Read ngakarimojong Ŋilep. 17 Bible Online

Ŋilep. 17 - ngakarimojong bible

Ŋilep. 17

¹Tema Ekapolon neni a Moses,

²“Tolimok Aron ka ŋidwe keŋ ŋulusapa ka Ŋisirael daadaŋ ebe, ‘Adau Ekapolon alimun ŋakiro nu:

³Ani kear Esiraelit ediomoŋ, ikale ŋinimesek, kori ekoroe alotooma alomar, kori alokiŋa alomar,

⁴akilo iŋes ayaun lopuke ke eema a ŋolo ilipere, inak neni ke Ekapolon alokiŋaren eema keŋ erae ainakinet, emaikina ituŋanan ŋin toruwor ŋini esecit aŋuna abukorya ŋaokot, ikwapei abukorya iŋes ŋaokot, emaikina iŋes kiritarae alotuŋa keŋ.

⁵Erae ŋun ikotere Ŋisirael eyaunete neni ke Ekapolon ŋamuronisya kec ŋuna earete ikes anariet. Emaikina ikes yaut neni ke esacaradoti lopuke ke eema a ŋolo ilipere, inakis Ekapolon erae ŋainakineta ŋuna ke ekisil.

⁶Emaikina esacaradoti kipakak ŋaokot namuroet ke Ekapolon ŋina eyai lopuke ke eema a ŋolo ilipere, ido kicuny asepwae erae ŋina ebob eure keŋ aneni ke Ekapolon.

⁷Nyemaikina Ŋisirael yaasi ŋainakineta kec inakis neni a ŋipyan a ŋulu esibito ŋamee a ŋulu ituruwosi ikes ŋimalaanotin. Emaikina ŋakiro ŋun toruwor etal ŋoloruba aŋuna kec ka aŋuna a ŋanyameta a ŋuna eponito.’

⁸“Tolimok nabo ikes atemar, ‘Esiraelit daadaŋ kori igelaanot daadaŋ ŋini iboiyete ka ikes ŋini ainakini ainakinet ŋina epeyo, kori amuronot adio,

⁹ido nyeyau lopuke ke eema a ŋolo ilipere, ainakin neni ke Ekapolon, emaikina ituŋanan ŋin kiritarae alotuŋa.

¹⁰“‘Ani kenyam Esiraelit edio ŋaokot kori igelaanot ŋini iboiyete ka ikes, etoroniyari ayoŋ ituŋanan ŋin eŋolikini, ido eritari iŋes alotuŋa kaŋ;

¹¹anerae ŋaokot ikes iteyarete ŋinisubuna daadaŋ, ido akainak ayoŋ iyes ŋaokot a ŋisubuna amookunia akiyar kus alokidiama namuroet; erae ŋaokot akiyar ikes emookunere akiyar a ituŋanan.

¹²Aŋun, alimok ayoŋ Ŋisirael atemar, mam ikes ŋini emaikina tonyam ŋaokot, mam tari igelaanot ŋini iboiyete ka ikes emaikina tonyam ŋaokot.

¹³Esiraelit daadaŋ, kori igelaanot daadaŋ ŋini iboiyete ka ikes ŋini eari etyaŋ, kori ikyenyit, ŋulu enyamio, emaikina kitiita ŋaokot, tonukak nalup.

¹⁴“‘Erae ŋun, anerae ŋaokot ikes iteyarete ŋinisubuna daadaŋ. Ŋakiro ŋun ikes alimokinitor ayoŋ Ŋisirael atemar, nyemaikina iyes tonyama ŋaokot a isubuna a idio. anerae ŋaokot ikes iteyarete ŋinisubuna daadaŋ. Kenyam ituŋanan idio ŋaokot, emaikina kiritarae aneni a ŋuluce.

¹⁵Ituŋanan daadaŋ, kerae Isiraelit kori igelaanot, ŋini enyami ibore ŋini etwani bon, kori ŋinikeari etyaŋ ŋoloce, emaikina kilota ŋilowi keŋ, kiloŋar, ido erubakini itoroniyaritae akitodol eboŋ, toruwor nai ŋini nyitoroniyaritae.

¹⁶Nai ani pa kilota iŋes ŋilowi keŋ, ido kiloŋar, eruwor ŋun nakou keŋ ka ilope.’ ”