Read ngakarimojong Ŋilep. 3 Bible Online

Ŋilep. 3 - ngakarimojong bible

Ŋilep. 3

¹Ani kerae ainakinet amuronot ŋina ke ekisil, ido tolemu ituŋanan ibarasit alosipan, kerae ŋinimoŋ, kori ŋiniberu, emaikina ituŋanan ŋin yau neni ke Ekapolon ibarasit ŋini ajokan, ŋini emam neni eŋwalit.

²Emaikina ŋini eyaunit ainakinet ŋin kidokok ŋakan keŋ nakou ka ainakinet a ŋin, ido nai toar alopuke ke eema a ŋolo ilipere; kipakakis nai ŋidwe ka Aron ŋulusapa ŋulu erae ŋisacaradotin ŋaokot lowaetin anamuroet daadaŋ.

³Emaikina inakis anainakinet a ŋina ke ekisil a ŋina epeyo ka aŋuna ke Ekapolon, asepwae ŋina ka akook ka daadaŋ ŋina a ŋiboro ka akook

⁴ka ŋiŋalur ta asepwae kec ŋinapei alodiyete acir ka ŋatune ke emany, emaikina tolemarae kaapei ka ŋiŋalur.

⁵Emaikina nai ŋidwe ka Aron ŋulusapa kicunya ŋinerin ŋul alokidiama namuroet, kaapei ka ainakinet ŋin ŋina ikaca nakito anakim, ŋina emaikina kicunyae ikwapei ainakinet ŋina epeyo, ŋina ebob eure keŋ aneni ke Ekapolon.

⁶Ani kerae ainakinet neni ke Ekapolon amuronot ŋina ke ekisil, ido tolemu ituŋanan alosipan a ŋamesekin keŋ, ibarasit ŋinimoŋ, kori ŋiniberu emaikina erae ŋini ajokan ŋini emam neni eŋwalit.

⁷Ani kelemu ituŋanan ikale ŋinimesek, emaikina ituŋanan ŋin yau ikale ŋin kiŋaren Ekapolon.

⁸Emaikina ituŋanan ŋin kidokok akan keŋ nakou ka ainakinet keŋ a ŋin, ido toar alopuke ke eema a ŋolo ilipere. Kipakakis nai ŋidwe ka Aron ŋulusapa ŋaokot lowaetin anamuroet daadaŋ.

⁹Emaikina inakis ainakinet ŋina ke ekisil ŋina epeyo ka akim aŋuna ke Ekapolon, asepwae daadaŋ ka asonyok daadaŋ, etubunitoe anatorom, asepwae ŋina ka akook ka asepwae daadaŋ ŋina a ŋiboro ka akook

¹⁰kaapei ka ŋiŋalur ka asepwae kec ŋinapei alodiyete acir ka ŋatune ke emany, emaikina tolemarae kaapei ka ŋiŋalur.

¹¹Epedori nai esacaradoti akicuny ŋinerin ŋul daadaŋ alokidiama anamuroet ikwapei akimuj ka ainakinet ŋina epeyo ŋina einakinitae Ekapolon.

¹²Ani kerae ainakinet aituŋanan ameot, emaikina yaunae kiŋaren Ekapolon,

¹³ido kidokok ituŋanan ŋin akan keŋ nakou ka ameot a ŋin; toarae nai alokiŋaren epuke ŋolo ke eema a ŋolo ilipere; ido kipakakis ŋidwe ka Aron ŋulusapa ŋaokot lowaetin anamuroet daadaŋ.

¹⁴Emaikina ituŋanan ŋin inak anainakinet a ŋina einakinit ituŋanan neni ke Ekapolon ikwapei ainakinet ŋina emaikina kicunyae, asepwae ŋina ka akook daadaŋ ka ŋina a ŋiboro ka akook,

¹⁵kaapei ka ŋiŋalur ka asepwae kec ŋinapei alodiyete acir ka ŋatune ke emany, emaikina tolemarae kaapei ka ŋiŋalur.

¹⁶Epedori nai esacaradoti akicuny ŋinerin ŋul daadaŋ alokidiama namuroet ikwapei akimuj ka ainakinet ŋina epeyo, ŋina ebob eure keŋ aneni ke Ekapolon. Emaikina asepwae daadaŋ erae ŋina ke Ekapolon.

¹⁷Emaikina nu toruworos etal ananyameta kus a daadaŋ ka anakiboisyo kus a daadaŋ: Nyemaikina iyes tonyama asepwae adio, kori tonyama ŋaokot ŋadi.