Read ngakarimojong Ŋilep. 16 Bible Online

Ŋilep. 16 - ngakarimojong bible

Ŋilep. 16

¹Abu Ekapolon kirwor neni a Moses ekaku ketwaka ŋidwe ka Aron ŋuluarei ŋulusapa, ŋulu atwakete apaki ŋina alosyoto diyete Ekapolon.

²Tema Ekapolon neni a Moses, “Tolimok lokaato kon Aron atemar nyeloma adiopaki nakibois ŋina asegan nooi, nyeloma yaye anaŋga kiŋaren ekicoloŋ ŋolo ka akisyonio ŋolo eyai kidiama Asaduku ŋina ka Acamunet, ani kebu nen, etwani, anerae atakanuni ayoŋ alodou omin kidiama ekicoloŋ ŋol.

³Epite lo iŋes emaikina Aron elomarya nakibois ŋina asegan ŋin: Emaikina iŋes ya emoŋ ŋolosorokit ikwapei ainakinet aŋuna ka asecit ka emesek ikwapei ainakinet ŋina icunyio.”

⁴Emaikina iŋes tonap esati, tonap alotooma esati ŋilowi ŋice ŋulu amilimilak; toenik arokoba ŋina amilimilan nacir keŋ, ido nai tonap akopiya ŋina amilimilan. Erae ŋinapen ŋul ŋulu asegak. Emaikina iŋes kiloŋar, ido nai tonap ŋinapen ŋul.

⁵Emaikina iŋes ya aneni a Ŋisirael ŋikorwa ŋiarei ikwapei ainakinet aŋuna ka asecit ka emesek epei ikwapei ainakinet ŋina epeyo

⁶“Emaikina Aron tolemu ainakinet ŋina erae emoŋ aŋuna ka asecit keŋ, ido tomookun elope bon ka tomooku ŋituŋa a ekal keŋ.

⁷Ani kitiya ŋun, ya ŋikorwa ŋul kiŋaren Ekapolon lopuke ŋolo ke Eema a ŋolo iryamununoi.

⁸Emaikina iŋes kilamilam a nen aŋuna a ŋikorwa a ŋul, apeimukat erae aŋuna ke ekore a ŋolo ke Ekapolon ka ŋinace erae aŋuna ke ekoroe a ŋolo ka Asasel. [4]

⁹Emaikina iŋes yau ekoroe ŋolo elamulamun erae ŋolo ke Ekapolon, inak neni ke Ekapolon erae ainakinet aŋuna ka asecit.

¹⁰Nai ekoroe ŋolo elamulamun erae ŋolo einakinio neni ka Asasel, emaikina yau iŋes neni ke Ekapolon eyari, kisitiyae erae ŋolo emookunere ŋituŋa anasecit, kimyekinae tolot naloŋisat erae ŋolo iredakinitae alotooma etal tolot neni ka Asasel.

¹¹“Elemuni Aron emoŋ erae ainakinet aŋuna ka asecit keŋ, ido tomookun elope bon ka tomooku ŋituŋa a ekal keŋ. Eari iŋes emoŋ ŋol aŋuna ka asecit keŋ.

¹²Emaikina Aron tolemu asipirya, kiwuak ŋatotol ŋuna eriraete ŋuna eyakasi namuroet alokiŋaren Ekapolon, tomuk ekinyate ŋolo inyaaditae ileleba ŋakan ya ŋul yaye anaŋga.

¹³Emaikina iŋes kiwuak ekinyate ŋol nakim alokiŋaren Ekapolon, ikotere toburusiya apuru ke ekinyate nakibois ŋina ka akisyonio ŋina eyai kidiama Asaduku ŋina ka Acamunet, erae ŋun akiretakinia iŋes nyetwana.

¹⁴Emaikina iŋes tolemu ŋaokot a emoŋ ŋadi, kipakak ke ekimoin keŋ kiŋaren akibois ŋina ka akisyoniyo; kipakak ŋace ke ekimoin keŋ ŋawuatakinet ŋakanikaarei kiŋaren Asaduku ŋina ka Acamunet.

¹⁵“Ani irikakin ŋun, elemuni iŋes ekoroe ŋolo erae ainakinet aŋuna ka asecit a ŋituŋa, toar ya ŋaokot yaaye anaŋga, kisitiya lopite ŋolo abunio kisitiyaa ŋuna ke emoŋ: kipakak kiŋaren akibois ŋina ka akisyonio ka kiŋaren Asaduku ŋina ka Acamunet.

¹⁶Alopite a ŋol, emookuni iŋes akibois ŋina Asegan nooi ŋin, aŋuna abunio toruwor ŋina apotu Ŋisirael kituruwosi ŋina itoroniyaritae aŋuna etoroniyaritere ikes ka aŋuna ka aŋecanut kec ta aŋuna a ŋasecisya a daadaŋ aŋuna etiyato ikes. Emaikina Aron tomooku eema ŋolo ilipere daŋ, eema ŋolo eyai kidiŋ alomar kec a ŋulu itoroniyaritae.

