Read ngakarimojong Isa. 53 Bible Online

Isa. 53 - ngakarimojong bible

Isa. 53

¹Ŋae anup ŋakiro ŋuna aponi isua kiirarae? Neni a ŋae aponi kitoodikinae apedor a Ekapolon?

²Abu iŋes topolou alokiŋaren Ekapolon esibit ekitoe ŋolo alomunan ka esibit akipuriteunet ŋina erupunit anakwap a ŋina eonit; amam epite ŋolokitamet iŋes, kori akibuses ŋina ikiinakini iwon akitere iŋes, amam ibore alotakane keŋ ŋini epedori ainakin iwon akiitan iŋes.

³Ajamuwarito ka aŋerito ŋituŋa iŋes, arae iŋes ituŋanan ŋini eyaloloŋi, ŋini ayeni ŋakiro ŋuna a ŋican. Arae iŋes ituŋanan ŋini pa acamito ŋituŋa akiŋolikin, ajamuwaritae iŋes, eteete ŋituŋa iŋes erae ecaryoit.

⁴Kire jik, abu iŋes ya apalagu yok ka abu kiwok ŋidekesyo yok, nai aponi iwon totamatamae atemar erae Akuj esican iŋes, Akuj iŋes ebuŋa iŋes ka eteryamu iŋes ŋican.

⁵Nai aponi iŋes towanawanae aŋuna abilere iwon ŋikisila, aponi iŋes toarae aŋuna a ŋasecisya yok; aponi iŋes kisicanae aŋuna yok, aŋuna aŋajemei keŋ, adaun akitaŋaleun iwon.

⁶Aoliyor iwon daadaŋ ikwa ŋamesekin ŋuna apotu tooliyosi alorot, ewuapi iwon daadaŋ ŋirotin yok a ŋikulepek, ido ewuak Ekapolon nakou a eketiyan keŋ asecit yok a daadaŋ.

⁷Aponi iŋes kitokokiyanae ka kisicanae, nai nyelimuno iŋes akirot adio, ikwa ikale ŋinimesek ŋini erikoryo akiŋol, eliliŋi iŋes lopite ŋolo ililiŋia amesek alokiŋaren ŋulu etubete ŋajul keŋ; ikwaŋinapei abu iŋes nyelimu akirot adio.

⁸Aponi toreikinae iŋes ŋakiro anatubokin a ŋina pa eyookino, aponi torikoroe iŋes akiar. Ŋae apedorit atamatam ŋuna itiyakin neni keŋ? Anerae aponi tolemarae iŋes anakwap a ŋulu eyarete, aponi toarae iŋes aŋuna a ŋasecisya a ŋituŋa kaŋ.

⁹Aponi tonukae iŋes neni anukanakinio ŋikaronok, kiwuakinae iŋes nalyal a ŋikabarak, tari ŋina pa etiyator iŋes aronis adio, ka nyelimuno iŋes alyokonu.

¹⁰Kikote neni daŋ, arae acamit a Ekapolon atemar kisicanae ka toarae iŋes. Arae atwanare keŋ ŋina amaikina yau akisyon ka Akuj, tosodi ebuni iŋes akiŋolikin ŋipapae keŋ, ebuni iŋes akiyar apaki ŋina aoyan ka alotooma keŋ iyookin acamit a Ekapolon.

¹¹Kedau iŋes akidaŋidaŋ ŋican, eryamuni iŋes alelyanu nabo, eyenuni iŋes anaosou keŋ atemar pa abu oryamu ŋican ikoŋin. Ituruwori eketiyan kaŋ ŋolo iyookino ŋikalalak ŋulu iyookino ka iwuoki iŋes aronis kec.

¹²Aŋun, ainakini ayoŋ iŋes akibois aneni a ŋikapolok, ekorete iŋes ka ŋikagogoŋok ŋiboro ŋulu eŋatunitae, anerae abu iŋes tocamu atwanare ka aponi kimarakinae iŋes neni a ŋulu abilibiliyete ŋikisila, nai abu iŋes tocamu akidaŋ ŋasecisya a ŋikalalak ka abu todyek Akuj aŋuna a ŋulu ebilibiliyete ŋikisila.