Read ngakarimojong Isa. 59 Bible Online

Isa. 59 - ngakarimojong bible

Isa. 59

¹Kiirasi, nyitamete atemar nyepedori Ekapolon alakun, kori nyepedori akiirar akigworo kus.

²Erae ŋasecisya kus ikityakarito iyes aneni ka Akuj kus ka ŋasecisya kus ikes ainakis iŋes akiwua ereet keŋ aneni kus, ikotere nyepedo akiirar iyes.

³Nyesegak ŋakan kus, anerae iara iyes ŋituŋa, itiyaete iyes asecit a ŋimoyo kus ka irworosi iyes ŋuna ka alyokonu, ileleba ŋakiro ŋuna aronok naŋajepa kus.

⁴Nyisitanakinosi ŋituŋa anakiyookino; nyetubio ŋakiro erae ŋuna a kire iwuapitae ŋikisila. Iwuapito ikes ŋipegeta koŋin, ido irworosi alyokonu, aŋun, idyasete ikes ŋican ŋulu eyaunete aronis;

⁵Eyeete ikes ŋakiro ŋuna aronok elokete ŋalocyo lorotin a ŋuluce; etwakete ŋulu iwuapito ŋakiro ŋuna eyeete ikes, erae ŋakiro ŋuna eyeete ikes ŋuna ikiinete atwanare.

⁶Mam ajokis eyai nakiro ŋuna eyeete ikes, ecaryooko ŋiticisyo kec ikwaan ka elou ŋolo edonyunitoe alonyaa a asimokok, nyeiunosi ikes anakiro a ŋuna eyeete akitiya. Erae ŋiticisyo kec daadaŋ ŋulu ka asecit ka itiyaete ikes ŋiticisyo ŋulu ka aryenyeo bon.

⁷Nyeayeneneete ikes apaki ŋina aoyan akitiya aronis, iburiburete ikes atipei akiar ituŋanan ŋini nyesecit; erae ŋatameta kec ŋatameta ŋuna ka asecit, imyenakinete ikes ŋinyas ka amunyaro aneni daadaŋ itorete ikes.

⁸Nyeyenete ikes ŋuna ke ekisil ka emam akiyookino alorotin kec, nyejokak ŋakiro aneni itorete ikes, ituŋanan ŋini iwuapi ikes nyeyenuni ŋuna a ekisil.

⁹Aŋun, elwaka aneni kosi ŋakiro ŋuna ka akiyookino, nyeryamununio isua ŋakiro ŋuna ka akiyookino. Ikiitanit isua ayenun ŋakiro ŋuna a kire, nai erae ŋakiro daadaŋ abaŋao bon. ikitanit isua akitiya ŋakiro a alakara, nai ikilosi isua ikiyaloloŋi.

¹⁰Ikitwapitwapi isua esibit ikirae ŋimudukanotin, ikitwapitwapi isua esibit ikirae ŋulu emam ŋakonyen nyileerete ŋuna itiyao isua lopite ŋolo nyileereo ibore ekaikai akwap; ani erukitoe isua ka ŋulu egogoŋ, ikitakani ikisibit ŋikatwak.

¹¹Ipopolao isua daadaŋ ikwa ŋityaŋ ŋulu adedeŋak, igworoe isua nooi ikwa ŋakuryo. Iitanitae isua akiyookino, nai nyeryamuna, iitanitae isua aiuno, nai elwana aiuno aneni kosi.

¹²Elal isua abilibil ŋikisila alokiŋaren kon, ikisitakinito isua ŋasecisya kosi. Kire ikibilibilit isua ŋikisila anepei a ne ka ikiyeni isua ŋasecisya kosi,

¹³ikiŋer isua Ekapolon ka emunoni isua ŋuna a Ekapolon; aŋeri isua akiwuap ŋuna ka Akuj kosi. Aruwor akirworo ŋuna ka akisican ka ŋuna ka akiŋer irworoe isua. Eyeo isua akirworo alyokonu, elimununio ŋakiro ŋuna ka alyokonu ŋuna eya lotai kosi.

¹⁴Neriŋa jik isua irworoe ŋuna ka akiyookino ka alwaketa aneni kosi ŋuna ka akiyookino, anerae edoŋo kwap alorotin a ŋulu ke etaun ŋakiro ŋuna a kire, emam akiwuapit ŋuna iyookino alotooma etaun.

¹⁵Emam ŋakiro ŋuna a kire, isicaneneo ituŋanan daadaŋ ŋini nyimyekini akitiya aronis. Adau Ekapolon akiŋolikin ŋakiro ŋun, ido abu nyelakar iŋolikini atemar nyetubio ŋakiro anakiyookino.

¹⁶Abu Ekapolon kiŋolik atemar emam ituŋanan epedori, abu iŋes tonyunyur iŋolikini atemar emam ituŋanan iŋarakini ŋulu isicanitae; aŋun, abu iŋes a apedor keŋ yau aiuno aŋuna keŋ ka abu akiyookino keŋ kiŋarak iŋes.

¹⁷Abu iŋes tonap akiyookino ikwa arapet ka aiuno ikwa akopiya ŋina iuryarit akou nyewana; abu iŋes tonap ŋilowi ŋulu ka akinyaŋar, ido abu kimuko akuwan keŋ anainakina esibit ekaaso imukokina.

¹⁸Isicani iŋes ŋimoe keŋ lopite ŋolo eyakatar ŋiticisyo ŋulu itiyato ikes; enyunyurikin iŋes ŋimoe keŋ, isicani iŋes ŋimoe keŋ, isicani iŋes ŋulu iboiyete alodiyete anam.

¹⁹Aŋun, itopoloorete ŋulu iboiyete alo To ekiro a Ekapolon; itopoloorete ŋulu iboiyete alo Kide apolou Ekapolon, anerae ebuni iŋes esibit akalele ŋina inuta nooi, ŋina erae apedor a Ekapolon inutar nooi.

²⁰Ebuni iŋes Sion ikwapei Ekalakunan, ebuni iŋes neni a ŋiletok a Yakob a ŋulu imyekinete abilibil ŋikisila.

²¹Alimu Ekapolon ebe, “Erae na acamunet kaŋ ka ikes. Ameun tokona tari ŋikaru ka ŋikaru, etau kaŋ ŋolo eyai neni kus ka ŋakiro kaŋ ŋuna ewuak ayoŋ nakituka kus, nyiyotorete anakituka kus, kori anakituka a ŋidwe kus, kori anakituka a ŋidwe kec.”