¹⁷Emam ituŋanan emaikina eyai loeema ŋolo ilipere ŋol, ameun apaki ŋina elomarya Aron tooma akibois ŋina Asegan nooi amooki, akitodol apaki ŋina elomunia kiŋa, kedau amookun bon ka amookun ŋituŋa ekal keŋ ta Ŋisirael daadaŋ.

¹⁸Ani kirikak amookun nen, emaikina iŋes tolot namuroet kiŋaren Ekapolon tomooku ŋina daŋ. Emaikina iŋes tolemu ŋaokot a emoŋ ŋadi ka ŋuna ke ekoroe ŋadi, ido kiosak loboorei daadaŋ ŋulu esibito ŋamomwar alokoonae a namuroet.

¹⁹Emaikina iŋes kipakak ŋaokot ŋun ŋadi ke ekimoin keŋ ŋawuatakinet ŋakanikaarei namuroet ŋin, ikotere kitesegunae namuroet ŋin, ido kitaleunoe anasecit a ŋina a Ŋisirael.

²⁰“Ani kedau Aron amookun akibois ŋina asegan nooi ka eema ŋolo ilipere ta namuroet, emaikina nai iŋes ya ekoroe ŋolo eyari kiŋaren Ekapolon.

²¹Kidokok ŋakan keŋ nakou a ekoroe a ŋol, kirwor neni a ekoroe a ŋol aronis daadaŋ ka aŋecanut ta ŋasecisya a Ŋisirael daadaŋ, kimyek pena nakou a ekoroe, ido nai tolemu ituŋanan tomyaa ekoroe ŋol nariet.

²²Elosyo ekoroe ŋol aronis ŋin daadaŋ nakibois ŋina erae aloŋisat, ani edoli ekoroe ŋol nen, kimyekinae kipasaa bon nariet.

²³“Ani kedau Aron ŋun, emaikina toloma loeema ŋolo ilipere, tolaca ŋilowi ŋulu amilimilak, ŋulu abu iŋes tonap elomari nakibois ŋina Asegan nooi, ido emaikina kimyek iŋes ŋilowi ŋul a nen.

²⁴Emaikina iŋes kiloŋar anakibois a ŋina asegan, ido tonap ŋilowi keŋ ŋulu sek enapenene. Tolomu nai kiŋa inak Ekapolon ainakinet keŋ ŋina epeyo ka ainakinet a Ŋisirael ŋina epeyo. Tomookun bon ka tomooku ŋituŋa.

²⁵Emaikina daŋ iŋes kicuny alokidiama namuroet asepwae a ainakinet aŋuna ka asecit.

²⁶Emaikina ekile ŋolo etemyaaryo ekoroe nariet kiloŋa ŋilowi keŋ, kiloŋar, ani irikakin bu nai tolomu nalomar.

²⁷Emaikina yaarae kiŋa alomar emoŋ ka ekoroe ŋulu arae ŋainakineta aŋuna ka asecit, ŋulu aponi yaunae ŋaokot kec nakibois ŋina Asegan nooi amookya; emaikina kicunyae ejamu ka elou ka akiriŋ kec ta ŋiboro a ŋakokyes kec.

²⁸Emaikina ekile ŋolo icunyi ŋul kiloŋa ŋilowi keŋ, kiloŋar, ani irikakin, bu nai tolomu nalomar.

²⁹“Emaikina iyes kiwuapa ŋakiro ŋuna etubunitoe nu ŋikaru ka ŋikaru: Ani edoli ŋirwa ke elap ŋitomon, elap ŋolo a ŋikanikaarei, emaikina iyes kiredakis akiron, ido nyitiyata etic edio; kiraakasi Ŋisirael ŋulu ikiurito Ŋisirael, kori ŋigelanotin ŋulu iboiyete kaapei ka Ŋisirael;

³⁰anerae eruwor akoloŋit ŋin ŋina ikimookunere iyes, ikitaleun. Iruworosi nai iyes ŋulu nyikitoroniyaritae alokiŋaren Ekapolon aŋuna a ŋasecisya kus a daadaŋ.

³¹Erae akoloŋit ŋin ŋina a Sabato, ŋina emaikina kieŋunere, ido emaikina iyes kiredakis akiron; erae ŋun ŋakiro ŋuna etubunitoe ŋuna a ŋikaru ka ŋikaru.

³²Esacaradoti ŋolo adaun akios a akimyet ka akituruwor esacaradoti ŋolo Apolon nooi, ŋolo ilunyokin lorot a papa keŋ, iŋes emaikina kitiya amooki ka iŋes emaikina tonap ŋilowi ŋulu ke etal ŋulu amilimilak,

³³ido tomooku akibois ŋina Asegan nooi ŋin, eema ŋolo ilipere, namuroet, ŋisacaradotin ka ŋituŋa ŋuluce daadaŋ.

³⁴Emaikina iyes torubakis iwuapito ŋakiro ŋuna etubunitoe ŋun ŋikaru ka ŋikaru. Emaikina iyes tomookete Ŋisirael a ŋolokaru aŋuna a ŋasecisya kec amookunet epei.” Abu nai Moses kitiya ŋun lopite ŋolo ecikitor Ekapolon iŋes.