Read ngakarimojong Ŋilep. 13 Bible Online

Ŋilep. 13 - ngakarimojong bible

Ŋilep. 13

²“Ani keyakaunotor ituŋanan idio neni ebuunit anakuwan, kori neni ekuram anakuwan, kori kileereu neni eŋolyaana anamuny a akuwan keŋ, ido toruwor ibore ŋin atapon, emaikina ituŋanan ŋin yaunae neni ka Aron ke esacaradoti, kori neni ke epei a ŋidwe keŋ a ŋulusapa a ŋulu erae ŋisacaradotin.

³Emaikina esacaradoti kisyeme neni eyai edeke ŋolo eyai namuny akuwan a ituŋanan a ŋin, ani kekwaŋunito ŋajul ka akuwan ŋuna eya neni elomunitor edeke ŋol, ido kicukuliyoro amuny aneni eyai edeke ŋol, erae edeke ŋol ŋolo etapaana anamuny ka a akuwan. Ani kedau esacaradoti akisyeme ituŋanan ŋin, elimori atemar alotooma ekisil, itoroniyaritae ituŋanan ŋin.

⁴Nai ani kekwaŋ ibore ŋini eyai nakuwan keŋ ŋin, ido nyicukuliyoro anamuny ka akuwan ka nyekwaŋak ŋajul ka a akuwan ŋuna eya neni elomunitor edeke, emaikina esacaradoti toseta ituŋanan ŋin neni keŋ bon ŋirwa ŋikanikaarei.

⁵Ani epete ŋirwa ŋikanikaarei, isyeme nabo esacaradoti ituŋanan ŋin, ani keryamu atemar nyiyatakina ibore ŋin, ido nyemino iwace anamuny ka akuwan, emaikina iŋes toseta ituŋanan ŋin neni keŋ bon ŋirwa ŋice ŋikanikaarei.

⁶Ani epete ŋirwa ŋikanikaarei, isyeme nabo esacaradoti ituŋanan ŋin, ido ani keiniyarit ibore ŋin ka pa keminit iwace anamuny ka akuwan, elimori esacaradoti atemar emam ŋuna eronia ituŋanan ŋin; erae edeke ŋol akisorit koŋin. Emaikina nai ituŋanan ŋin kilota ŋilowi keŋ, toruwor alotooma ekisil ŋini nyitoroniyaritae.

⁷Nai ani kielakin edeke ŋol namuny ka akuwan keŋ, ekaku kisyeme esacaradoti iŋes aŋuna ka alimor atemar emam ŋuna itoronitere ituŋanan ŋin, emaikina ituŋanan ŋin toboŋo neni ke esacaradoti.

⁸Emaikina esacaradoti kisyeme iŋes, ani kielakina edeke ŋol namuny ka akuwan keŋ, emaikina esacaradoti tolimo atemar alotooma ekisil, itoroniyaritae ituŋanan ŋin; erae edeke ŋol ŋolo etapaana.

⁹“Ani kedyakakin ituŋanan idio edeke ŋolo etapaana anamuny ka akuwan, emaikina yaunae ituŋanan ŋin neni ke esacaradoti.

¹⁰Isyeme esacaradoti ituŋanan ŋin, ido ani keyai neni ekwaŋ neni ebuunit anamuny ka akuwan keŋ, neni kitokwaŋia ŋajul aneni elomunitor edeke ŋol ka keyai neni ilebulebunit a nen,

¹¹erae edeke ŋol ŋolo etapaanu ŋolo kelom nakuwan apaki ŋina aoyan. Emaikina esacaradoti tolimo atemar alotooma ekisil, itoroniyaritae ituŋanan ŋin; nyemaikina esacaradoti toseta ituŋanan ŋin neni keŋ bon aŋuna itoronitere iŋes.

¹²Ani kelomu edeke anakuwan a ituŋanan toburusiya amuny ka akuwan daadaŋ ŋinapei anakou tari nakejen nenidapal, lopite ŋolo eŋolikina esacaradoti,

¹³emaikina kisyeme esacaradoti ituŋanan ŋin, ani kiburusiyarit edeke akuwan daadaŋ, emaikina iŋes tolimo atemar mam ŋuna itoronitere ituŋanan ŋin aŋuna akwaŋunia akuwan keŋ daadaŋ, erae iŋes ŋini nyitoroniyaritae.

¹⁴Ani nai ketakanu neni ilebulebunit anakuwan keŋ, eruwor ituŋanan ŋin ŋini itoroniyaritae.

