Read ngakarimojong Isa. 51 Bible Online

Isa. 51 - ngakarimojong bible

Isa. 51

¹Iyes ŋulu iwarito akiyookino, topupokinae ayoŋ, iyes ŋulu iwarito Ekapolon, topupokinae ayoŋ. Totamutu ataaba ŋina ikityakunere iyes; totamutu neni ibesere ŋamoru neni ikibetunere iyes.

²Totamutu Aburaam papa kus ka Sara ŋina ikidouni iyes. Apaki ŋina anyaraa ayoŋ Aburaam, arae iŋes epei bon, nai abu ayoŋ eterereŋ iŋes eturuwo iŋes ŋituŋa ŋulu alalak.

³Isirworiuni Ekapolon ŋituŋa a Sion; itojokuni ŋakiboisyo kec daadaŋ ŋuna apotu toruworos ŋacaryo ka ituruwori aloŋisat kec akibois ŋina ajokan ŋina ikoni Eden, kikwaanikin aloŋisat kec ka emanikor a Ekapolon. Eyakaun alelyanu ka alakara Sion, eokinete ŋituŋa a nen ŋieosyo ŋulu ka alakara.

⁴Okoe ŋituŋa kaŋ topupokisi ŋakiro kaŋ, okoe ŋituŋa a akwap kaŋ, kiirasi ŋakiro kaŋ; alosi ayoŋ akitatam iyes ŋikisila, eruwor akitub kaŋ ŋakiro anakiyookino ŋina eyauni akica nakwapin.

⁵Abuni ayoŋ alakun ŋituŋa kaŋ atipei, aapuu aiunio ŋina ebunit aneni kaŋ epukae ayoŋ ŋituŋa a apedor kaŋ; ekedarito ayoŋ ŋituŋa ŋulu iboiyete anakiboisyo a ŋuna alodiyete anam, idarito ikes anakigeno apedor kaŋ.

⁶Kireosi kidiama, toripiyasi kwap ŋalup; anerae eŋopiyarete ŋisubuna ŋulu alokidiama lopite ŋolo eŋopiyarya apuru, enyamun akwap lopite ŋolo enyamunor elou ka etwakete ŋulu iboiyete anakwap lopite ŋolo etwakyata ŋikamicirwa. Nai erubakini aiuno ŋina ebunit aneni kaŋ ŋikaru ka ŋikaru ka nyedaun alakuno ŋina ebunit aneni kaŋ jik.

⁷Topupokisi ŋakiro kaŋ iyes ŋulu eyenete ŋuna ka akiyookino, iyes ŋituŋa ŋulu iwuakinito akitatam kaŋ lotai kus nyikuryaketa aŋuna ŋituŋa a ŋulu ikiyanyete iyes, nyikikadak iyes apaki ŋina ikiyanyata ikes iyes,

⁸anerae irikari ekurut ikes lopite ŋolo irikarya abebe elou, irikari ekurut ikes lopite ŋolo irikarya ŋajul a amesek; nai erubakini alakuno ŋina ebunit aneni kaŋ ŋikaru ka ŋikaru ka eropari aiuno ŋina ebunit aneni kaŋ ananyameta a daadaŋ.

⁹Okoe apedor a Ekapolon, tonyou, tonyou kitoodiu agogoŋu kon. Tonyou ikwaŋina ibunio tonyounio koloŋ sek, ikwaŋina ibunio tonyounio ananyameta a ŋuna a koloŋ. Meere mono iyoŋ inyilinyiliyari Raab toruwor ŋanyile ka meere iyoŋ ibu kicum etyaŋ ŋolo adedeŋan a?

¹⁰Meere mono iyoŋ ibu kitoon anam ka kitoon ŋakipi ŋuna aya nenicukul nooi. Meere iyoŋ ibu kituruwo nenicukul a anam erot, ikotere ŋituŋa ŋulu ilakunit iyoŋ epedorete akiwuapakin a?

¹¹Aŋun, eboŋunete ŋituŋa ŋulu elakakinit Ekapolon, epote Sion eosi, eyakaunotor ikes alelyanu ŋina nyedaun, eryamunete ikes alelyanu ka alakara, emamukaun aneni kec akiyaloloŋ ka akisuta.

¹²Arae ayoŋ ŋolo ekesirworiuni iyes; kaanukiro nai ikuryanitotor iyes aŋuna a ŋituŋa a ŋulu epedorete atwakare, a ŋituŋa a ŋulu eŋopiyarete lopite ŋolo eŋopiyareta ŋinya?

¹³Ikimuryak iyes Ekapolon ekasuban kus, ŋolo abu topetak kidiama ka kiwuak ŋawoeta a akwap a? Ikuryaka iyes apaaran daadaŋ aŋuna ka adedeŋu a ekesicanan a ŋolo erae etic keŋ amunyar. Nai ai tokona eyai adedeŋu a ekesicanan?

¹⁴Elakunio atipei ŋulu isicanitae, nyetwakete ikes ka nyelomarete nakipany, kori nyicanakinosi akimuj.

¹⁵Arae ayoŋ Ekapolon Akuj kus, ŋolo ainakini ŋakipi a anam kimorokokokis ikotere totakanut ŋikaguragurae kec, erae ekiro kaŋ Ekapolon ŋolo a ŋajoresyo.

¹⁶Ewuak ayoŋ ŋakiro kaŋ nakituk kon, ekewua ayoŋ iyoŋ alotolim a akan kaŋ, adau ayoŋ apetakin kidiama ka ewuak ŋawoeta a akwap, ido adau alimokin ŋituŋa a Sion ebe, “Irae iyes ŋituŋa kaŋ.”

¹⁷Okoe ŋituŋa a Yerusalem, tonyoutu, tonyoutu! Iyes ŋulu adau Ekapolon akisican anaŋoit keŋ, iyes ŋulu idaut alomar nooi locan ŋulu einakinete ituŋanan akiteritero.

¹⁸Mam ituŋanan alotuŋa keŋ epedori akipuka Yerusalem, mam ituŋanan alotuŋa a daadaŋ a ŋulu apolout alo Yerusalem ŋini epedori akirik ŋuluce.

¹⁹Ikidolokis iyes ŋakiro nu ŋaarei: Ŋinyas ka amunyaro, aronis ka ejie, ŋae iyaloloŋi kaapei ka iyes? Ŋae ikisirworiuni iyes?

²⁰Eyalaar ŋidwe kus, eperete anakisaleta a ŋirotin a daadaŋ a ŋulu ke etaun ikamunitae ikes lopite ŋolo ikamunitor auno elob. Eŋoikinit Ekapolon ikes, eŋenyak Akuj kus ikes.

²¹Aŋun, kiirasi ŋakiro nu iyes ŋulu ikiwanitae, iyes ŋulu imerasi nai meere a epiini.

²²Alimu Ekapolon kus ŋolo etiron, Akuj kus ŋina eji aŋuna ka aiun ŋituŋa keŋ ebe, “Kiirasi, alema ayoŋ aneni kus ŋican ŋulu ikisiteriterete iyes, nyekesicani nabo ayoŋ iyes ananyunyura kaŋ.

²³Esicani ayoŋ ŋulu ikisicanito iyes, ŋulu adaut alimokin iyes ebe, ‘Topero alokwap, ikotere isua ikipudae iyes,’ ido ipotu iyes kituruwosi ŋakausinei kus neni ipudaete ikes ikwa akwap.”