Read ngakarimojong Isa. 9 Bible Online

Isa. 9 - ngakarimojong bible

Isa. 9

¹Kikote neni daŋ, nyeyakaun akiyaloloŋ neni a ŋulu sek eryebasi. Alorwa a ŋulu a ekiŋaren aponi tojamuwarae ŋituŋa a akwap a Sebulon ka ŋulu a akwap a Naputali, nai alorwa a ŋulu eponito itopolooryo Galileya akwap ŋina a ŋituŋa a ŋakwapin. Epoloor iŋes aŋuna ke erot a ŋolo itorunit diyete anam Mediteranian ka aŋuna ke erot a ŋolo alokekwaye Yorodan.

²Eŋolikis ŋituŋa ŋulu sek ayakasi nakiryonut akica ŋina apolon. Acaiki akica ŋituŋa ŋulu sek eboiyete anakiryonut a ŋinakiryonon cuc.

³Itipitu iyoŋ ŋituŋa a akwap, iyatak iyoŋ alelyanu kec. Elelyanete ikes alokiŋaren kon lopite ŋolo elelyanere apaki ŋina elemere, lopite ŋolo elelyaniata ŋituŋa ekorete ŋiboro ŋulu eŋatunete,

⁴anerae ikwapei akoloŋit ŋina aponere kilounere Ŋimidian, ilema iyoŋ ŋican ŋulu aryamunito ŋituŋa kon, ilema iyoŋ ŋituŋa ŋulu esicanito ŋituŋa kon ta aryenyeo ŋina a ŋulu esicanito ŋituŋa kon.

⁵Inokere akim ŋamuk a ŋikajiok a daadaŋ a ŋulu aloseneneete lojie kaapei ka ŋilowi kec daadaŋ ŋulu irwasito ŋaokot.

⁶Edoun ikoku aŋuna yok, ikiinakin iwon ikoku ŋinisapat, eruwor iŋes ekepukan, enyarao iŋes, “Ekesirworiunan ŋolo ajokan nooi, Akuj ŋina etiron, Papa ŋolo a ŋikaru ka ŋikaru, Ekapolon a ekisil.”

⁷Erubakini apedor keŋ iyata jik, ido eyakaun ekisil ŋoloruba napukan keŋ, ilunyokin iŋes lokicoloŋ a Daudi kipuka, itogogoŋi iŋes apukan keŋ, anakitub ŋakiro eriyan ka anakiyookino ameun alorwa a lu tari ŋikaru ka ŋikaru elelakinit Ekapolon ŋolo a ŋajoresyo akitiyakin ŋun.

⁸Abu Ekapolon kiyakiya akirot neni a ŋiletok a Yakob, ido abu akirot ŋin kitiyakin neni a Ŋisirael

⁹ka apotu ŋituŋa daadaŋ toyenut akirot ŋin, apotu ŋituŋa a Epuraim ka ŋituŋa ŋulu eboiyete alo Samaria toyenut ŋun, nai anakituro ka anakisupa a ŋitai kec apotu ikes temasi,

¹⁰“Aritaun ŋamatapali anaduketa, nai ikiduki isua nabo a ŋamoru a ŋuna icietae ejok. Aukokin ŋikiya kwap, nai ilunyokinio isua nen ŋikito a Cedar.”

¹¹Aŋun, abu Ekapolon kitonyou ŋimoe aŋuna kec ka abu kitaŋatak ŋimoe kec lu:

¹²Ŋiarameani alowae a ŋolo alo Kide ka Ŋipilistin alowae a ŋolo alo To. Apotu ŋul tomunyasi Ŋisirael tari kitiyakina ŋun, eriŋa Ekapolon eŋoikinit Ŋisirael, eriŋa iŋes erubakinit isicani ikes.

¹³Tari ŋina esicania Ekapolon ŋituŋa a Isirael nyekiwa ikes ka nyeboŋoro neni a ŋolo abu kisican ikes, kori nyiwara Ŋisirael Ekapolon ŋolo a ŋajoresyo.

¹⁴Aŋun, abu Ekapolon tomunya alo Isirael ŋikapolok ka ŋulu nyerae ŋikapolok, abu tomunya ŋulu agogoŋok ka ŋulupalag. Abu Ekapolon kitiya ŋun, akoloŋit apei,

¹⁵Anyaritae ŋikasikou ka ŋikapolok akou a ŋituŋa, anyaritae ŋikadwarak ŋulu etatamete alyokonu kaku a ŋituŋa,

¹⁶anerae apotu ŋulu sek epukato ŋituŋa lu kitooliyosi ikes ka apotu ŋituŋa ŋulu epukatae ikes nyeyenut ŋuna emaikina kitiyata.

¹⁷Ŋakiro ŋun abunio Ekapolon nyisyon ŋisorok kec, kori nyisyonik ŋikokyok ka ŋapesur alotuŋa a ŋul, anerae pa ewuapito ŋituŋa daadaŋ ŋuna ka Akuj ka arae ŋulu etiyaete ŋuna aronok, erworosi ŋituŋa daadaŋ ŋakiro ŋuna ka abaŋao. Tari kitiyakina ŋun, eriŋa Ekapolon eŋoikinit Ŋisirael, eriŋa iŋes erubakinit isicani ikes.

¹⁸arirae aronis a ŋituŋa a ŋul ekwaan ka akim ŋina enomi amoni a ŋikukwa. Arirae aronis kec esibit akim ŋina enomi amoni ŋina irijija, akim ŋina eremi kidiama kikok apuru keŋ edou.

¹⁹Aŋuna ka aŋoit a Ekapolon a ŋolo a ŋajoresyo, abu akim tonomiya akwap, kikwaanikin ŋituŋa ka ŋakito ŋuna inokere akim, mam ituŋanan abu toesik ŋinice.

²⁰Iudaete a ŋakan kec aŋuna aloteten nai erubakini akoro enyamit, imujete ŋituŋa a ŋakan kec a ŋuna alokedyeny nai nyimwokete. Enyami ŋinituŋanan akuwan a ituŋanan keŋ pei.

²¹Emunyarete ŋituŋa a Epuraim ŋulu a Manase ka emunyarete ŋituŋa a Manase ŋulu a Epuraim, itijiete ŋuluarei ŋul Yudaya. Tari kitiyakina ŋun, eriŋa Ekapolon eŋoikinit Ŋisirael, eriŋa iŋes erubakinit isicani ikes.