¹⁵Isyeme esacaradoti neni ilebulebunit, ido tolimo atemar erae ituŋanan ŋin ŋini itoroniyaritae. Erae ibore ŋini ilebulebunit ŋin ŋini itoroniyaritae, erae edeke ŋolo etapaana.

¹⁶Ani nai kilocokin ibore ŋini ilebulebunit ŋin tokwaŋu, emaikina ituŋanan ŋin tolot neni ke esacaradoti.

¹⁷Emaikina esacaradoti kisyeme ituŋanan ŋin, ani kekwaŋunito ŋiboorei ŋulu ilebulebunito anakuwan keŋ, emaikina esacaradoti tolimo atemar mam ŋuna itoronitere iŋes. Erae iŋes ŋini nyitoroniyaritae.

¹⁸“Ani keyai sek elepunoit nakuwan a ituŋanan ŋolo kebu toiyo,

¹⁹ido tobu ibore ice ŋini akwaŋan, kori ŋin ereŋiyarit aneni sek ayai elepunoit, emaikina ituŋanan ŋin tolot neni ke esacaradoti.

²⁰Emaikina esacaradoti kisyeme ibore ŋin, ido ani kicukuliyoro amuny ka akuwan aneni eyai edeke ŋol, tokwaŋak ŋajul ŋuna eya nen, emaikina esacaradoti tolimo atemar itoroniyaritae ituŋanan ŋin. Erae edeke ŋol ŋolo etapaana ŋolo ka amuny ka akuwan ŋolo kelomu aneni sek ayai elepunoit.

²¹Nai ani kisyeme esacaradoti toryamu atemar nyekwaŋak ŋajul ŋuna eya neni elomunitor edeke ŋol ka daŋ nyicukuliyoro ibore ŋin anamuny ka akuwan, nai anyisiwa, esetari esacaradoti ituŋanan ŋin neni keŋ bon ŋirwa ŋikanikaarei.

²²Ani kielakin edeke ŋol namuny ka akuwan, emaikina esacaradoti tolimo atemar itoroniyaritae ituŋanan ŋin, erae edeke ŋol ŋolo etapaana.

²³Nai ani kerubaki edeke ŋol eyai nenipei sek ayai, ido nyielakin nakuwan, erae ca apores ŋina ke elepunoit, emaikina esacaradoti tolimo atemar mam ŋuna itoronitere ituŋanan ŋin.

²⁴“Kori ani keyai sek apores nakuwan a ituŋanan, ido kilebulebu ibore a nen ŋini ereŋ tokwaŋiyarite, kori tokwaŋ,

²⁵emaikina esacaradoti kisyeme ibore ŋini ilebulebunit ŋin. Ani kekwaŋunito ŋajul ŋuna eya neni ilebulebunit nen, ido kicukuliyoro nen, erae edeke ŋol edeke ŋolo etapaana; elomunit anapores. Emaikina esacaradoti tolimo atemar itoroniyaritae ituŋanan ŋin. Erae edeke ŋol ŋolo etapaana.

²⁶Nai ani kisyeme esacaradoti ituŋanan ŋin toryamu atemar nyekwaŋak ŋajul ŋuna eya neni ilebulebunit, ido nyicukuliyoro nen, nai kenyisiwa, esetari esacaradoti ituŋanan ŋin neni keŋ bon ŋirwa ŋikanikaarei.

²⁷Ani edoli akoloŋit ŋina a ŋakanikaarei, emaikina esacaradoti kisyeme iŋes, ani kilelakina edeke ŋol nakuwan, elimori esacaradoti atemar itoroniyaritae ituŋanan ŋin. Erae edeke ŋol ŋolo etapaana.

²⁸Nai kerubaki ibore ŋin eyai nenipei sek eyai, pa kielakina namuny ka akuwan ka kedaunit anyisiwar, erae ca apores ebuunit, emaikina esacaradoti tolimo atemar mam ŋuna itoronitere ituŋanan ŋin, anerae erae ibore ŋin apores.

²⁹“Ani keyakar ekile, kori aberu ajeme nakou, kori nabokony,

³⁰emaikina esacaradoti kisyeme ajeme ŋin, ani kicukuliyoro ajeme ŋin anakuwan ka kenyaŋaaka ka todiim ŋajul ŋuna eya nen, emaikina esacaradoti tolimo atemar itoroniyaritae ituŋanan ŋin, erae ajeme ŋin ŋina epyon, edeke ŋolo etapaana ŋolo ka akou, kori ŋolo ka abokony.

