Read ngakarimojong Isa. 52 Bible Online

Isa. 52 - ngakarimojong bible

Isa. 52

¹Okoe ŋituŋa a Sion, tonyoutu, tonyoutu kitoodiutu agogoŋu kus! Okoe ŋituŋa a Yerusalem, a etaun a ŋolo asegan, tonapa ŋilowi kus ŋulu ebusak, anerae nyeriŋa ŋituŋa ŋulu nyesegak, ŋulu nyileŋeritae elomunete lotaun kus nabo.

²Okoe ŋituŋa a Yerusalem, tonyoutu irae ŋulu itopolooro, tobutosi ŋican tolacasi ŋiriko ŋulu ikienito iyes okoe ŋituŋa a Sion!

³Alimu Ekapolon ebe, “Aponi ikigyelar iyes koŋin, tosodi ikilakunio iyes emam ŋisiliŋa etacio,

⁴koloŋ sek apotu ŋituŋa kaŋ totiyaaros Ijipit akiboi aina erae ŋigelae; esicana tokona ŋituŋa ka Asiriya daŋ ikes emam ŋakiro esecito.

⁵Anukiro tokona etiyae ayoŋ a ne ete ŋituŋa kaŋ eyaaryo emam ŋuna esecito? Ejamuwarito ŋikepukak kec ikes ka a ŋinakoloŋit erubakinito ejamuwarito ekiro kaŋ.

⁶Aŋun, eyenunete ŋituŋa kaŋ atemar arae ayoŋ Akuj akoloŋit ŋin eyenunete ikes atemar abu ayoŋ erwor ŋun, kire arae ayoŋ.”

⁷Etya ai alokidiama ŋimoru ajokis a abunore a ekiyakia a ŋolo iserae ŋakiro ŋuna ke ekisil, ŋolo eyaunit ŋakiro ŋuna ajokak, ŋolo iserae ŋakiro ŋuna ka aiuno ebala lotuŋa a Sion, “Erae Akuj kus Erwosit.”

⁸Kiirasi, ecelasi ŋikererok alotaun kus, ecelasi ikes daadaŋ elelyanete; anerae eteete ikes ileere anakonyen kec Ekapolon ebuni Sion.

⁹Toeikisi iyes daadaŋ kaapei, ŋaduketa a Yerusalem ŋuna eritakinitae kwap, anerae eŋarak Ekapolon ŋituŋa keŋ, ido alaku iŋes Yerusalem.

¹⁰Etoodik Ekapolon apedor keŋ, neni a ŋituŋa a ŋakwapin a daadaŋ; iŋolikinete ŋituŋa a ŋakwapin a daadaŋ aiuno ŋina ka Akuj yok.

¹¹Torotokisi, torotokisi toloto a nen! Nyitapa ibore idio ŋini itoroniyaritae, toloto aneni eya ŋiboro ŋulu itoroniyaritae, kitaleutu ŋawat kus iyes ŋulu iyakatar ŋiboro ŋulu ke Ekapolon.

¹²Nyilosete iyes ikirikirasi ka nyilosete iyes ikerete, anerae ikiŋarenikini Ekapolon iyes ka eruwor Akuj a Isirael ikiyokuunit iyes alokaku.

¹³Kiirasi, isiyookini eketiyan kaŋ etic keŋ, itopolooryo iŋes ka epoloor akilo daadaŋ.

¹⁴Ikwapei abunio tobulio ŋulu alalak iŋolikinete iŋes, abu akuwan keŋ totakan erae ŋina enyasuna, pa ekoni ŋina a ituŋanan a idio a ŋini ibuŋatae nooi ka abu iŋes totakan esibit meere ituŋanan.

¹⁵aŋun, eumokinete ŋituŋa a ŋakwapin a ŋuna alalak, ililiŋete ŋirwosi aŋuna keŋ, anerae iŋolikinete ikes ŋakiro ŋuna pa alimokinitae ikes ka eyenunete ikes ŋakiro ŋuna pa eirarito.