Read ngakarimojong Ŋilep. 24 Bible Online

Ŋilep. 24 - ngakarimojong bible

Ŋilep. 24

¹Tema Ekapolon neni a Moses,

²“Emaikina iyoŋ tolimok Ŋisirael yaut neni kon akimyet ŋina ecuunitae alokito a ŋulu enyaritae Olipa, kinokonakinia iyoŋ etaa a ŋinakoloŋit.

³Emaikina Aron kinokak etaa ŋol alotooma eema ŋolo ilipere, alokiŋa anaŋga ŋina iteriboorit Asaduku ŋina ka Acamunet. Emaikina etaa ŋol tonok alokiŋaren Ekapolon ŋarwa daadaŋ, eboŋ kiwala. Erae ŋun ŋakiro ŋuna etubunitoe ŋuna a ŋikaru ka ŋikaru ananyameta kus a daadaŋ a ŋuna eponito.

⁴Emaikina Aron tosipok ŋitaae nawoet a ŋitaae ŋina erae egolid bon itiyaunitere, emaikina ŋitaae ŋul tonokete alokiŋaren Ekapolon a ŋinakoloŋit.

⁵“Tolemutu ŋakirya ŋuna ajokak, kipout ŋamugati ŋatomon ka ŋaarei a ŋakirya a ŋun, kisitiyata ŋakiloi ŋaomwon ka atutubet akipounio ŋinamugati.

⁶Kiwuakis ŋamugati ŋun lolaino ŋiarei, ŋakanikapei a ŋololain, toyakas kidiama emesa ŋolo itiyaunitae ke egolid, kiŋaren Ekapolon.

⁷Aŋololain a ŋamugati, kiwuakisi ekinyate ŋolo ajokan, ikwapei ainakinet aŋuna ka akimuj ka ainakinet neni ke Ekapolon ŋina epeyo.

⁸Akoloŋit ŋina a Sabato daadaŋ, emaikina Aron kiwuak ŋamugati lolaino, kiŋaren Ekapolon ikwapei ainakinet a Ŋisirael ka ikwapei acamunet ŋina a ŋikaru ka ŋikaru.

⁹Erae ŋamugati ŋun ŋuna ka Aron ka ŋidwe keŋ ŋulusapa, emaikina ikes kimuja ŋamugati ŋun anakibois a ŋina asegan, anerae erae ŋun ainakinet kec apei ŋina asegan nooi anainakineta a ŋuna epeyo neni ke Ekapolon. Erae ŋun ŋuna emaikina ikes toryamununeete ŋikaru ka ŋikaru.”

¹⁰Abu ekile ece ŋolo arae toto keŋ Asiraelit ka torae papa keŋ Ejipitanoit, tolot neni a Ŋisirael, kiiryakin ekile ŋol ke Esiraelit.

¹¹Abu ekile ŋol, lokoku ka Asiraelit nyitopoloo ekiro ke Ekapolon anakilamanar; aŋun, aponi iŋes yaunae neni a Moses. (Arae ekiro a toto keŋ Selomis, nakoku a Dibiri a ŋolo alokabila a Dan.)

¹²Apotu ŋituŋa toena ekile ŋol, akitodol ŋina eyenuniata ikes aneni ke Ekapolon ŋuna emaikina kitiyae neni keŋ.

¹³Tema nai Ekapolon neni a Moses,

¹⁴“Ya ekeyanyan ŋol kiŋa alomar; kimyek ŋituŋa daadaŋ ŋulu apupete ŋiyany keŋ kidokokis ŋakan kec nakou keŋ, ido ekaku, tocaka ŋituŋa daadaŋ ekile ŋol a ŋamoru.

¹⁵Tolimok Ŋisirael ebe, ‘Ani kicen ituŋanan idio Akuj keŋ, eruwor ŋun nakou keŋ.

¹⁶Ituŋanan daadaŋ ŋini iyanyi ekiro ŋolo ke Ekapolon, emaikina toarae. Emaikina ŋituŋa daadaŋ tocaka iŋes a ŋamoru. Ituŋanan daadaŋ, kerae iŋes igelaanot, kori Esiraelit, ani kiyany iŋes ekiro ŋolo ke Ekapolon, emaikina toarae.

¹⁷Ani kear ituŋanan ituŋanan ŋinice, emaikina toarae iŋes daŋ.

¹⁸Ituŋanan daadaŋ ŋini eari ibarasit a ŋinice, emaikina totac, anerae ebala ekisil etacyo akiyar a akiyar.

¹⁹Ani kewan ituŋanan ikidunyet keŋ, ŋuna ca daadaŋ etiya iŋes neni a ŋinice, emaikina kitiyakinae neni keŋ daŋ.

²⁰Ani kebil iŋes ŋinice, ebilyo iŋes daŋ, ani kerae akoŋu elemari iŋes, elemario ŋina keŋ daŋ, ani kerae ekelae elemari iŋes, elemario ŋolo keŋ daŋ. Ikwaŋinapei ewania iŋes ŋinice, emaikina towanae iŋes daŋ ikwaŋinapei.

²¹Ituŋanan daadaŋ ŋini eari ibarasit a ŋinice, emaikina totac, nai ituŋanan daadaŋ ŋini eari ŋinice, emaikina toarae.

²²Erae ekisil epei aŋuna a ŋigelaanotin ka Ŋisirael kaapei; anerae arae ayoŋ Ekapolon Akuj kus.’ ”

²³Abu nai Moses kirwor ŋakiro ŋun neni a Ŋisirael, ido apotu ikes yaasi ekeyanyan ŋol kiŋa alomar tocaka a ŋamoru. Kitiya ikes lopite ŋolo ecikitor Ekapolon Moses.