Read ngakarimojong Ŋilep. 26 Bible Online

Ŋilep. 26 - ngakarimojong bible

Ŋilep. 26

¹“‘Nyitiyaut ŋitorubei a ŋakujo aŋuna kus, nyisiponokis ŋitorubei ŋulu iceunitae, kori ŋipirin, nyiwuanakis ŋamoru ŋuna iceunitae nakwap kus, ido kilipa neni kec; anerae arae ayoŋ Ekapolon Akuj kus.

²Totamunito akoloŋit kaŋ ŋina a Sabato, ido kitopoloorito akibois kaŋ ŋina asegan. Arae ayoŋ Ekapolon.

³“‘Ani kiwuap iyes ŋakiro ŋuna atubunit ayoŋ, ido kirica ŋakiciketa kaŋ ka kirica ikes anakikinyoma,

⁴akainakini ayoŋ iyes akiru anapakio aŋuna emaikina toyakaunor, ido tora akwap ŋaraito keŋ, toraa ŋikito ŋaraito kec.

⁵Irubakinete iyes iramete ŋikinyom kus akitodol ŋina ilemyata epiini, ido irubakinete iyes ilemete epiini akitodol apaki ŋina itakiniata, imujete iyes akimuj daadaŋ ŋina icamito, ido iboiyete anakwap kus emam ŋace.

⁶Ayauni ayoŋ ekisil nakwap kus, topero iyes emam akuryanu ka emam ituŋanan ikitukuryani. Alemari ayoŋ ŋityaŋ ŋulu anyamak anakwap kus, ido emam aremo eyakaun nakwap kus.

⁷Iwuapete iyes ŋimoe kus, tomunyasi alokiŋaren kus.

⁸Irisete ŋikan bon alokidiŋ kus ŋimoe amiat, ido irisete amiat alokidiŋ kus ŋimoe ŋalipyo ŋatomon, ido imunyarete iyes ikes alokiŋaren kus.

⁹Eketodikini ayoŋ iyes arimao kaŋ, ido eketipituni iyes eataki ekimar kus, erici ayoŋ acamunet kaŋ ka iyes.

¹⁰Irubakinete iyes imujete akimuj ŋina ke ekaru a ŋolo alunyar akitodol ŋina ilemaryata aneni iŋadatae, ido kilunyokis nen ŋina kitete.

¹¹Ewuakini ayoŋ akibois kaŋ ŋina eboiyo kidiŋ kus, ido nyakaŋeri ayoŋ iyes.

¹²Ikirukori ayoŋ kaapei ka iyes, aruwor Akuj kus, iruworosi iyes ŋituŋa kaŋ.

¹³Arae ayoŋ Ekapolon Akuj kus, ŋina abu okoyau iyes alo Ijipit, ikotere tojoŋoto araakau ŋipi a Ŋijipitian, abu ayoŋ olema ŋatyokisyo ŋuna iyakatar iyes, eketuruwo iyes ŋulu iboiyete emam ŋace.’ ”

¹⁴“‘Nai ani pa kiirasi iyes ŋakiro kaŋ ka pa kiwuap ŋakiciketa kaŋ daadaŋ

¹⁵ka ani pa kiwuap iyes ŋakiro kaŋ ŋuna atubunit ayoŋ ka kiŋero ŋikisila kaŋ, ido tojoŋoto akiwuapit ŋakiciketa kaŋ daadaŋ, ka toŋero acamunet kaŋ,

¹⁶etiyakini nai ayoŋ nu neni kus: Ekesicani ayoŋ iyes toryamut ekabule alodekesyo ka alolekesyo a ŋulu ikitumudukanete ka kitiiniyasi ŋawat kus tari natwanare. Itaete iyes ŋikinyom kus, nai mam ibore iryamunete, irikarete ŋimoe kus.

¹⁷Akaŋoikini ayoŋ iyes, ido ikireunete iyes ŋimoe kus; ikipukaete iyes ŋituŋa ŋulu imanito iyes, ido ibwaŋasi iyes tari kemam ŋini ikirisit.

¹⁸Ani pa kipedorete iyes akiwuap ŋakiro kaŋ ŋuna iirasi ŋun, ekesicani ayoŋ iyes nooi ŋakisicanet ŋace ŋakanikaarei aŋuna a ŋasecisya kus.

¹⁹Alemari ayoŋ asyian kus ŋina iturotor iyes, mam akiru ilimi ka eoni akwap kus deu ikwa asuwat.

²⁰Eruwor ŋiticisyo kus ŋicaryo, anerae nyerayete ŋikinyom kus, nyerayete tari ŋikito ŋulu ka ariet.

²¹“‘Ani kirubakis iyes ikiŋerito ayoŋ, ido towout akiwuap ŋakiro kaŋ, eatakini ayoŋ ŋican kus nooi ŋakiyatakinet ŋace ŋakanikaarei aŋuna a ŋasecisya kus.

²²Emyekini ayoŋ ŋityaŋ ŋulu ka ariet ikinyam iyes, ikidemasi iyes ŋidwe kus, tomunyasi ŋibaren kus, ido kitiditeut ekimar kus kipasakinos ŋirotin kus.

²³“‘Ani pa kiwuap iyes ŋakiro kaŋ tari kedaun akisican, nai torubakinito ikiŋerito ayoŋ,

²⁴akaŋeri ayoŋ iyes, ido ekesican nooi ŋakisicanet ŋace ŋakanikaarei aŋuna a ŋasecisya kus.

