Read ngakarimojong Yer. 10 Bible Online

Yer. 10 - ngakarimojong bible

Yer. 10

¹Okoe ŋituŋa a Isirael, kiirasi ŋakiro ŋuna ikilimokinit Ekapolon iyes,

²anerae alimu iŋes ebe, “Nyiyenut ŋipitesyo a ŋituŋa a ŋakwapin, kori nyikikadak iyes aŋuna a ŋakujuwuanisya a ŋuna itiyanakin alokidiama, anerae ekadakinit ŋituŋa ŋulu a ŋakwapin aŋuna a ŋakiro a ŋun.

³Erae ŋitalyo a ŋituŋa ŋikoŋinae, eyepunete ikes ekitoe anamoni, ido kiceu ka aep ituŋanan ŋini eyeni akicere ibore;

⁴tosodo ŋituŋa kisibusa iŋes a esilipa ka a egolid, toruconokis akitoe ŋin a ŋisumari ka a enyondo, ikotere nyepedo akiloiloo.

⁵Ikwaan ŋakujo kec ka ŋiboorei ŋulu itwarere ŋikyeny alomanikor a ŋolo itakinitae ŋakolil, nyepedorete ŋakujo ŋun akirworo, iwokitae ikes anerae nyepedorete alosit. Nyikuryaketa aŋuna kec, anerae nyepedorete ikes akitiya aronis, kori nyepedorete daŋ akitiya ajokis.”

⁶Okoe Ekapolon mam ituŋanan ikwaanatar iyoŋ, ipol iyoŋ ka epol ekiro kon eyakar apedor;

⁷okoe erwosit a ŋituŋa a ŋakwapin, ŋae nyikikerit iyoŋ, anerae emaikina ikikeritae iyoŋ alokidiŋ ŋikaosok anakwapin ka anapukasinei kec a daadaŋ, mam ituŋanan ikwaan ka iyoŋ.

⁸Imasimasit ka ebaŋaaka ikes daadaŋ; emam akitatam ŋina ejok ŋina eryamunete ikes aneni a ŋakujo a ŋunacaryo.

⁹Erae ŋakujo ŋun esilipa ŋolo ityekunitae alo Tarisis, erae egolid ŋolo alo Upas. Erae ŋikaramak ŋitorubei eramunito, erae ikes etic a ŋulu ityekete ŋiboro a egolid; erae ŋilowi kec ŋulupusiyek ka ŋulu kipura-areŋak ŋituŋa ŋulu eyenete akitiya ŋiboro ikes etiyaunete ŋilowi ŋul.

¹⁰Nai erae Ekapolon Akuj ŋina a kire, erae iŋes Akuj ŋina eyari ka erwosit ŋolo a ŋikaru ka ŋikaru. Ani enyunyurikin iŋes, tomaranik akwap ka nyepedorete ŋituŋa a ŋakwapin akidaŋidaŋ aŋoit keŋ.

¹¹Aŋun tolimok ŋituŋa ebe, “Emunyaryo anakwap ŋakujo ŋuna pa arae ikes etiyaunete ŋiboro ŋulu alokidiama ka ŋulu alokwap, eŋopiyarete ikes alokwap ka kidiama.

¹²Erae Ekapolon iŋes asubuni akwap a apedor keŋ, iŋes ewuakini akwap a aosou keŋ, iŋes anayenut keŋ apetakini kidiama.

¹³Ani irworikini iŋes, kiguryakin ŋakipi alokidiama, itonyouni iŋes ekuno anakisalet a akwap. Iwuanakini iŋes akimilya toyakaun apaki ŋina eyakar akiru, eyaununui iŋes ekuwuam tokut anakibois a ŋina sek eyai.

¹⁴Imasimasit ŋituŋa daadaŋ ka emamukatar aosou; irumete ŋileec ŋituŋa ŋulu itiyaununete ŋakujo a egolid, anerae erae ŋitorubei kec ŋulu ka alyokonu ka emam ekieŋanu eyai lotorubei ŋul.

¹⁵Erae ŋitorubei ŋul ŋicaryo, erae ŋulu itiyaunitae aŋuna ka ajamuwaro; apaki ŋina isicanere ikes, eŋopiyarete ikes.

¹⁶Nyikoni Akuj a Yakob nen, anerae iŋes etiyauni ŋiboro daadaŋ ka erae ŋituŋa a Isirael ŋulu keŋ, erae ekiro keŋ Ekapolon ŋolo a ŋajoresyo.”

¹⁷Okoe ŋituŋa a Yerusalem, tocunakisi ŋiboro kus, iyes ŋulu adaun akirikaun,

¹⁸anerae irworo Ekapolon ŋakiro nu ebe, “Apaki na, eritari ayoŋ ŋituŋa anakwap, ayauni ŋican neni kec, ikotere enomori ikes.”

¹⁹Kikalout ŋituŋa a Yerusalem temasi, “Ikiwani isua nooi, nyeŋaleunete ŋajemei kosi. Atamyo sek isua atemar kori epedoryo akidaŋidaŋ.”

²⁰Enyasun ŋiemae kosi, atubutuboor ŋaunoi kosi, aloto ŋidwe kosi aneni kosi, a ŋopiyasi jik, mam ituŋanan ikiŋarakini adukokin nabo ŋiemae kosi, mam ituŋanan epedori akinenekin ŋanaŋgae loemae kosi,

²¹anerae imasimasit ŋikepukak, nyiŋitasi aneni ke Ekapolon ŋakiro ŋuna emaikina kitiyae; aŋun, nyerubakina ikes ipukato ka ealar ŋituŋa daadaŋ ŋulu epukato ikes.

²²Kiirasi ecelet! Topupokisi, ebunit, ebunit egurigur ŋolo apolon anakwap a ŋina alo Kuju; ebunit iŋes akituruwor ŋitaunio a Yudaya daadaŋ ŋireŋoroto, akituruwor nen neni iboiyoto ŋikweei.

²³Okoe Ekapolon, ayeni ayoŋ atemar, nyepedorito ŋituŋa akiyokuun akiyar kec, nyepedorete ikes akiten akiyar kec.

²⁴Ekapolon kisicanae isua, nai anakiyookino, nyikisican isua anaŋoit kon, anerae acepaki ikimunyari iyoŋ isua daadaŋ.

²⁵“Tobukok anyunyura kon neni a ŋituŋa a ŋakwapin a ŋulu nyikiyenete iyoŋ ka neni a ŋituŋa a ŋulu nyenyarito ekiro kon, anerae amunayasi ikes ŋiletok a Yakob, amunyasi ŋiletok keŋ, emam ŋini idoŋit nakwap, eturuwosi akibois kec akoŋinait.”