Read ngakarimojong Ŋilep. 15 Bible Online

Ŋilep. 15 - ngakarimojong bible

Ŋilep. 15

¹Tema Ekapolon neni a Moses ka Aron,

²“Tolimokisi Ŋisirael ebe, ‘Ani keleleu ibore ido anakuwan ke ekile, erae ibore ŋin ŋini itoroniyaritere ekile ŋol.

³Kerubakinit ibore ŋin elele anakuwan kori kejoŋot alele, erae ibore ŋin ŋini itoroniyaritere iŋes. Epite lo iŋes ituruworya ibore ŋin ekile ŋolo itoroniyaritae:

⁴Ibore daadaŋ ŋini eperyo ekile ŋol, eruwor ŋini itoroniyaritae ka ibore daadaŋ ŋini iboikin iŋes, eruwor ŋini itoroniyaritae.

⁵Ituŋanan daadaŋ ŋini etapi ibore ŋini eperyo ekile ŋol, emaikina kilota ŋilowi keŋ, kiloŋar, ido erubakini ituŋanan ŋin, erae ŋini itoroniyaritae akitodol eboŋ.

⁶Ituŋanan daadaŋ ŋini iboikin neni sek eboikino ekile ŋol, emaikina kilota ŋilowi keŋ, kiloŋar, ido erubakini ituŋanan ŋin, erae ŋini itoroniyaritae akitodol eboŋ.

⁷Ituŋanan daadaŋ ŋini etapi ekile ŋol, ŋolo elele ibore anakuwan, emaikina kilota ŋilowi keŋ, kiloŋar, ido erubakini ituŋanan ŋin, erae ŋini itoroniyaritae akitodol eboŋ.

⁸Ani kimwaak ekile ŋolo elele ibore anakuwan ituŋanan ŋini nyitoroniyaritae, emaikina ŋini nyitoroniyaritae ŋin kilota ŋilowi keŋ, kiloŋar, ido erubakini erae ŋini itoroniyaritae akitodol eboŋ.

⁹Ibore daadaŋ ŋini iboikin emyat esigirya, kori aŋole ekile ŋolo elele ibore anakuwan, eruwor ŋini itoroniyaritae.

¹⁰Ituŋanan daadaŋ ŋini etapi ŋiboro ŋulu sek eboiyo ekile ŋol, eruwor ŋini itoroniyaritae akitodol eboŋ; ido daadaŋ ŋulu iwokete ŋiboro ŋul, emaikina kilotasi ŋilowi kec, kiloŋaros, ido erubakinete erae ŋulu itoroniyaritae akitodol eboŋ.

¹¹Ituŋanan daadaŋ ŋini kebu ekile ŋolo elele ibore anakuwan totap eriŋa nyilotara ŋakan keŋ, emaikina kilotasi ŋilowi kec, kiloŋaros, ido erubakinete erae ŋulu itoroniyaritae akitodol eboŋ.

¹²Ani ketap ekile ŋolo elele ibore anakuwan eborosit ŋolo eyeunitae a ecoto, emaikina tobwaŋae eborosit ŋol, ido ani kerae ibore ŋini iceunitae anakitoe etapit iŋes, emaikina kilotarae.

¹³“‘Ani italeunio ekile ŋolo elele ibore anakuwan ŋol emaikina iŋes kiriya ŋirwa ŋikanikaarei eyai lotal ŋolo ka akitaleuno; emaikina iŋes kilota ŋilowi keŋ, kiloŋar anakipi a ŋuna keriŋa eokunio, toruwor nai ŋolo nyitoroniyaritae.

¹⁴Ani epete ŋirwa ŋikanikauni, emaikina iŋes ya ŋakuryo ŋaarei, kori ŋatemeleudi ŋaarei, bu kiŋaren Ekapolon lopuke ke eema a ŋolo ilipere, inak ŋikyeny ŋul neni ke esacaradoti.

¹⁵Emaikina nai esacaradoti ya ŋainakineta ŋun, apei erae ainakinet aŋuna ka asecit ka ŋinace erae ŋina epeyo, ido emookuni esacaradoti ekile ŋol alokiŋaren Ekapolon aŋuna a ibore a ŋini alele anakuwan keŋ.

¹⁶Ani kepotu ekile ŋaokot ŋuna ka aur, emaikina iŋes kiloŋa akuwan keŋ daadaŋ, ido erubakini iŋes erae ŋolo itoroniyaritae akitodol eboŋ.

¹⁷Ibore daadaŋ ŋini kepotu ŋaokot ŋun pena kerae elou, kori ejamu emaikina kilotarae, ido erubakini erae ŋini itoroniyaritae akitodol eboŋ.