²⁵Emyekini ayoŋ ŋimoe kus itoar iyes aŋuna imyekiniata iyes acamunet kaŋ ka iyes. Ani kiema iyes tolomasi lotaunio kus, ayauni ayoŋ edeke neni kus, kitiditeu ekimar kus ikilout ŋimoe kus.

²⁶Ani etasaluni ayoŋ akimuj aneni sek ilemyata iyes, ipoete ŋaberu ŋatomon akimuj alokeno ke epei, ido ikikorakinete ikes iyes akimuj ipimanaritae. Imujete iyes akimuj ŋin, nai erubakini akoro ikinyamit.

²⁷“‘Ani kirubakis iyes iwounito akiirar ŋakiro kaŋ ka ikiŋerito ayoŋ tari kadau akisican iyes,

²⁸arubakini akoŋoikinit iyes nooi alotooma anyunyura kaŋ, ayoŋ alope ekesicani iyes, ekesicani iyes nooi ŋakisicanet ŋace ŋakanikaarei aŋuna a ŋasecisya kus.

²⁹Ikitanyami iyes akoro ŋawat a ŋidwe kus a ŋulusapa ka a ŋulupesur.

³⁰Amunaari ayoŋ neni ilipyata iyes alokidiama ŋimukur, amunaari ŋamuroeta ŋuna icunyata iyes ekinyate, atukokini ayoŋ ŋawat kus kidiama ŋitorubei a ŋakujo kus. Akaŋeri ayoŋ iyes.

³¹Eturuwori ayoŋ ŋitaunio kus ŋireŋoroto, eruwor ŋakiboisyo kus ŋuna sek ilipyata iyes ŋuna esilok, ido nyakabobokini nabo ayoŋ eure a ŋainakineta kus a ŋuna epeyo

³²Enyasuni ayoŋ akwap kus, ikotere ŋimoe kus ŋulu epote akiboi a nen eumokinete a ŋakiro a ŋun.

³³Ekeelari ayoŋ iyes nakwapin, ido eturubakini ayoŋ ŋimoe ikiwuapito iyes. Idoŋi akwap kus erae ŋina asilon ka eruwor ŋitaunio kus ŋireŋoroto.

³⁴“‘Eryamuni nai akwap kus akieŋun ŋikaru ŋul daadaŋ ŋulu iboiyo erae ŋina asilon, ŋikaru ŋulu iyakatar iyes nakwapin a ŋimoe kus; elelyakini akwap kus akieŋun ŋin.

³⁵Apaki ŋin daadaŋ ŋina esilo akwap kus, eryamuni akwap kus akieŋun ŋina sek nyeryamuna ŋapakio ŋuna sek pa isieŋuniata iyes iŋes iboiyete a nen.

³⁶Nai iyes ŋulu ikirikoryo nakwapin a ŋimoe kus, ewuakini ayoŋ akuryanu lotai kus tokuryaketa anakwapin a ŋimoe kus toruworos ŋulu ibwaŋabwaŋasi tari iirarete eruye ka akuyon a ŋina erwo alokuwuam, iemete iyes esibit ikirisitae akiar, ibusonokinosi ikes esurur tari daŋ kemam emoit ikiwuapit.

³⁷Ilogeunun iyes make ikerete esibit ikirisitae akiar tari daŋ kemam emoit ikiwuapit. Aŋun, nyipedorete iyes awoikin ŋimoe kus.

³⁸Itwanikinete iyes nakwapin; ikimunyarete iyes ŋituŋa ŋakwapin a ŋimoe kus.

³⁹Iyes ŋulu idoŋete anakwapin a ŋimoe kus ŋun, itwanikinete nakwapin ŋun, aŋuna a ŋasecisya kus; ka daŋ aŋuna a ŋasecisya atapapaa kus, itwanikinete iyes nen.

⁴⁰“‘Nai ani kelimosi ikes ŋasecisya kec ka ŋuna atapapaa kec, ŋuna aponiata ikes eketepegeta ayoŋ ka okoŋero ayoŋ,

⁴¹ido abu ayoŋ daŋ oŋer ikes eela nakwapin a ŋimoe kec; ani nai kitiditeuna ikes tokona alotai kec; kekiito ŋasecisya kec,

⁴²atamuni nai ayoŋ acamunet kaŋ ka Yakob; atamuni daŋ ayoŋ acamunet kaŋ ka Isaka ka acamunet kaŋ ka Aburaam, ido otamu nai akwap kec;

⁴³anerae imyekinete mono ikes akwap iboi erae ŋina asilon, toryamu akwap akieŋun apaki ŋina iboiyo erae ŋina asilon. Emaikina ikes toryamut akisicanet aŋuna a ŋasecisya kec, anerae apotu ikes towout akiwuap ŋikisila kaŋ, toŋero ŋakiro kaŋ ŋuna atubunit ayoŋ.

⁴⁴Tari daŋ kikote ŋakiro nen, ani apaki ŋina eyakatar ikes nakwapin a ŋimoe kec, nyawouni ayoŋ ikes, oŋer ikes ikotere amunyarya ikes daadaŋ, todaunor acamunet kaŋ ka ikes. Arae ayoŋ Ekapolon Akuj kec.

⁴⁵Nai aŋuna kec, atamuni ayoŋ acamunet kaŋ ka atapapaa kec ŋulu abu ayoŋ oyau alo Ijipit iteete ŋituŋa a ŋakwapin, ikotere oruwor Akuj kec. Arae ayoŋ Ekapolon.’ ”

⁴⁶Erae ŋun ŋakiro ŋuna atubunit Ekapolon ka ŋikisila ta ŋakiciketa ŋuna kebu Ekapolon kiwuak aŋuna keŋ ka Ŋisirael; tolimok Moses alokidiama emoru Sinai.