Read ngakarimojong Ŋilep. 11 Bible Online

Ŋilep. 11 - ngakarimojong bible

Ŋilep. 11

¹Tema Ekapolon neni a Moses ka Aron,

²“Tolimokisi Ŋisirael ebe, ‘Alotooma ŋityaŋ daadaŋ ŋulu eya nakwap, ŋityaŋ ŋulu ipedorete iyes akinyam ikes lu:

³Tonyama etyaŋ daadaŋ ŋolo erae ŋigece ŋiarei ŋolo iyerununui akimuj keŋ kinyadot.

⁴“‘Nai alotooma ŋulu iyerununeete akimuj kec kinyadoto, kori ŋulu erae ŋigece kec ŋiarei, nyinyama lu: Ekaal, anerae tari daŋ kiyerununui akimuj keŋ kinyadot, nyerae ŋigece keŋ ŋiarei; erae iŋes ŋolo itoroniyaritae aŋuna kus.

⁵Nyinyama aduka, anerae tari daŋ kiyerununui akimuj keŋ kinyadot, nyerae ŋigece keŋ ŋiarei; erae iŋes ŋina itoroniyaritae aneni kus.

⁶Nyinyama apoo, anerae tari daŋ kiyerununui iŋes akimuj keŋ kinyadot, nyerae ŋigece keŋ ŋiarei; erae iŋes ŋina itoroniyaritae aŋuna kus.

⁷Nyinyama eguruye, anerae tari daŋ kerae ŋigece keŋ ŋiarei, nyiyerununui akimuj keŋ kinyadot; erae iŋes ŋolo itoroniyaritae aneni kus.

⁸Nyemaikina iyes tonyama akiriŋ a ŋityaŋ a ŋul, kori totapa ŋawat kec kedaut atwakare; erae ikes ŋulu itoroniyaritae aneni kus.

⁹“‘Alotooma ŋisubuna daadaŋ ŋulu eya nakipi ŋuna a ŋanamyo ka ŋuna a ŋaŋololin, ipedorete iyes akinyam ŋulu eyakatar ŋibebenuk ka ŋakabebekwa.

¹⁰Nai ŋisubuna daadaŋ ŋulu eya nakipi ŋuna a ŋanamyo ka ŋuna a ŋaŋololin, ŋulu nyeyakatar ŋibebenuk, kori ŋakabebekwa, ŋulu elyato anakipi ka ŋisubuna daadaŋ ŋulu iboiyete anakipi. Erae ikes ŋulu ikitaleo iyes akinyam, kori akitap.

¹¹Aŋun emaikina iyes torubakis pa inyamete ikes, nyinyama akiriŋ kec, kori nyitapa ŋawat kec kedaut atwakare.

¹²Nyemaikina iyes tonyama ibore daadaŋ ŋini eyai nakipi, ŋini nyeyakatar ŋibebenuk, kori ŋakabebekwa.

¹³“‘Nyemaikina iyes tonyama ŋikeny lu; anerae erae ikes ŋulu asiilyanak: Ŋigolei, ŋataruk, ŋigolei ŋulu a ŋapooe,

¹⁴Ŋiculya ŋulu a ŋikabilae a daadaŋ;

¹⁵Ŋikurukwa ŋulu a a ŋikabilae a daadaŋ;

¹⁶Ŋikaleeso, atanawi ŋulu eporete nakwaare, ŋigolei ŋulu ekopete ŋilelem ananamyo, ŋigolei ŋulu a ŋikabilae a daadaŋ;

¹⁷Ŋitulae ŋulu cicik, ŋataruk ŋuna enyaritae atanatuŋa, ŋitulae ŋulu apolok,

¹⁸Ŋaboŋia, ŋitulae ŋulu ka aloŋisat, ŋataruk ŋuna enyaritae atatoŋole.

¹⁹Ŋacolikokoi, ŋautomiryo ŋuna a ŋikabilae a daadaŋ, ŋimenwa ka ŋikyeny ŋulu a ŋimoru ŋulu esibito ŋikokoroi.

²⁰“‘Nyinyama ŋisubuna daadaŋ ŋulu eporete tolosete a ŋakejen a ŋaomwon.

