Read ngakarimojong Isa. 49 Bible Online

Isa. 49 - ngakarimojong bible

Isa. 49

¹Iyes ŋituŋa ŋulu iboiyete anakwapin a ŋuna idunyito anam, kiirasi ŋakiro kaŋ, iyes ŋituŋa ŋulu iboiyete anakwapin a ŋuna alwanak, topupokisi! Abu Ekapolon okonyarau ayoŋ eriŋa ayoŋ nyeuruuna, apaki ŋina ariŋaakar ayoŋ ayai nakook a toto kaŋ, abu iŋes okolimok ayoŋ ekiro.

²Abu iŋes kitipipil ŋakiro ŋuna alimuni ayoŋ ikwa ekileŋ ikiduŋi, abu iŋes ekemuko ayoŋ alotolim a akan keŋ, abu iŋes ekesikwaanik ayoŋ ka ekaleŋeleŋet ŋolo epwasitae, abu iŋes ekeŋadaa ayoŋ ikwa ekaleŋeleŋet ŋolo iŋadaaritae natoros,

³Abu iŋes tema neni kaŋ,“Irae iyoŋ Isirael eketiyan kaŋ, ŋolo aryamunia ayoŋ akitopolooro.”

⁴Nai abu ayoŋ otema, “Etiya ayoŋ koŋin, ecanicanaa ayoŋ agogoŋu kaŋ koŋin ka acaryoon;” kikote neni daŋ, ayeni ayoŋ atemar akainakini Ekapolon ayoŋ ibore ŋini erae ŋini kaŋ ka eyai eropit kaŋ neni ka Akuj kaŋ.

⁵Alimu tokona Ekapolon ŋolo akayeuni ayoŋ anakook atoto kaŋ aruwor eketiyan keŋ, ŋolo akaseuni ayoŋ akinyakar neni keŋ ŋiletok a Yakob ka acunar Ŋisirael neni keŋ; ŋolo eketopoloorit ayoŋ, Akuj kaŋ ŋina aruwor agogoŋu kaŋ,

⁶ebe, “Epataka mono ŋakiro ŋuna iraakar iyoŋ eketiyan kaŋ a? anerae ilosi iyoŋ akinyakun ŋikabilae a Yakob neni kaŋ ka ayaun neni kaŋ Ŋisirael ŋulu erae ŋipiya; eketuruwori ayoŋ iyoŋ akica ŋina a ŋulu nyerae Ŋiyudayan, ikotere itodoli iyoŋ aiuno ŋina ebunit aneni kaŋ nakisaleta a akwap.”

⁷Alimu Ekapolon Ekalakunan a Ŋisirael, Akuj a Isirael ŋina asegan, Akuj ŋina apotu ŋituŋa a ŋakwapin tojamuwasi ka toŋero, alimu iŋes ŋakiro nu neni a eketiyan a ŋikapolok ebe, “Ikiŋolikinete iyoŋ ŋirwosi, ido towua alokiŋaren kon, ikiŋolikinete iyoŋ ŋikapolok, ido eryedikete ikitopoloosi iyoŋ, anerae ikiseu iyoŋ Ekapolon ŋolo eyai akikinyoma, ikiseu iyoŋ Akuj a Isirael ŋina asegan.”

⁸Alimu Ekapolon ŋakiro nu, “Ani ŋina adolyo akoloŋit ŋina akaiunia iyes, abu ayoŋ ekeŋarak iyes, adau ayoŋ akiyok iyes, akituruwor iyes acamunet aŋuna a ŋituŋa a ŋakwapin, akinyakakin akwap lotuŋa kaŋ, akoranakin nabo akwap ŋina abu toruwor ekasile neni a ŋituŋa.

⁹Alimonokin ŋimabus ebe, ‘Tolomutu kiŋa,’ alimonokin ŋulu eya nakiryonut ebe, ‘Kitoodiunos.’ Eryamunete ikes akimuj emeto ŋirotin, eryamunete ikes akimuj alokidiama ŋikamukumukui daadaŋ ŋulu emam ŋikito.

¹⁰Nyenyami ikes akoro, kori akure, nyeari ikes ekuwuam ŋolo amwanan, kori akoloŋ, anerae iteni ikes ŋolo abu kisyoni ikes, iteni ikes kitoryo neni eya ŋiitan a ŋakipi.

¹¹Esitori ayoŋ ŋirotin kidiŋ ŋimoru kaŋ daadaŋ ka ewuakini ŋirotin kaŋ ŋulu apolok.

¹²Kiirasi, epote ŋirotin ŋul aneni alwanan, kiirasi epote ŋirotin ŋul alo Kuju ka alo To, epote ŋirotin ŋul anakwap a Sinim.”

