Read ngakarimojong Ŋilep. 4 Bible Online

Ŋilep. 4 - ngakarimojong bible

Ŋilep. 4

¹Tema Ekapolon neni a Moses,

²“Tolimok Ŋisirael ebe, ‘Ani kesec ituŋanan idio pa iredakinit, kitiya ŋuna nyecamakinito ŋakiciketa ŋuna ke Ekapolon, emaikina kiwuap nu:

³Ani kerae esacaradoti ŋolo Apolon nooi eseci, ido yau asecit keŋ ekaile lotuŋa, emaikina iŋes tolemu emoŋ ŋolosorokit, ŋolo ajokan, ŋolo emam neni eŋwalit, ido toar erae amuronot neni ke Ekapolon ŋinalemaret asecit keŋ.

⁴Emaikina iŋes yau emoŋ kiŋaren Ekapolon lopuke ŋolo ke eema a ŋolo ilipere, kidokok akan keŋ nakou ke emoŋ, ido toarak nen kiŋaren Ekapolon.

⁵Emaikina nai esacaradoti ŋolo Apolon nooi ŋol tolemu ŋaokot ŋadi alomoŋ, ido ya loeema ŋolo ilipere,

⁶kilumok ekimoin keŋ naokot, ido kipakak ŋakipakakinet ŋakanikaarei alokiŋaren Ekapolon kiŋaren anaŋga ŋina ka akibois a ŋina asegan.

⁷Ani irikakin, kiosak ŋaokot ŋadi loboorei ŋulu esibito ŋamomwar alokoonae anamuroet a ŋina icunyere ekinyate alotooma eema ŋolo ilipere alokiŋaren Ekapolon. Ŋaokot ŋunace ŋuna idoŋete, emaikina iŋes tobukok neni ewuar namuroet ŋina icunyere ŋainakineta ŋuna epeyo, ŋina eyai lopuke ke eema a ŋolo ilipere.

⁸Emaikina esacaradoti ŋol tolema asepwae daadaŋ anainakinet a aŋuna ka asecit a ŋin, asepwae daadaŋ ŋina ka akook ka daadaŋ ŋina a ŋiboro ka akook

⁹kaapei ka ŋiŋalur ka asepwae kec ŋinapei alodiyete acir ka ŋatune ke emany, emaikina tolemarae kaapei ka ŋiŋalur

¹⁰lopite ŋolo elemarere anibarasit a ŋini earyo aŋuna ke ekisil. Emaikina esacaradoti ya asepwae ŋin kicuny anamuroet a ŋina icunyere ŋainakineta ŋuna epeyo.

¹¹Nai emaikina esacaradoti ya ejamu ka akiriŋ daadaŋ ka akou, ŋimolokony, ŋiboro ka akook daadaŋ ta ŋikujit,

¹²ya ikes kiŋa alomar nakibois ŋina italeunitoe ŋina asegan, ŋina ebukonokinio ekuron, ido kicuny a nen.’ ”

¹³Ani kerae Ŋisirael daadaŋ esecete pa iredakinito, nyeyenete atemar abila ikes akiciket adio ŋina ke Ekapolon, tari daŋ pa keyenete ŋituŋa atemar itiyakina ŋun, esecito ikes.

¹⁴Ani eyenunete ikes atemar ikisecit, emaikina atukot daadaŋ yau emoŋ ŋolosorokit ikwapei ainakinet aŋuna ka asecit. Emaikina emoŋ ŋol yaunae kiŋaren eema ŋolo ilipere.

¹⁵Tosodo nai ŋikasikou kidokokis ŋakan kec nakou ke emoŋ alokiŋaren Ekapolon, ido nai toarae emoŋ a nen alokiŋaren Ekapolon.

¹⁶ya nai esacaradoti ŋolo Apolon nooi ŋaokot ke emoŋ ŋadi loeema ŋolo ilipere,

¹⁷kilumok ekimoin keŋ naokot, ido kipakak ŋakipakakinet ŋakanikaarei alokiŋaren Ekapolon kiŋaren anaŋga ŋina ka akibois a ŋina asegan.

¹⁸Ani irikakin, kiosak ŋaokot ŋadi loboorei ŋulu esibito ŋamomwar alokoonae anamuroet a ŋina icunyere ekinyate alotooma eema ŋolo ilipere alokiŋaren Ekapolon, ŋaokot ŋunace ŋuna idoŋete, emaikina iŋes tobukok neni ewuar namuroet ŋina icunyere ŋainakineta ŋuna epeyo ŋina eyai lopuke ke eema a ŋolo ilipere.

¹⁹Emaikina esacaradoti ŋol tolema asepwae daadaŋ alomoŋ a ŋol, ido kicuny alokidiama namuroet.