²¹Nai alotooma ŋisubuna ŋulu eporete tolosete a ŋakejen a ŋaomwon, eyakasi ŋulu emaikina iyes tonyama, tonyama ŋulu eyakasi ŋakilenyet nakejen kec, ŋakejen ŋuna eporyoto ikes.

²²Alotooma ŋisubuna ŋul, tonyama ŋikabilae a emaase daadaŋ, ŋikabilae a ŋabeerei a ŋuna alibak toburok daadaŋ, ŋikabilae a ŋikajiiri daadaŋ ka ŋikabilae a ŋabeerei daadaŋ.

²³Nai ŋisubuna ŋuluce daadaŋ ŋulu eyakatar ŋabebenuk ka ŋakejen ŋaomwon, nyemaikina iyes tonyama.

²⁴“‘Iruworosi iyes ŋulu ikitoroniyaritae alotooma ŋakiro nu: Ituŋanan daadaŋ ŋini etapi akuwan ke etyaŋ, kori a ibarasit a ŋini adau atwanare, a ŋini italeo iŋes akitap, eruwor ŋin ŋini itoroniyaritae akitodol eboŋ.

²⁵Ituŋanan daadaŋ ŋini elemuni ekiner edio alotyaŋ a lu kori alobaren a lu, emaikina ituŋanan ŋin kilota ŋilowi keŋ, ido erubakini erae ŋini itoroniyaritae akitodol eboŋ.

²⁶“‘Etyaŋ daadaŋ, kori ibarasit daadaŋ ŋini erae ŋigece ŋiarei, nai nyetyakak ileerete, kori nyiyerununui akimuj keŋ kinyadot, erae ŋini itoroniyaritae aneni kus, ido ituŋanan daadaŋ ŋini etapi etyaŋ, kori ibarasit ŋin itoroniyaritae aneni kus,

²⁷ŋityaŋ daadaŋ ŋulu elosete a ŋakejen a ŋaomwon, toyakatar ŋimoyo, itoroniyaritae aneni kus. Ituŋanan daadaŋ ŋini etapi ŋawat a ŋul kedaut atwakare, eruwor ŋini itoroniyaritae akitodol eboŋ.

²⁸Ituŋanan daadaŋ ŋini elemuni akuwan a etyaŋ kori a ibarasit a ŋin kedau atwanare, emaikina kilota ŋilowi keŋ, ido erubakini ituŋanan ŋin erae ŋini itoroniyaritae akitodol eboŋ erae ŋawat a ŋityaŋ a ŋul, kori a ŋibaren a ŋul ŋuna itoroniyaritae aŋuna kus.

²⁹“‘Alokidiŋ ŋisubuna ŋulu elosete alokwap, erae lu ŋulu itoronitae aŋuna kus: Ŋinyuruyo, ŋisolimae, ŋanakanaka ŋuna a ŋolokabila,

³⁰ŋikiboboi, ŋakinyaŋa, ŋageregerya, ŋageregerya ŋuna eminasi nasinyon ka ŋagaae.

³¹Erae ŋul ŋulu itoroniyaritae aŋuna kus alokidiŋ ŋisubuna ŋulu elosete alokwap daadaŋ; ituŋanan daadaŋ ŋini etapi ŋawat a ŋul kedaut atwakare, eruwor ŋini itoroniyaritae akitodol eboŋ.

³²Ani kimasakin edio alosubuna a ŋul nibore idio etwanit, eruwor ibore ŋin ŋini itoroniyaritae, kerae loborosit ŋolo icieunitae anakitoe, kori elou, kori ejamu, kori eguniya, eborosit ca daadaŋ ŋolo isitiyao a ŋakiro a ŋadi; emaikina eborosit ŋol kilumokinae nakipi; ido erubakini erae ŋolo itoroniyaritae akitodol eboŋ, toruwor nai ŋolo nyitoroniyaritae.

³³Ani kimasakin edio alosubuna a ŋul loborosit edio ŋolo eyeunitae ke ecoto, eruwor ibore daadaŋ ŋini eyai loborosit ŋol ŋini itoroniyaritae, ido emaikina tobwaŋae eborosit ŋol.

