Read ngakarimojong Isa. 5 Bible Online

Isa. 5 - ngakarimojong bible

Isa. 5

¹Kimyekinae oeik aŋuna a eminat kaŋ eete a ŋolominat kaŋ, eete ŋolo a emanikor keŋ a ŋolo a ŋikito a epiini: Ayakar ŋolominat kaŋ emanikor ŋolo a ŋikito a epiini lokamukumukut ŋolo ataronon a ŋalup nooi.

²Abu iŋes kita emanikor ŋol kidepana ŋamoru daadaŋ, ido todupak ŋikito a epiini ŋulu ajokak nooi; todukok kidiŋ emanikor epemu, ido tobokak akipany ŋina ecuyere epiini. Egeno iŋes atemar eraunete ŋikito ŋul ŋaraito a epiini ŋuna ajokak, nai apotu toraut ŋaraito ŋuna aronok.

³Iyes ŋituŋa ŋulu iboiyete alo Yerusalem ka iyes ŋituŋa a Yudaya, totyakutu ŋuna a kire ŋuna abu ayoŋ etiya, kori ŋuna abu emanikor kaŋ kitiya.

⁴Anibore ice eitana kitiyae lomanikor kaŋ ŋolo a ŋikito a epiini, ŋini abu ayoŋ nyetiya? Ani apaki ŋina eitanitor ayoŋ ŋaraito ŋuna ajokak, kaanukiro araunia iŋes ŋaraito ŋuna aronok?

⁵Tokona, akalimokini ayoŋ iyes ŋuna alosi ayoŋ akitiya neni a emanikor kaŋ a ŋolo a ŋikito a epiini. Alemari ayoŋ ŋikito ŋulu ewuatere iŋes, ido tomunaarae iŋes, aritaari ayoŋ arwatata ŋina ewuatere iŋes, ido kipudaarae iŋes.

⁶Emyekini ayoŋ iŋes toruwor ŋalup ŋunacaryo, nyinyiporyo ŋikito keŋ, kori nyitao iŋes jik, erupunete ŋinya ka ŋamon a ŋikukwa aneni keŋ, alimokini ayoŋ ŋidouwon nyitodoto akiru lomanikor ŋol.

⁷Erae Isirael emanikor ŋolo a epiini ŋolo a Ekapolon a ŋolo a ŋajoresyo, ido erae ŋituŋa a Yudaya ŋikito a epiini ŋulu ajokak ŋulu edupakinit Ekapolon. Eitanit Ekapolon atemar kitiyata ŋituŋa a Yudaya ŋuna iyookino, nai abu kiŋolik aara. Eitanit iŋes atemar toruwor ikes ŋulu iyookino, nai abu kiira akigworo bon!

⁸Ekaŋ iyes ŋulu iasete ŋakais nakais kus, ŋulu iasete ŋimanikorin lomanikorin kus, akitodol ŋina eruworor iyes make iboiyete anakwap a ŋin, ikimyekin iyes make iboiyete a nen!

⁹Eira ayoŋ Ekapolon ŋolo a ŋajoresyo ikoŋi ebala, “Kire jik, imyekinio ŋakais ŋuna alalak toruworos ŋireŋoroto, emamukaun ŋituŋa anakais a ŋun a ŋuna alolomak ka kibusak.

¹⁰Alomanikor a ŋikito a epiini a ŋolo erae ŋiekae ŋitomon, ekoniuni epiini ŋolo ecuunio ŋilitae ŋulu eapiyarito ŋatomoniarei ka ŋiarei. Eekinio ŋikinyom ŋulu eapiyarito ŋakiloi ŋamiae ŋaarei ka ŋatomoniarei, nai elemunio ŋulu eapiyarito ŋakiloi ŋatomon bon.”

¹¹Ekaŋ iyes ŋulu ikyenyununeete taparacu sek, aŋuna ka akiwarit ŋagwe ŋuna adwarak, iyes ŋulu ideŋonorosi eboŋ tari ŋina imerakinotor.

¹²Iyes ŋulu ani itiyaete ŋasuban toyakas ŋiboro lu: ŋagitae, ŋaduŋgui, ŋiburin, ŋapilui ta epiini. Nai nyimisito akiwuap ŋuna etiya Ekapolon, kori nyimisito akiŋolikin ŋiticisyo keŋ.

¹³Aŋun, erikoryo ŋituŋa kaŋ nakwap ace aŋuna pa ayeneta ŋakiro kaŋ, eari akoro ŋikapolok kec ka enyami akure ŋituŋa kec ŋulu alalak nooi.

