Read ngakarimojong Isa. 6 Bible Online

Isa. 6 - ngakarimojong bible

Isa. 6

¹Alokaru a ŋolo atwania erwosit Usia, abu ayoŋ eŋolik Ekapolon iboi alokicoloŋ keŋ a ŋolo ka apukan, ikiara ka itopolooritae, ileleba ekaaso keŋ Kai ka Akuj daadaŋ.

²Ayakasi kidiama Ekapolon ŋisubuna ŋulu a ŋabebenuk ŋulu eteete iŋes, ayakatar ŋisubuna ŋul ŋabebenuk ŋakanikapei; ŋaarei ŋuna emukorito ereet ka ŋaarei ŋuna emukorito ŋakejen ta ŋaarei ŋuna aporyoto.

³Anyarasi ŋisubuna ŋul ebasi, “Eseg, eseg eseg Ekapolon ŋolo a ŋajoresyo, ileleba apolou keŋ akwap daadaŋ.”

⁴Aŋuna ke ecelet a ŋisubuna a ŋul, apotu ŋipirin alopuke a Akai tomaranikis, ido kilelebikin apuru Kai.

⁵Otema nai ayoŋ, “Oitakoi! Acakar bare ca, anerae arae ayoŋ ituŋanan ŋini nyerworo ŋakiro ŋuna ajokak ka ikiboi ayoŋ ka ŋituŋa ŋulu nyirworosi ŋakiro ŋuna ajokak, nai adau ayoŋ akiŋolikin erwosit, Ekapolon ŋolo a ŋajoresyo!”

⁶Abu nai epei a ŋisubuna a ŋulu erimokinito Ekapolon kidiŋ toporu neni ayai ayoŋ etiŋit atotole ŋina anepi ŋina keriŋa elemunio anamuroet a aridet a ŋatotol.

⁷Abu esubuna ŋol totap a aridet akituk kaŋ tema, “Ikwapei atapya aridet na ŋipon kon, nyeriŋa iyoŋ iyakar ekaile ka ikimookun iyoŋ anasecit kon.”

⁸Ekaku abu ayoŋ eira etoil ke Ekapolon iŋita ebala, “Ŋae eyakiyari ayoŋ, ŋae epedori alosit aŋuna kosi?” Abu nai ayoŋ oboŋok otema, “Ayoŋ lo, kiyakiyarae ayoŋ.”

⁹Okolimok nai Ekapolon ayoŋ tema, “Ape tolimok ŋituŋa ŋul atemar, ‘Iirarete ŋina erae akiirar, nai nyiyenunete; iŋolikinete ŋina erae akiŋolikin, nai nyianyunete.’

¹⁰Kitabaŋaan ŋituŋa ŋul, kitikiŋiman ikes ka kitumudukan ikes, ikotere ikes nyiŋolikis ka nyiirasi ka nyeyenut anatameta kec, ido toboŋut neni kaŋ akitaŋaleuno.”

¹¹Abu nai ayoŋ eŋit iŋes otema, “Okoe Ekapolon, tari ori itiyasi ŋun?” Okoboŋok iŋes ayoŋ tema, “Tari ŋina eruworotor ŋitaunio kec ŋireŋoroto, todaun ŋituŋa iboiyete alotooma kec ka tooma ŋakais kec daŋ, tomamukaun ŋituŋa iboiyete, ido toruwor akwap kec ekasile nooi.

¹²Itiyakin ŋun akitodol ŋina iritarya Ekapolon ŋituŋa daadaŋ neni alwanan, ido toruwor akwap nenilala ŋina emam ŋituŋa.

¹³Tari kidoŋ ituŋanan ipei alotooma ŋitomon nakwap earyo ŋini daŋ ikwaanikin iŋes ka apuŋure a ekwaakwaa, kori ŋina a ekuyon ŋina idoŋi kedaun ayepar ekitoe.” Apuŋure ŋin erae akisyakinet ŋina kitete ŋina a ŋituŋa a ŋulu ka Akuj.