²⁰Emaikina iŋes kitiya aŋuna ke emoŋ a lo ŋuna abu iŋes kitiya lomoŋ ŋolo arae ainakinet aŋuna ka asecit. Alopite a ŋol emookuni iŋes ŋituŋa anasecit kec, ido isyonio ikes.

²¹Ani kirikak ŋun, emaikina iŋes ya emoŋ kicuny alokiŋa alomar, lopite ŋolo abunio iŋes kicunyia ŋolo alemarere asecit alotuŋa.

²²Ani kerae ekepukan a ŋituŋa eseci pa iredakinit, ido kitiya ŋuna nyecamakinito ŋakiciketa ŋuna ke Ekapolon ka Akuj keŋ, esecit iŋes.

²³Ani keyenu iŋes asecit keŋ ŋina itiyat, emaikina iŋes yau ikwapei ainakinet ekoroe ŋolo ajokan ŋolo emam neni eŋwalit.

²⁴Emaikina iŋes kidokok akan keŋ nakou ke ekoroe a ŋol, ido toarak nakibois ŋina sek earanakinio ŋainakineta ŋuna epeyo alokiŋaren Ekapolon. Erae ainakinet ŋin aŋuna ka asecit.

²⁵Ani ekaku, emaikina esacaradoti tolemu ŋaokot ŋadi anainakinet a aŋuna ka asecit a ŋin, kilumok ekimoin keŋ, ido ya kiosak loboorei ŋulu esibito ŋamomwar alokoonae anamuroet a ŋina icunyere ŋainakineta. Ŋaokot ŋunace ŋuna idoŋete, emaikina iŋes tobukok kwap namuroet.

²⁶Emaikina iŋes kicuny asepwae daadaŋ alokidiama namuroet lopite ŋolo ecunyia iŋes ŋina ka ainakinet a ŋina ke ekisil. Alopite a ŋol, emookuni esacaradoti ituŋanan ŋin anasecit keŋ, ido isyonio ituŋanan ŋin.

²⁷Ani kerae ipei alokidiŋ ŋituŋa ŋuluce daadaŋ eseci pa iredakinit akitiya ŋuna nyecamakinito ŋakiciketa ŋuna ke Ekapolon, esecit iŋes.

²⁸Ani keyenu iŋes asecit keŋ ŋina itiyat, emaikina iŋes yau ameot ŋina ajokan ŋolo emam neni eŋwalit ikwapei ainakinet aŋuna ka asecit keŋ.

²⁹Emaikina iŋes kidokok akan keŋ nakou ka ainakinet a ŋina elemarere asecit a ŋin, ido nai toarak nakibois ŋina sek icunyere ŋainakineta ŋuna epeyo.

³⁰Ani ekaku, emaikina esacaradoti tolemu ŋaokot ŋadi, kilumok ekimoin keŋ, ido ya kiosak loboorei ŋulu esibito ŋamomwar alokoonae anamuroet a ŋina icunyere ŋainakineta ŋuna epeyo. Ŋaokot ŋunace ŋuna idoŋete, emaikina iŋes tobukok neni ewuar namuroet.

³¹Emaikina esacaradoti tolema asepwae daadaŋ lopite ŋolo alemanarere ŋina ka ainakinet a ŋina ke ekisil, ido emaikina kicuny alokidiama namuroet ikwapei ainakinet ŋina epeyo, ŋina ebob eure keŋ aneni ke Ekapolon. Alopite a ŋol, emookuni esacaradoti ituŋanan ŋin anasecit keŋ, ido isyonio ituŋanan ŋin.

³²Ani keyau ituŋanan ŋin amesek ikwapei ainakinet aŋuna ka asecit keŋ, emaikina iŋes yau amesek ŋina ajokan, ŋina emam neni eŋwalit.

³³Emaikina ituŋanan ŋin kidokok akan keŋ nakou ka amesek a ŋin, toar erae ainakinet aŋuna ka asecit keŋ, toarak nakibois ŋina sek earanakinio ŋainakineta ŋuna epeyo.

³⁴Ani irikakin, emaikina esacaradoti tolemu ŋaokot ŋadi ŋuna ka ainakinet a ŋin a aŋuna ka asecit, kilumok ekimoin keŋ, ido kiosak loboorei ŋulu esibito ŋamomwar alokoonae anamuroet a ŋina icunyere ŋainakineta ŋuna epeyo. ŋaokot ŋunace ŋuna idoŋete, emaikina iŋes tobukok neni ewuar namuroet.

³⁵Emaikina esacaradoti tolemu asepwae daadaŋ lopite ŋolo alemarere ŋina ka ainakinet a ŋina ke ekisil, ido emaikina kicuny alokidiama namuroet kaapei ka ŋainakineta ŋuna epeyo aŋuna ke Ekapolon. Alopite a ŋol, emookuni esacaradoti ituŋanan ŋin anasecit keŋ a ŋina abu kitiya, ido isyonio ituŋanan ŋin.