¹⁸Ani kiryamakin ekile ka aberu, emaikina ikes ŋuluarei ŋul kiloŋaros, ido erubakinete erae ŋulu itoroniyaritae akitodol eboŋ.

¹⁹“‘Ani kemin aberu lolap, lopite ŋolo emaikina emineneo, eruwor iŋes ŋina nyeseg akitodol ŋirwa ŋikanikaarei, ido ituŋanan ŋini etapi aberu ŋin, eruwor ŋini itoroniyaritae akitodol eboŋ.

²⁰Ibore daadaŋ ŋini eperyo iŋes apaki ŋina eyakar lolap, eruwor ŋini itoroniyaritae ka ibore daadaŋ ŋini iboikin iŋes apaki ŋina eyakar lolap, eruwor ŋini itoroniyaritae.

²¹Ituŋanan daadaŋ ŋini etapi ibore ŋini eperyo aberu ŋin, emaikina kilota ŋilowi keŋ, kiloŋar, ido erubakini erae ŋini itoroniyaritae akitodol eboŋ.

²²Ituŋanan daadaŋ ŋini etapi ibore ŋini sek eboikino aberu ŋin, emaikina kilota ŋilowi keŋ, kiloŋar, ido erubakini erae ŋini itoroniyaritae akitodol eboŋ.

²³Ketapit ituŋanan ibore ŋini aperyo, kori eboikino aberu ŋin, eruwor ituŋanan ŋin ŋini itoroniyaritae akitodol eboŋ.

²⁴Ani kiryamakin ekile ka aberu ŋin, totapakin ŋaokot lokile ŋol, eruwor iŋes ŋolo itoroniyaritae akitodol ŋirwa ŋikanikaarei, ido itoroniyaryo neni daadaŋ eperyo ekile ŋol.

²⁵“‘Ani keleleata ŋaokot anaberu ŋirwa ŋulu alalak, ŋulu nyeyakar iŋes lolap, kori kerubakis eleleete tari kedaun ŋirwa ŋulu eyakar iŋes lolap, erubakini iŋes erae ŋina itoroniyaritae ŋirwa daadaŋ ŋulu eleleata ŋaokot, lopite ŋolo itoroniyaritere iŋes ŋirwa ŋulu eyakar iŋes lolap.

²⁶Neni daadaŋ eperyo aberu ŋin ŋirwa ŋulu eleleata ŋaokot ka ibore daadaŋ ŋini iboikin iŋes, eruwor ŋini itoroniyaritae lopite ŋolopei sek itoroniyaritere iŋes eyai lolap.

²⁷Ituŋanan daadaŋ ŋini etapi ŋiboro ŋul, eruwor ŋini itoroniyaritae; emaikina kilota ŋilowi keŋ, ido erubakini erae ŋini itoroniyaritae akitodol eboŋ.

²⁸Ani italeunio aberu ŋina aleleete ŋaokot ŋin, emaikina iŋes kiriya ŋirwa ŋikanikaarei eyai lotal ŋolo ka akitaleuno, toruwor nai ŋina adaun akitaleun, ŋina nyitoroniyaritae.

²⁹Ani epete ŋirwa ŋikanikauni, emaikina iŋes ya ŋakuryo ŋaarei, kori ŋatemeleudi ŋaarei, ya neni ke esacaradoti lopuke ŋolo ke eema a ŋolo ilipere.

³⁰Emaikina nai esacaradoti ya ŋainakineta ŋun, apei erae ainakinet aŋuna ka asecit ka ŋinace erae ainakinet ŋina epeyo, ido emookuni esacaradoti aberu ŋin alokiŋaren Ekapolon aŋuna a ŋaokot a ŋuna aleleete anakuwan keŋ.

³¹“‘Alopite a ŋol, iyokiuni iyoŋ Ŋisirael erae ŋulu nyitoroniyaritae ikotere nyetwaka erae ŋulu itoroniyaritae aŋuna ka amunaar eema kaŋ ŋolo eyai kidiŋ kec.’ ”

³²Erae ŋul ŋikisila ŋulu a ŋolokile daadaŋ elele ibore anakuwan ka ŋulu daadaŋ eleleete ŋaokot ŋuna ka aur ŋulu itoroniyaritae a ŋakiro a ŋun,

³³ŋikisila ŋulu a ŋinaberu daadaŋ a ŋina eyai lolap, ŋikisila ŋulu ke ekile, kori ka aberu a ŋina elele ibore anakuwan ka ŋulu ke ekile a ŋolo iryamakin ka aberu ŋina eriŋa eyai lolap.