin ayoŋ esibit arae apuserut, kori nyetwakete ŋidwe kaŋ.’

⁹Itiyakin ŋakiro ŋun ŋaarei neni kon alotooma apaki ŋina nyiyeni iyoŋ ka alotooma akoloŋit apei bon. Icakari iyoŋ ŋidwe kon ka iruwor apuserut, epote ŋun neni kon ka itiyakin jik, epote ŋun neni kon tari kiyakatar iyoŋ ŋikekukujak ŋulu alalak ka ŋimurok ŋulu ka apedor a ŋina apolon ŋulu enyaraununeete ŋimuno.

¹⁰Ibu iyoŋ kitusubun anaronis kon ŋina iboi emam awasya; ibu iyoŋ tema, ‘Mam ituŋanan ekete ayoŋ.’ Apotu aosou kon ka apiiryanut kon ikitooliyosi iyoŋ, ido ibu iyoŋ totamak alotau kon ebe, ‘Ayai ayoŋ ikikwaan ka Akuj, emam ice ituŋanan ekete ayoŋ mati ayoŋ bon.’

¹¹Nai ebuni neni kon aronis ŋina nyipedori iyoŋ amuroiyor; epote ŋican neni kon ŋulu nyipedori iyoŋ akilokonyiyar a ibore idio ka epote ŋinyas neni kon pa iyeni iyoŋ, ŋican ŋulu nyitamakinit sek iyoŋ atemar epote neni kon.

¹²“Torubakisi ikinyomito neni a ŋimurok a ŋulu enyaraununeete ŋimuno ka neni a ŋikekukujak, a ŋulu ipotu iyes inakinos neni kec ŋinapei eriŋa iyes irae ŋisorok; acepaki itiyaete ejok anakiyar kus, acepaki ipedorete akitubul ŋimoe kus.

¹³Ikiup iyes akiŋitanar ŋakiro ŋuna emaikina kitiyata, emaikina ŋulu eyenete epite ŋolo eyakatar ŋisubuna ŋulu alokidiama towua aŋuna ka iun iyes, emaikina ŋulu eripiripiyete epite ŋolo eyakatar ŋikacer ka ŋolo eyakar ŋololap elomuni todwara aŋuna kus ŋuna itiyakin neni kus.

¹⁴“Topupokisi, ikwaan ikes ka ŋanya ŋuna eokito, enomiyari akim ikes; nyepedorete ikes alakun make anagogoŋu a ŋina ka arira. Meere ŋatotol a akim a ŋin ŋuna iwuaŋaror ituŋanan idio, meere akim ŋin ŋina epedori ituŋanan akiboikin diyete.”

¹⁵Ikote nen aneni kus ŋituŋa ŋulu ipotu iyes inakinos neni kec, ŋituŋa ŋulu itiyata iyes ka agogoŋu neni kec ŋinapei anasoroko kus, erae ikes daadaŋ ŋulu edyakarito, emam ŋini ikiuni iyes.