¹⁴Aŋun, eitan nooi akwap ŋina a ŋikatwak ikes aŋaar ŋalup nooi aŋuna kec, elomarete tooma ŋalup ŋikapolok a Yerusalem ka ŋituŋa ŋulu alalak kaapei ka asepic ŋina sek ecela a nen ta ŋulu sek itopoloorito iŋes.

¹⁵Etiditeun ŋituŋa, etiditeun ŋituŋa daadaŋ, esirumi ŋulu iturosi ŋileec.

¹⁶Nai itopoloryo Ekapolon ŋolo a ŋajoresyo anakitub ŋakiro anakiyookino, ka itoodiunit Akuj ŋina Asegan asegis keŋ anakiyookino.

¹⁷Epote nai ŋikaalei ŋulumesekin adaka lopite ŋolo edakatar neni sek emaikina edakasi ka edakasi ŋikaalei ŋulu itumitae ka ŋulumee loreŋoroto.

¹⁸Ekaŋ, iyes ŋulu iriunito asecit anakirworo alyokonu ka ŋulu iriunito aronis lopite ŋolo iriunitere a ŋaunoi agaari,

¹⁹iyes ŋulu ibasi, “Kimyekisi Ekapolon kiburuburak akitiya etic keŋ, ikotere isua ikiŋolikini, kimyekisi ŋakiro ŋuna eye Ekapolon Akuj ŋina Asegan ŋina a Isirael kitiyakin atipei, ikotere isua ikiyenuni!”

²⁰Ekaŋ iyes ŋulu ibasi ŋuna aronok ejokak ka ŋuna ajokak eroko, iyes ŋulu itusubut akica akiryonut ka itusubut akiryonut akica, iyes ŋulu ituruwosi ibore ŋini abobon ŋini edwar ka ituruwosi ibore ŋini edwar ŋini abobon!

²¹Ekaŋ, iyes ŋulu itamete atemar iosok ka ŋulu itamete atemar epiiryaka ŋakonyen!

²²Ekaŋ iyes ŋipiuno a epiini, iyes ŋulu idedeŋ nyikerito akinyal ŋagwe,

²³iyes ŋulu imyekinete ekasecan aŋuna a akaluŋuluŋut ka nyitubokis eriyan ŋini iyookino ŋakiro keŋ.

²⁴Aŋun, lopite ŋolo imyelarya arira eoot, lopite ŋolo iyuuwarya akim ŋinya tonomiya, ido tookiyosi ŋataagor kec ka tokuta ekuwuam ŋatur kec ikwa apuwa, anerae aŋero ikes ŋakiro a Ekapolon a ŋolo a ŋajoresyo ka ajamuwasi ŋakiro ŋuna ka Akuj a ŋina Asegan a ŋina a Isirael.

²⁵Aŋun, abu aŋoit ŋina a Ekapolon toyakaun lotuŋa keŋ, ka abu akisican ikes a apedori keŋ, apotu ŋimoru tomaranikis, kikokis ŋawat a ŋituŋa a ŋulu atwakito alorotin etukosi ŋatunyeny. tari ŋina aponiata ŋun kitiyakin, ariŋa Ekapolon eŋoikinit ikes ka arubakinit jik isicani ikes.

²⁶Iwuakini Ekapolon akitoodikinet ŋina enyaraa ŋituŋa a akwap a ŋina alwanan, ekutakini iŋes ekapiriicit tonyarau ŋituŋa anakisaleta a akwap, ido epote ŋul iwonyete atipei ka ekerete!

²⁷Mam ikes ipei daŋ ŋini eupi, mam ipei daŋ ŋini igukini, mam ŋini ilurakin, kori ejotoor, mam ŋini ilajilajakini elou keŋ anacir, mam ŋini eŋeda arukan ŋina a ŋamuk keŋ.

²⁸Ipenara ŋikaleŋeleŋe kec esubakina ŋakawo a ŋikaleŋeleŋe kec. Egogoŋ ŋimolokony a ŋaŋolei kec ikote itaaba, irimete ŋakejen a ŋagaari kec ikwa ekuwuam ŋolo ipiripiri.

²⁹Irurumaete ikes ikwa eŋatuny, irurumaete ikes ikwa ŋiŋatunyo ŋulusorok ŋulu iiligakinete, ido kikamut etyaŋ ŋolo enyamete ikes, ido kiwokosi iŋes a nen yaasi neni nyepedorere ademar ikes.

³⁰Akoloŋit ŋin, ipopolakinete ŋituŋa ŋul neni a Ŋisirael, irurumakinete ŋituŋa ŋul neni a Ŋisirael ikwa irurumaa anam. Ani kiŋolik ituŋanan akwap a Ŋisirael, iŋolikinete akiryonut ka ŋican; isiryonete ŋidouwon tari akica.