Read ngakarimojong Ŋilep. 8 Bible Online

Ŋilep. 8 - ngakarimojong bible

Ŋilep. 8

¹Tema Ekapolon neni a Moses,

²“Ya Aron ka ŋidwe keŋ ŋulusapa, ŋilowi kec, akimyet ŋina iosere ŋituŋa, emoŋ ŋolo erae ainakinet aŋuna ka asecit ka ŋimeesekin ŋiarei ta ebukit ŋolo eya ŋamugati ŋuna emam ŋakinyalet.

³Tonyarau ŋituŋa daadaŋ potu lopuke ŋolo ke eema a ŋolo ilipere.”

⁴Abu nai Moses kitiya ikwapei ecikitor Ekapolon iŋes. Ani kedaut ŋituŋa acunakin lopuke ŋolo ke eema a ŋolo elipere,

⁵tema Moses neni a ŋituŋa, “Ŋakiro nu ikes ekecik ayoŋ Ekapolon akitiya.”

⁶Yau nai Moses Aron ka ŋidwe keŋ ŋulusapa kiŋaren, ido kiloŋa ikes a ŋakipi.

⁷Kitanapik Moses Aron esati, toenik arokoba nacir ka Aron, kitanapik ekaaso, ido kitanapik arapet, kimijak arapet nacir ka Aron a arokoba a ŋina adonyunitoe isibusitae ejok nooi.

⁸Kitanapik Moses Aron eboli, ido kiwuak ŋiboro lu loboli: Ibore ŋini isileereununui ŋakiro ŋini enyaritae Urim [2] [3]

⁹Kitanapik nai Moses akopiya nakou ka Aron, ido todapak ebokot ŋolo ke egolid kiŋaren nakopiya, arae ebokot ŋol ŋolo asegan ŋolo ke etal. Abu Moses kitiya ŋun, lopite ŋolo ecikitor Ekapolon iŋes.

¹⁰Tolemu nai Moses akimyet ŋina iosere ŋituŋa, ido kiosak loeema ka loboro daadaŋ ŋulu aya tooma nen, kitaleu ikes.

¹¹Abu nai iŋes kipakak akimyet ŋin ace namuroet ŋawuatakinet ŋakanikaarei. Kitaleu amuroet ka ŋiboro keŋ daadaŋ kaapei ka abesen ta neni ewuar namuroet.

¹²Abu Moses kiwosak akimyet ŋin ace nakou ka Aron kitaleu iŋes.

¹³Yau nai ŋidwe ka Aron ŋulusapa kiŋaren, kitanapik ŋisatyo, ŋarokobae ka ŋakopiyae, lopite ŋolo ecikitor Ekapolon iŋes.

¹⁴Toriku Moses kiŋaren emoŋ ŋolo arae ainakinet aŋuna ka asecit, ido apotu Aron ka ŋidwe keŋ ŋulusapa kidokokis ŋakan kec nakou ke emoŋ a ŋol,

¹⁵toarae nai emoŋ ŋol. Tolemu Moses ŋaokot ke ekimoin keŋ, kiwosak loboorei ŋulu asibito ŋamomwar anamuroet aŋuna ka akitaleun namuroet. Tobukok ŋaokot ŋunace ŋuna idoŋete neni ewuar namuroet. A ŋun, abu Moses kitaleu amuroet tomooku.

¹⁶Tolemu daŋ Moses asepwae daadaŋ ŋina a ŋiboro ka akook ka ŋatune ke emany ta ŋiŋalur ka asepwae kec, kicuny alokidiama namuroet.

¹⁷Nai abu iŋes ya ejamu ŋolo ke emoŋ, akiriŋ ka ŋiboro ka akook kicuny alokiŋa alomar, lopite ŋolo ecikitor Ekapolon iŋes.

¹⁸Toriku nai Moses kiŋaren emesek ŋolo erae ainakinet ŋina epeyo. Kidokokis Aron ka ŋidwe keŋ ŋulusapa ŋakan kec nakou ke emesek a ŋol,

¹⁹ido nai toarae. kipakak nai Moses ŋaokot lowaetin a namuroet daadaŋ.

²⁰Kileny ŋinerin a emesek, ido kicuny akou ka ŋinerin ŋul ta asepwae.

²¹Kilot nai a ŋakipi ŋiboro ŋulu ka akook a emesek kaapei ka ŋimolokony, ido kicuny emesek daadaŋ erae ainakinet ŋina epeyo, ŋina ebob eure keŋ aneni ke Ekapolon, ŋina erae ainakinet neni ke Ekapolon ŋina epeyo, lopite ŋolo ecikitor Ekapolon iŋes.

