Read ngakarimojong Ŋilep. 1 Bible Online

Ŋilep. 1 - ngakarimojong bible

Ŋilep. 1

¹Abu Ekapolon tonyarau Moses, kirwor neni keŋ aloeema a ŋolo elipere tema,

²“Tolimok Ŋisirael ebe, ‘Ani eyauni idio kus ainakinet alobaren keŋ neni ke Ekapolon, emaikina tolemu alosipan a ŋaatuk keŋ, kori a ŋakinei keŋ.’”

³Ani kerae ainakinet ŋin ŋina epeyo ŋina elemunitae alosipan a ŋibaren, emaikina iŋes tolemu etaok ŋolo ajokan ŋolo emam neni eŋwalit; yau lopuke ŋolo ke eema a ŋolo ilipere, ikotere Ekapolon ecamuni aŋuna keŋ ibarasit ŋin.

⁴Emaikina ituŋanan ŋin kidokok akan keŋ nakou ka ainakinet a ŋina epeyo a ŋin, ikotere Ekapolon ecamuni ainakinet ŋin tomookunere iŋes asecit keŋ.

⁵Emaikina ituŋanan ŋin toar ibarasit ŋin a nen, tosodo nai ŋidwe ka Aron ŋulusapa ŋulu erae ŋisacaradotin tolemut ŋaokot, yaasi kipakakis lowaetin daadaŋ anamuroet a ŋina eyai lopuke ŋolo elomarere loeema ŋolo ilipere.

⁶Emaikina ituŋanan ŋin toyeŋ ainakinet ŋin ŋina epeyo, ido kileny ibarasit.

⁷Emaikina ŋidwe ka Aron ŋulusapa ŋulu erae ŋisacaradotin kinokakis akim kidiama namuroet, kinapinapakis ŋakito nakim.

⁸Emaikina nai ŋidwe ka Aron ŋulusapa ŋulu erae ŋisacaradotin tolemununut ŋakir kinapanakis, tolemut akou ka asepwae daŋ kiwuakis nakito ŋuna enepete alokidiama namuroet.

⁹Nai emaikina ŋini elemunit ainakinet ŋin, kilota ŋiboro ka akook a ibarasit kaapei ka ŋimolokony; ido emaikina esacaradoti kicuny ibore ŋin daadaŋ alokidiama amuroet, anerae erae iŋes ainakinet ŋina epeyo, ŋina ebob eure keŋ aneni ke Ekapolon.

¹⁰Ani kerae ainakinet ŋin ŋina epeyo ŋina elemunitae alosipan a ŋakinei, a ŋamesekin, kori a ŋamee, emaikina tolemunae ibarasit ŋinimoŋ ŋini ajokan ŋini emam neni eŋwalit.

¹¹Emaikina ibarasit ŋin toarae alo Kuju namuroet alokiŋaren Ekapolon, tosodo nai ŋidwe ka Aron ŋulusapa ŋulu erae ŋisacaradotin, tolemut ŋaokot, kipakakis lowaetin daadaŋ anamuroet.

¹²Emaikina ibarasit ŋin kilenyae, tolemunae akou ka asepwae, ido kinapanak esacaradoti akiriŋ ŋin nakito ŋuna enepete alokidiama namuroet;

¹³nai ŋiboro ka akook a ibarasit kaapei ka ŋimolokony, emaikina kilotarae; ido emaikina esacaradoti kicuny ibore ŋin daadaŋ alokidiama namuroet, anerae erae iŋes ainakinet ŋina epeyo, ŋina emaikina ebob eure keŋ aneni ke Ekapolon.

¹⁴Ani kerae ainakinet kon ŋina epeyo ŋin neni ke Ekapolon ŋin ikenyit, emaikina iyoŋ toseu ainakinet kon ŋin erae akuri, kori temeleudi.

¹⁵Emaikina esacaradoti yau ikeny ŋin namuroet, tomojir akou totubo, ido kicuny anamuroet; ido emaikina ŋaokot a ikenyit a ŋin kitiitakinae epeiwae namuroet.

¹⁶Emaikina ituŋanan ŋini eyaunit ainakinet ŋin tolema aŋalube nyepunoro, kimasak lowae ŋolo alo Kide namuroet, nakibois ŋina emudio ekuron.

¹⁷Emaikina ituŋanan ŋin totero ŋabebenuk a ikenyit a ŋin, ido kibel alokuyoit, nai nyetubo ŋabebenuk. Emaikina nai esacaradoti kicuny ikenyit ŋin alokidiama namuroet, anerae erae iŋes ainakinet ŋina epeyo, ŋina ebob eure keŋ aneni ke Ekapolon.