³¹Ani kisyeme esacaradoti edeke ŋol ŋolo epyon, ido toryamu pa icukuliyoro anakuwan ka emam ŋajul ŋuna iryoko a nen, emaikina esacaradoti toseta ituŋanan ŋin neni keŋ bon ŋirwa ŋikanikaarei.

³²Ani epete ŋirwa ŋikanikaarei, emaikina esacaradoti kisyeme edeke ŋol ŋolo epyon; ani pa kinyenyaarit ka kemam ŋajul ŋuna enyaŋaaka, ido nyicukuliyoro ajeme anakuwan,

³³emaikina tobanyarae ŋitim, kori epenek a ituŋanan a ŋin, nai kimyekinae ŋitim, kori epenek ŋolo eyai najemei, emaikina kimyekinae ituŋanan ŋin esetara neni keŋ bon ŋirwa ŋice ŋikanikaarei.

³⁴Ani epete ŋirwa ŋikanikaarei, emaikina esacaradoti kisyeme edeke ŋol ŋolo epyon; ani pa kinyenyaarit, kori pa kenyaŋiyarito ŋitim, kori epenek, ido nyicukuliyoro, emaikina esacaradoti tolimo atemar mam ŋuna itoronitere ituŋanan ŋin. Emaikina ituŋanan ŋin kilota ŋilowi keŋ toruwor ŋini emam ŋuna itoroniyaritere iŋes.

³⁵Nai ani kinyenyaara edeke ŋol anakuwan keŋ kedau esacaradoti alimun atemar mam ŋuna itoroniyaritere iŋes,

³⁶emaikina esacaradoti kisyeme ituŋanan ŋin. Ani kinyenyaarit edeke ŋolo epyon ŋol anakuwan keŋ, nyemaikina esacaradoti kiwar akiŋolikin ŋitim ŋulu enyaŋaaka, kori epenek ŋolo enyaŋaana; erae ituŋanan ŋin ŋini itoroniyaritae.

³⁷Nai ani kiŋolik esacaradoti edeke ŋol, ido toryamu ŋitim ŋulukiryonok elomunito anapores, kori epenek ŋolokiryonon elomunit anapores, iŋes atemar keiyo ajeme ŋina epyon ŋin, erae ituŋanan ŋin ŋini nyitoroniyaritae; ido emaikina esacaradoti tolimo atemar mam ŋuna itoroniyaritere iŋes.

³⁸“Ani kepyan ekile, kori aberu ŋakemera ŋuna akwaŋak namuny ŋina ka akuwan,

³⁹emaikina esacaradoti kisyeme ituŋanan ŋin, ido ani keryamu ŋakemera ŋun pa ekwaŋak nooi, iŋes atemar erae akisorit elomunit anakuwan; erae ituŋanan ŋin ŋini nyitoroniyaritae.

⁴⁰“Ani keraraar ituŋanan ŋitim anakou, erae ŋin ŋini eŋolyaana, nai mam ŋuna itoroniyaritere.

⁴¹Ani keraraar ituŋanan ŋitim aloreet, ido topaloror, erae ŋin ŋini epalor ereet, nai mam ŋuna itoroniyaritere.

⁴²Nai ani keyai akemer ŋina ereŋiyarit tokwaŋ anaŋole, kori anapalore keŋ, erae ŋol edeke ŋolo etapaana, ŋolo elomunit anaŋole keŋ, kori anapalore keŋ.

⁴³Emaikina esacaradoti kisyeme ituŋanan ŋin; ani kereŋiyarito tokwaŋiyarito ŋakemera ŋuna ilebulebunito ŋuna elomunito anaŋole keŋ, kori anapalore keŋ, kikwaan ka edeke ŋolo etapaana ŋolo ikamununui amuny ka akuwan,

⁴⁴erae ituŋanan ŋin ŋini kemin edeke ŋolo etapaana, ido erae iŋes ŋini itoroniyaritae. Emaikina esacaradoti tolimo atemar itoroniyaritae ituŋanan ŋin; elomunit edeke anakou keŋ.

⁴⁵“Emaikina ituŋanan ŋini eyakar edeke ŋolo ka amuny ka akuwan totapaana tonapite ŋilowi ŋulu enyamuna, nyikeri ŋitim keŋ, ido kimukite ereet keŋ, kiworoe ebala, ‘Itoroniyaritae, itoroniyaritae.’