¹³Okoe iyes ŋisubuna ŋulu alokidiama, toeikisi ka alakara, okoe iyes ŋisubuna ŋulu alokwap, tocelutu ka alelelyanu; okoe iyes ŋisubuna ŋulu iya lomoru tocelutu ieosi, anerae esirworiu Ekapolon ŋituŋa keŋ ka isyoni ŋituŋa keŋ ŋulu eryamunito ŋican.

¹⁴Nai ebasi ŋituŋa a Sion ebe, “Ikimyek Ekapolon isua, ikimuryakin isua aneni ke Ekapolon.”

¹⁵Epedori mono akimuryakin aberu ikoku keŋ ŋini itanaki, kori epedori mono aberu awoun akisyon ikoku ŋini idounit iŋes alope a? Tari kepedorete ŋun akimuryakin aberu, nyimuryakinosi iyes aneni kaŋ.

¹⁶Kiirasi, adau ayoŋ akigirakin iyes nenidapal a ŋakan kaŋ, ekeyoki ayoŋ iyes a ŋinapaki alotooma ŋarwatatain kus.

¹⁷Iloito ŋikadukok kus ŋituŋa ŋulu ikimunaanarete iyes ka eakarete aneni kus ŋulu apotu ikituruwosi iyes ŋicaryo.

¹⁸Kireosi toŋoleŋolekisi ŋiwaetin daadaŋ, acununosi ikes daadaŋ, eponito neni kus. Alimu Ekapolon atemar, ikwapei ayarya ayoŋ, iturokinosi iyes aŋuna a ŋituŋa kus, iturokinosi iyes aŋuna kec lopite ŋolo ituror ateran a ŋiboro keŋ.

¹⁹Kire jik, ilelebunosi iyes nakiboisyo kus ŋuna sek apotu toruworos ŋacaryo ka ŋireŋoroto; kire jik, idiŋidiŋakinosi ŋituŋa kus anakiboisyo a ŋuna sek aponere ikiritar iyes, eakarete neni alwanan ŋulu sek apotu ikitoŋopiyasi iyes.

²⁰Elimunete ipupete iyes ŋidwe kus ŋulu auruunio apaki ŋina iyakatar iyes locan ebe, “Edidiŋ akibois na aŋuna kosi, inakinae isua akibois ŋina aloloman kiboikinetei.”

²¹Itamakinete nai iyes alotai kus ebe, “Ŋae keuri ŋidwe lu aŋuna kosi? Aponi isua ikiteryamun ŋican, ikitusubun ŋikolupanotin, aponi isua ikirikor nakwapin, ikilemar a ne, ŋae nai kitopolouni ŋidwe lu? Aponi kimyekinae Sion esil, nai ai aponiata ŋituŋa lu etya ne?”

²²Alimu Ekapolon Akuj ŋakiro nu, “Eapi ayoŋ akisican ŋituŋa a ŋakwapin, ekea abendera kaŋ kiŋolikis ŋituŋa a ŋakwapin, tosodi kinyakut ikes ŋidwe kus ŋulusapa edakito a ŋakan ka edakunete ikes ŋidwe kus ŋulupesur aloseketa kec.

²³Eruworosi ŋirwosi aneni kus atapapa ka eruworosi ŋarwosi kec aneni kus atatoto ŋuna ikitanete iyes. Ijuuruyete ikes alokiŋaren kus ikitopoloorito iyes itiditeunosi ikes make ikitopoloorito iyes. Iyenunete nai iyes atemar arae ayoŋ Ekapolon, nyisurumyo ŋileec ŋulu ekekinyomito ayoŋ.”

²⁴Epatana mono ademar ituŋanan ibore ŋini eŋatunit a? Kori epatana mono ademun aneni a ekadedeŋan ŋituŋa ŋulu ekamaritae a?

²⁵Nai alimu Ekapolon atemar, epedoryo ademun aneni a ekadedeŋan ŋituŋa ŋulu ekamaritae ka epedoryo ademun ituŋanan ibore ŋini eŋatunit, anerae etiji ayoŋ ŋulu ikitijiyete iyes, ido aiuni ayoŋ ŋidwe kus.

²⁶Etanyami ayoŋ ŋulu ikisicanito iyes ŋawat kec a ŋilopeyek, emerakinosi ikes a ŋaokot kec pei lopite ŋolo emeratar a epiini. Eyenunete nai ŋituŋa daadaŋ atemar arae ayoŋ Ekapolon Ekaiunan kus ka Ekalakunan kus Ekapolon ŋolo etiron ŋolo a Yakob.