Read ngakarimojong Ŋilep. 25 Bible Online

Ŋilep. 25 - ngakarimojong bible

Ŋilep. 25

¹Tema Ekapolon neni a Moses alokidiama emoru Sinai,

²“Tolimok Ŋisirael ebe, ‘Ani ilomarete iyes nakwap ŋina alosi ayoŋ ainakin iyes, emaikina iyes totamunito ekaru ŋolo a ŋikanikaarei aŋuna ke Ekapolon.

³Kitata ŋimanikorin kus ŋikaru ŋikanikapei ka alotooma ŋikaru ŋikanikapei, totubo ŋaten a ŋipiini kus, ido tolema ŋaraito kec.

⁴Nai ani edoli ekaru ŋolo a ŋikanikaarei, emaikina ŋalup kieŋut toryamut Sabato kec, Sabato ŋina erae etal ke Ekapolon. Nyitata ŋimanikorin kus, kori nyitubo ŋaten a ŋikito kus a ŋulu ke epiini.

⁵Nyemaikina iyes tolema ejojo alomanikorin kus, kori toŋero ŋaraito ke epiini alokito a ŋulu pa atubitoe a ŋulu ke epiini a ŋulu eraunete ekaru ŋol. Emaikina ŋalup kieŋut ekaru ŋol.

⁶Ibore daadaŋ ŋini erauni bon anakwap ekaru ŋolo a Sabato, eruwor akimuj kus, ŋina a ŋipi ka ŋapi kus, ŋina a ŋiketiyak ka ŋipeyok kus ŋulu iboiyete ka iyes

⁷ka ŋina a ŋibaren ta ŋityaŋ ŋulu ka ariet ŋulu eya nakwap kus. Ibore daadaŋ ŋini erauni anakwap emaikina kimujae.’ ”

⁸“‘Kimarutu ŋikaru ŋikanikaarei ŋakimarunet ŋakanikaarei. Erae ŋikaru ŋul daadaŋ ŋatomoniomwon ka ŋikanikaomwon.

⁹Ani edaun ŋul, edoli ŋirwa ŋitomon, elap ŋolo a ŋikanikaarei, akoloŋit ŋina itiyaere amooki, emaikina iyes tokutakis ŋabureryaŋae a ŋimeesekin anakwap kus a daadaŋ.

¹⁰Ituruworete iyes ekaru ŋolo a ŋatomonikan ŋolo eseg, ido emaikina iyes kiserata alacakina ŋina eyai lotuŋa daadaŋ ŋulu ka akwap kus. Erae ŋol ekaru ŋolo a ŋatomonikan ka alakara kus. Emaikina ŋinituŋanan toboŋo nalup keŋ ka lotuŋa a ekal keŋ.

¹¹Eruwor ekaru ŋolo a ŋatomonikan ŋol aneni kus ŋolo ka alelyanu kus, nyemaikina iyes kitata, kori tolema ejojo alomanikorin kus, kori tolema ŋaraito ke epiini alokito kec a ŋulu pa atubitoe ŋaten;

¹²anerae erae ekaru ŋol aneni kus ŋolo a ŋatomonikan ŋolo ka alakara kus, ido erae ŋolo eseg aŋuna kus; kimuja akimuj ŋina erauni bon alomanikorin.’

¹³“‘Alokaru a ŋolo a ŋatomonikan, emaikina ŋinituŋanan toboŋo nalup keŋ a ilope.

¹⁴Ani kigyela iyoŋ ŋalup neni ke ekidunyet kon, kori kigyelu iyoŋ ŋalup aneni a ekidunyet kon, nyemaikina iyes tomodikinos make.

¹⁵Ani kigyelu iyoŋ ŋalup aneni ke ekidunyet kon, emaikina kimarunae etyae eriyan ka ŋikaru ŋulu elemya ituŋanan akimuj analup a ŋun eriŋa nyedolo ekaru ŋolo a ŋatomonikan ŋolo inyakakinere ituŋanan ŋalup keŋ.

¹⁶Ani kelalak ŋikaru, kiyatakisi etyae, ido ani kekudyoko ŋikaru, kitiditeutu etyae; anerae erae ŋikinyom ŋulu elemyo analup a ŋun ikes etacyo.

¹⁷Nyitiyata atuna alokidiŋ kus make, nai tokerito Akuj kus. Arae ayoŋ Ekapolon Akuj kus.’

¹⁸“Emaikina iyes totamunito ŋakiro kaŋ ŋuna atubunit ayoŋ ka alotooma akikinyoma, kiwuapa ŋikisila kaŋ, ikotere iboiyete emam ŋace anakwap.

¹⁹Ebuni nai akwap akira ŋaraito keŋ, kimuja nai kimwoko, ido kiboiyoto emam ŋace.