⁴⁶Erubakini ituŋanan ŋin itoroniyaritae ŋirwa daadaŋ ŋulu edyakar iŋes. Emaikina kiboiyo neni keŋ bon, kiboi anariet aneni emam ŋituŋa ŋuluce.

⁴⁷“Ani kikunoik elou edio ŋolo itiyaunitae a ŋajul, kori a ŋausyo a ŋuna amilimilak,

⁴⁸kerae ŋolo edonyunitoe a ŋakan, kori ibore idio ŋini edonyunitoe a ŋajul, kori a ŋausyo a ŋuna amilimilak, lolou a ibarasit ca daadaŋ,

⁴⁹ido ani kelibiyarit, kori kereŋiyarit ibore ŋin alolou a ŋolo imanyumanyunitae, kori a ŋolo edonyunitoe, kori alojamu, kori anibore ca a daadaŋ a ŋini itiyaunitae alolou a ibarasit, erae edeke ŋol ŋolo etapaana, ido emaikina kitoodiyarae neni ke esacaradoti.

⁵⁰Isyeme esacaradoti edeke ŋol, ido toseta nawae ŋirwa ŋikanikaarei iborosit ŋin ŋini ikunoikinit.

⁵¹Ani epete ŋirwa ŋikanikaarei, emaikina kisyeme iŋes edeke aniborosit a ŋin. Ani kinyenyaarit ibore ŋin alolou a ŋolo imanyumanyunitae, kori a ŋolo edonyunitoe, kori alojamu, kori anibore ca daadaŋ a ŋini itiyaunitae alolou a ibarasit, erae edeke ŋol ŋolo etapaana, ŋolo itoroniyaritae.

⁵²Emaikina esacaradoti kicuny elou ŋol, tari kerae ŋolo imanyumanyunitae, kori edonyunitoe, kori ŋolo edonyunitoe a ŋajul, kori aŋausyo aŋuna amilimilak, kori ibore ca daadaŋ, itiyaunitae alolou a ibarasit anerae erae atapon edeke ŋolo etapaana; emaikina ŋiboro ŋul kicunyae.

⁵³“Nai ani kisyeme esacaradoti iborosit ŋini ekunoikinit, ido toryamu pa ielakina ibore ŋin lolou daadaŋ ŋolo imanyumanyunitae, kori edonyunitoe, kori nibore ca daadaŋ ŋini itiyaunitae alolou a ibarasit;

⁵⁴emaikina esacaradoti kisilota ŋituŋa elou ŋol, ido toseta elou ŋol, neni keŋ bon ŋirwa ŋikanikaarei.

⁵⁵Ani elunyar ŋirwa ŋul, emaikina esacaradoti kisyeme elou ŋol, ani pa kilocokino eraŋgi aneni sek ekunoikinit alolou a ŋol, tari daŋ pa kinyenyaarit, erae elou ŋol ŋolo itoroniyaritae. Emaikina kicunyae erae kerae tooma, kori kiŋa ekunoikinit.

⁵⁶“Ani kisyeme esacaradoti iborosit ŋin, toryamu atemar nyeriŋa ikunoikinit kedaun akilotar iborosit ŋin, emaikina iŋes tolukana neni ekunoikinit alolou a ŋolo imanyumanyunitae, kori edonyunitoe, kori anibore ca a daadaŋ a ŋini itiyaunitae alolou a ibarasit.

⁵⁷Nai ani kikunoik nabo elou ŋolo imanyumanyunitae, kori edonyunitoe, kori ibore ca daadaŋ ŋini itiyaunitae alolou a ibarasit, iŋes atemar inyenye ibore ŋin, emaikina kicunyae iborosit ŋin.

⁵⁸Nai elou kori elou ŋolo imanyumanyunitae, kori ŋolo edonyunitoe, kori ibore ca daadaŋ ŋini itiyaunitae alolou a ibarasit, ŋolo nyeriŋa ikunoikinit kedaun akilotar, emaikina kilotarae nabo, ido eruwor ŋolo nyitoroniyaritae.”

⁵⁹Erae ŋul ŋikisila aŋuna a ŋilowi ka ŋijamu a ŋulu ikunoikini, kerae ŋilowi ŋulu itiyaunitae a ŋajul, kori a ŋausyo a ŋuna amilimilak, kori ŋulu imanyumanyunitae, kori ŋulu edonyunitoe, kori a ibore ca a daadaŋ a ŋini itiyaunitae alolou a ibarasit. Erae ŋul ŋikisila ŋulu iyenuniata iyes kitoroniyaritae kori pa kitoroniyaritae ŋiboro ŋul.