²²Toriku nai Moses emesek ŋolo a ŋiarei kiŋaren, arae emesek ŋol ŋolo ituruworere ituŋanan esacaradoti. Apotu Aron ka ŋidwe keŋ ŋulusapa kidokokis ŋakan kec nakou a emesek a ŋol,

²³ido nai toarae. Tolemu Moses ŋaokot ŋadi alomesek a ŋol, kiosak lokabonibonit ka Aron ŋolo anakit a ŋina aloteten ka lokimoin ŋolo apolon ŋolo ka akan a ŋina aloteten ta lokimoin ŋolo apolon ŋolo ka akeju a ŋina aloteten.

²⁴Kedau ŋun, abu Moses yau ŋidwe ka Aron ŋulusapa kiŋaren, kiosak ŋaokot lokabonibon kec ŋulu aloteten ka lomoyo ŋulu apolok ŋulu a ŋakan kec a ŋuna aloteten ta lomoyo ŋulu apolok ŋulu a ŋakejen kec a ŋuna aloteten; kipakak nai ŋaokot ŋunace daadaŋ lowaetin a anamuroet daadaŋ.

²⁵Tolemu asepwae, asonyok, asepwae ŋina a ŋiboro ka akook daadaŋ, ŋatune ke emany ka ŋiŋalur ka asepwae kec ta amuro ŋina aloteten.

²⁶Tolemu alobukit a ŋolo aya ŋamugati ŋuna emam ŋakinyalet a ŋolo ayai kiŋaren Ekapolon amugati apei ŋina amam ŋakinyalet, apei ŋina epounitoe ka akimyet ka abisikot. Kidokok ŋamugati ŋun kidiama asepwae ka amuro ŋina aloteten.

²⁷Kidokok nai ŋul daadaŋ nakan ka Aron ka nakan a ŋidwe keŋ a ŋulusapa, ido kikyaa kidiama ikwapei ainakinet ŋina ikyaaritae alokiŋaren Ekapolon.

²⁸Ekaku kijaa Moses aneni kec, ido kicuny alokidiama namuroet kaapei ka ainakinet ŋinace ŋina epeyo. Arae ainakinet ŋin ŋina ituruworere ituŋanan esacaradoti, ainakinet ŋina ebob eure keŋ alokiŋaren aneni Ekapolon, ŋina epeyo aŋuna ke Ekapolon.

²⁹Tolemu nai Moses atorobu ke emesek a ŋol kikyaa kidiama ikwapei ainakinet ŋina ikyaaritae alokiŋaren Ekapolon. Arae ŋol ekiner a Moses ŋolo ke emesek a ŋolo eruworor ituŋanan esacaradoti, epite ŋol ecikitor Ekapolon iŋes.

³⁰Kedaun ŋun, abu Moses tolemu akimyet adio ŋina iosere ŋituŋa ka ŋaokot ŋadi alokidiama namuroet, kipakak neni ka Aron ka lolowi keŋ ta neni a ŋidwe keŋ a ŋulusapa ka lolowi kec. Epite ŋol iŋes abunio Moses kitaleunio Aron ka ŋilowi keŋ ta daŋ ŋidwe ka Aron ŋulusapa ka ŋilowi kec

³¹Tolimok Moses Aron ka ŋidwe keŋ ŋulusapa tema, “Kidorokis akiriŋ ke emesek a ŋol alopuke ke eema a ŋolo ilipere, ido tonyama a nen kaapei ka ŋamugati ŋuna eya lobukit ŋolo a ŋamugati a ŋuna ituruworere ituŋanan esacaradoti, lopite ŋolo ekecikitere ayoŋ ebe, ‘Emaikina Aron ka ŋidwe keŋ ŋulusapa tonyama akimuj ŋin,’

³²ido nai akiriŋ ka ŋamugati ŋuna epiyanun, emaikina iyes kicunya.

³³Nyemaikina iyes ŋirwa ŋikanikaarei toloto kiŋa epuke ŋolo ke eema a ŋolo ilipere akitodol akoloŋit ŋina edaunotor ŋirwa ŋulu ikituruworere iyes ŋisacaradotin, anerae iayete iyes ŋirwa ŋikanikaarei anakituruworo ŋisacaradotin;

³⁴itiyao lopite ŋolo etiyaare nakoloŋit na, adau Ekapolon akicik atemar kitiyae ikona aŋuna ka amookun iyes.

³⁵Emaikina iyes kiboiyoto ŋirwa ŋikanikaarei apaaran ka akuwar alopuke ke eema a ŋolo ilipere, kitiyata ŋuna ecamit Ekapolon iyes kitiyata, ikotere nyitwaka; anerae ŋuna abu Ekapolon ekecikak ayoŋ ikes ŋun.”

³⁶Aŋun, apotu Aron ka ŋidwe keŋ ŋulusapa kitiyata daadaŋ ŋuna abu Ekapolon kicikak ikes aneni a Moses.