²⁰Ani nai kiŋita iyes ebe, ‘Nyo ikimuji isua alokaru a ŋolo a ŋikanikaarei, anerae emam ibore ikitakini isua, kori ikilemuni?’

²¹Ekeyakikini ayoŋ iyes ŋarereŋisyo ŋuna alalak alokaru a ŋolo a ŋikanikapei, tora akwap ŋikinyom ŋulu epedorete akitan iyes ŋikaru ŋiuni.

²²Ani itakinete iyes ŋikinyom edoli ekaru ŋolo a ŋikanikauni, emaikina erae akimuj ŋinaŋorot imujete iyes akitodol ekaru ŋolo a ŋikanikaomwon ŋina ilemyata iyes akimuj ŋina ke ekaru a ŋol.

²³Nyemaikina iyes togyelakis ituŋanan ŋalup toruworos ŋuna keŋ jik, anerae erae ŋalup ŋuna kaŋ, irae iyes ŋigelaanotin nai ŋikepaŋgak ŋalup kaŋ.

²⁴Ŋalup daadaŋ ŋuna iyakatar iyes, emaikina eyai epite ŋolo elakunere erae kegyel ice.

²⁵“‘Ani kekulyakan ipei a ŋituŋa kus, ido togyela ŋalup ŋun keŋ, emaikina iyenet keŋ bu tolaku ŋalup ŋun.

²⁶Ani kemamukatar ituŋanan ŋin iyenet ŋini elakuni ibore ŋin aŋuna keŋ, ido tobar iŋes ekaku toryamu ibore ŋini elakunia ŋalup keŋ,

²⁷emaikina iŋes kimaru ŋikaru ŋulu alunyar ameun ŋina agyelarya iŋes ŋalup ŋun, ido kinyaka etyae ŋolo epiyanuna, kedau alemar etyae ŋolo a ŋikaru a ŋulu idoŋito, inak ŋini kebu togyel ŋalup keŋ, ido tolaku iŋes ŋalup keŋ.

²⁸Nai ani pa kebar iŋes nyepedo alakun ŋalup keŋ, erubakini ŋini egyelit eyakar ŋalup ŋun akitodol ekaru ŋolo a ŋatomonikan. Inyakakinio ŋalup ŋun neni a ilope itiyao ŋasuban ŋuna a ŋikaru a ŋatomonikan, inakinae ŋalup neni a ŋini kebu togyela.’

²⁹“‘Ani kegyela ituŋanan idio akai alotaun a ŋolo ewuatae ka arwatata, emaikina iŋes tolaku akai ŋin kelunyar ekaru epei ameun anapaki a ŋina agyelarya iŋes.

³⁰Ani pa kelakunitae akai ŋin alotooma ekaru ŋol, eruwor akai ŋin ŋina a ŋini kebu togyel ka ŋipapae keŋ. Nyemaikina tolakarae tari kedol ŋikaru ŋatomonikan.

³¹Nai ŋakais ŋuna a ŋitaunio a ŋulu nyewuatae ka arwatata, erae ŋun ŋuna nyeya lotaun. Emaikina ŋun elakanaryo edoli apaki ŋina a ŋasuban a ŋikaru a ŋatomonikan.

³²Ani alotaunio a ŋilepi, emaikina ŋilepi eyakatar apedor ŋinalakunet ŋakais ŋuna erae ŋuna kec alotaunio kec.

³³Aŋun, ibore a ŋilepi ŋini emaikina elakanaryo iŋes ŋakais ŋuna kegyelaritae alotaun daadaŋ a ŋolo erae ŋolo kec, ido emaikina tolakarae edoli ekaru ŋolo itiyaere ŋasuban ŋuna a ŋikaru a ŋatomonikan, anerae ŋakais ŋuna eya lotaunio a ŋilepi erae ŋuna kec aneni a Ŋisirael a ŋuluce.

³⁴Nai nyemaikina togyelarae ŋalup daadaŋ ŋuna erae adakar a ŋilepi, ŋuna eya nawaetin a ŋitaunio kec, erae ŋalup ŋuna kec ŋikaru ka ŋikaru.’

³⁵“‘Ani keruwor iyenet kus idio icanaanot, todaun epite ŋolo iŋarakinor bon emaikina iyes, kiŋarakisi iŋes, toyarik neni kus esibit igelaanot ŋini iboiyete ka iyes.

³⁶Nyitatac iŋes ŋisiliŋa ŋulu edeparito ŋulu sek edeniyorit iŋes, nai tokerito Akuj, ikotere ituŋanan kus ŋin erubakini iboi aneni kus.

