Read ngakarimojong Isa. 62 Bible Online

Isa. 62 - ngakarimojong bible

Isa. 62

¹Nyeliliŋi ayoŋ aŋuna a Sion ka nyeeŋuni ayoŋ aŋuna a Yerusalem erworo ayoŋ akitodol ŋina ileereunio akiyookino kec lopite ŋolo ileereunio akica iwalari akwap, akitodol ŋina ileereunio aiuno kec lopite ŋolo ecaunia atoc.

²Iŋolikinete ŋituŋa a ŋakwapin akiyookino kus ka iŋolikinete ŋirwosi daadaŋ apolou kus, ido ikinyarao iyes a ekiro a ŋolokitete a ŋolo elimuni Ekapolon.

³Ikwaanikinosi iyes ibusak aneni a Ekapolon ka ekaboboot, ikwaanikinosi iyes ibusak aneni ka Akuj kus ka amoru ŋina epol egyelit ŋina enapito ŋirwosi.

⁴Nyeriŋa nabo etemaryo iyes irae ŋulu ikiesikinitae ka nyeriŋa nabo akwap kus erae ŋina asilon. Nai ikinyarao iyes ŋituŋa ŋulu elakara Akuj aŋuna kec ka ikwaanikin akwap kus ka aberu ŋina iisitae, anerae elakara Ekapolon aŋuna kus ka ikwaanikin akwap kus ka aberu ŋina iisitae.

⁵Ikwaŋina iisya esorokit apese, iyoŋ daŋ Yerusalem iruwor akibois a ŋituŋa a ŋulu ikidukunete iyoŋ ka ikwaŋina elelyania eteran aŋuna ka ateran, elelyani Akuj kon daŋ aŋuna kon.

⁶Okoe Yerusalem, ewuak ayoŋ ŋikererok narwatatain kon, nyililiŋete ikes naparan ka nakwaare. Iyes ŋikererok anarwatatain ŋulu inyarito Ekapolon, nyieŋut

⁷ka nyisieŋut iŋes daŋ akitodol ŋina esubakinia iŋes Yerusalem kituruwo etaun ŋolo arwon anakwap a daadaŋ.

⁸Adau Ekapolon akikoŋ anakiloun keŋ ka anapedor keŋ a ŋina etiron ebe, “Nyainakini nabo ayoŋ ŋikinyom kus toruwor akimuj a ŋimoe kus, nyemasete ŋituŋa ŋulugelae epiini ŋolo itaunete iyes.

⁹Nai ikes ŋulu elemete ŋikinyom ŋul, enyamete, ido kipuro Ekapolon ka ikes ŋulu egerete ŋaraito a epiini kec, emasete epiini ŋol analapatui kaŋ a ŋuna asegak.

¹⁰“Tolomasi alopukei, tosubakisi erot aŋuna a ŋituŋa kus, kitemokisi, kitemokisi erukude, tolemasi ŋamoru a nen, kikyaasi abendera kiŋolikis ŋituŋa a ŋakwapin.

¹¹Eserak Ekapolon ŋituŋa a akwap daadaŋ ebe, ‘Tolimokisi ŋituŋa a Sion atemar ebunit Ekapolon aiun iyes, eyaunit iŋes ŋituŋa ŋulu adau iŋes aiun.’

¹²Enyarao ikes, ‘Ŋituŋa ŋulu ka Akuj, ŋituŋa ŋulu alakuni Ekapolon,’ ido enyarao Yerusalem, ‘Etaun ŋolo apolon ŋolo emina Ekapolon. Etaun ŋolo eyakasi ŋituŋa.’ ”