³⁴Itoronio akimuj daadaŋ ŋina ebukokin ŋakipi ŋuna sek aya loborosit ŋol; itoronio ŋimaten daadaŋ ŋulu sek aya loborosit ŋol.

³⁵Itoronio ibore daadaŋ ŋini enyilakin ekiner edio a ŋisubuna a ŋul a ŋini etwanit, kerae ekeno, kori amot ŋina ipoere, emaikina tobwaŋabwaŋaarae, erae ikes ŋulu itoroniyaritae, ido erubakinete erae ŋulu itoroniyaritae aŋuna kus.

³⁶Nai ani kerae lolelya, kori kare neni eya ŋakipi ecakakin akuwan a esubuna a idio a ŋini etwanit, erubakini elelya, kori akare pa itoroniyaritae, nai ibore daadaŋ ŋini etapakin akuwan a isubuna a ŋin a idio a ŋini kimasakin nakipi, eruwor ibore ŋin ŋini itoroniyaritae.

³⁷Ani kenyilakin ekiner a ibore a ŋini atwan a ŋin edio lokinyom ŋidi ŋulu iŋadatae erae aet, mam nyitoronio ŋikinyom ŋul;

³⁸nai ani kebukokin ŋakipi lokinyom, ido tonyilakin ekiner a isubuna a ŋini atwan a ŋin, eruwor ŋikinyom ŋul ŋulu itoroniyaritae aŋuna kus.

³⁹“‘Ani ketwana etyaŋ edio ŋolo emaikina sek iyes tonyama, ido totap ituŋanan idio etyaŋ ŋol, eruwor ituŋanan ŋin ŋini itoroniyaritae akitodol eboŋ.

⁴⁰Emaikina ŋituŋa ŋulu enyamete etyaŋ ŋol kilotasi ŋilowi kec, ido erubakinete ikes erae ŋulu itoroniyaritae akitodol eboŋ; ŋulu iwokete akiriŋ a etyaŋ a ŋol, emaikina ŋul daŋ kilotasi ŋilowi kec, ido erubakinete erae ŋulu itoroniyaritae akitodol eboŋ.

⁴¹“‘Itoroniyaritae aŋuna kus ŋisubuna daadaŋ ŋulu cicik ŋulu elosete alokwap nyemaikina iyes tonyama ikes.

⁴²Ibore daadaŋ ŋini elyat a akook ka ŋini elosi a ŋakejen a ŋaomwon, kori ŋini eya ŋakejen ŋuna alalak, ŋisubuna daadaŋ ŋulu elosete alokwap ŋulu cicik, nyemaikina iyes tonyama; anerae itoroniyaritae ikes aŋuna kus.

⁴³Nyituruwosi ŋipi kus ŋulu itoroniyaritae aŋuna itanyamyata iyes ikes ŋisubuna ŋulu cicik ŋulu elosete alokwap; nyimunaarosi kaapei ka ikes, ido toruworos ŋulu ikitoroniyaritae.

⁴⁴Arae ayoŋ Ekapolon Akuj kus; aŋun, kitaleutu ŋawat kus, toruworos ŋulu isegak, anerae aseg ayoŋ. Nyimunaarosi anakinyam, kori anakitap ŋisubuna ŋulu elosete alokwap.

⁴⁵Arae ayoŋ Ekapolon ŋolo abu okoyau iyes eketipeunio anakwap a Ijipit, ikotere oruwor Akuj kus; aŋun, toruworos ŋulu isegak, anerae aseg ayoŋ.

⁴⁶“‘Erae ŋul ŋikisila aŋuna a ŋityaŋ, kori a ŋibaren, a ŋikyeny, ŋinibore a daadaŋ a ŋini eyai nakipi, kori elosi anakipi ka a ŋisubuna a daadaŋ a ŋulu elosete alokwap.

⁴⁷emaikina iyes toyenut ŋulu itoroniyaritae ka ŋulu nyitoroniyaritae, ido toyenutu daŋ ŋisubuna ŋulu eyarete ŋulu emaikina tonyama ka ŋulu nyemaikina tonyama.’ ”