³⁷Nyidenikis iŋes ŋisiliŋa erae ŋulu ibasi iyes kiyatak iŋes ŋice inyakuni, kori nyisabakis iŋes etyae igyelakinete akimuj kus.

³⁸Arae ayoŋ Ekapolon Akuj kus, ŋina abu akoyau iyes alo Ijipit ainakin akwap ŋina a Kanaan, ikotere aruwor Akuj kus.’

³⁹“‘Ani kelomu akulyako neni a ituŋanan kus a ŋini iboiyete ka iyes, ido bu iŋes toreeun neni kus, nyisitiyata iŋes esibit epito.

⁴⁰Totiŋa iŋes esibit eketiyan ŋolo etacio, kori epeyonon ŋolo a ŋapakio a ŋadi alokidiŋ kus; emaikina iŋes kitiya etic kus akitodol ekaru ŋolo a ŋasuban a ŋuna a ŋikaru a ŋatomonikan;

⁴¹kimyekinae nai iŋes ka ŋidwe keŋ toloto nateker keŋ ka nalup a papa keŋ,

⁴²anerae erae Ŋisirael ŋiketiyak kaŋ, ŋulu abu ayoŋ oyau alo Ijipit, nyemaikina ikes togyelarae esibit ŋipi.

⁴³Nyipukata ikes iryenyanikinito, nai tokerito Akuj kus.

⁴⁴Emaikina ŋipi ka ŋapi kus erae ŋulu eponito anakwapin a ŋuna ikirimokinito iyes kidiŋ, ipedorete iyes agyelun ŋipi a nen.

⁴⁵Ipedorete iyes aryamun ŋipi kus ŋice aneni a ŋigelaanotin a ŋulu iboiyete ka iyes ka alotuŋa kec a ŋulu idounitoe anakwap kus, eruwor ikes ŋipi kus.

⁴⁶Ipedorete ŋidwe kus akirum ikes ikwapei ŋipi kec. Emaikina iyes totiŋa ŋituŋa ŋul erae ŋipi, nai ani eruwor iyes make Ŋisirael, mam ŋini emaikina kipuka ŋinice alotooma aryenyeo.’

⁴⁷“‘Ani kebar igelaanot ŋini iboiyete ka iyes, ido tokulyakan ipei kus ŋini erae Isiraelit, toreiyar akiboi ka igelaanot ŋin, kori tolot akiboi nateker a ŋigelaanotin

⁴⁸eyakar Isiraelit ŋin apedor ŋina elakunere lotuŋa keŋ. Emaikina ipei a ŋiyeneta keŋ tolaku iŋes,

⁴⁹kerae mamae keŋ, kori lokaaya keŋ, kori iyenet ŋini anateker keŋ idio, kori ani kebar iŋes tolakun bon lotuŋa keŋ.

⁵⁰Imarunete iŋes ka ituŋanan ŋini kebu iŋes toreikin akiboiyo ŋikaru ŋulu kiboiyo iŋes a nen, ameun alokaru a ŋolo areunor iŋes akiboi a nen akitodol ekaru ŋolo itiyaere ŋasuban ŋuna a ŋikaru a ŋatomonikan. Emaikina etyae ŋolo elakunere iŋes eriyan ka etyae ŋolo etacio ikelejilejan, ido torae ŋolo ŋikaru a ŋulu eboiyo iŋes a nen.

⁵¹Ani kelalak ŋikaru ŋulu idoŋito eriŋa nyedolo ekaru ŋolo a ŋatomonikan, emaikina ituŋanan ŋin totac etyae ŋolo ka alakuno keŋ eriyan ka etyae ŋolo egyelanarere ŋipi.

⁵²Ani kekudyoko ŋikaru ŋulu idoŋit todol ekaru ŋolo a ŋatomonikan, imarunete ikes etyae ŋolo itemokino lokaru ŋulu eboiyo iŋes a nen, ido totac etyae ŋol tolakunor.

⁵³Emaikina Isiraelit ŋini elakunio totiŋae esibit ikelejilejan, ido emaikina ekapolon keŋ etiŋit iŋes ejok, meere ka aryenyeo.

⁵⁴Tari daŋ pa kelakunitae Isiraelit ŋin alopitesyo a ŋul ke edio, emaikina iŋes ka ŋidwe keŋ kimyekinae toboŋosi nateker keŋ ka nalup a papa keŋ edolit ekaru ŋolo itiyaere ŋasuban ŋuna a ŋikaru a ŋatomonikan;

⁵⁵anerae erae Ŋisirael ŋulu kaŋ, ŋiketiyak kaŋ. Erae ikes ŋiketiyak kaŋ ŋulu abu ayoŋ oyau alo Ijipit. Arae ayoŋ Ekapolon Akuj kus.’ ”