Read ngakarimojong Yer. 13 Bible Online

Yer. 13 - ngakarimojong bible

Yer. 13

¹Abu Ekapolon okolimok ayoŋ tema, “Tolot togyelu aŋuna kon elou ŋolo amilimilan ŋolo enapyo anacir, ido tonap anacir kon, nai nyilumok iŋes nakim.”

²Aŋun, abu ayoŋ ogyel elou ŋolo amilimilan, lopite ŋolo akalimokinitor Ekapolon ayoŋ, ido anap anacir.

³Abu nabo Ekapolon okolimok ayoŋ alimokinet ŋina a ŋaarei tema,

⁴“ya elou ŋolo amilimilan ŋol ka ŋolo inapit, tolot naŋolol Eupurates, kiwua iŋes anaŋicet a taba.”

⁵Aŋun, abu ayoŋ elot, ewua elou ŋol anaŋolol Eupurate, lopite ŋolo ekicikitor Ekapolon ayoŋ.

⁶Kelunyar ŋarwa ŋuna alalak abu Ekapolon okolimok ayoŋ tema, “Tolot tokona naŋolol Eupurate, tolemu elou ŋolo sek ekicikit ayoŋ iyoŋ akiware a nen.”

⁷Abu nai ayoŋ olot naŋolol Eupurate oboka, olomu anakibois aŋina sek ewaitor ayoŋ elou ŋolo enapitae anacir. Nai kebu elou tonyamun, amam pa ajok jik.

⁸Kiwor nai Ekapolon neni kaŋ tema,

⁹“Ŋakiro kaŋ ikes nu: Amunaari ayoŋ akituro a ŋituŋa a Yudaya ka akituro a ŋituŋa a Yerusalem lopite ŋolo amunaaror elou ŋol.

¹⁰Ikwaanikonosi ŋituŋa ŋul ka elou ŋolo enapitae anacir ŋol ŋolo emam nabo ajokis eyakar. Erae ŋituŋa ŋul ŋulu itiyaete ŋuna aronok, awout akiwuap ŋakiro kaŋ ka anakisyaanu kec ewuapa ŋuna ecamito ikes, alot daŋ akilipenen neni a ŋakujo a ŋace ka akitiyanakin ikes.

¹¹Ikwaŋina imidiikinor nacir a ituŋanan elou ŋolo enapitae anacir abu ayoŋ eturuwo ŋituŋa a Isirael ka ŋituŋa a Yudaya daadaŋ ŋulu imidikina neni kaŋ, ikotere eruworotor ikes aŋuna kaŋ ŋituŋa kaŋ, eryamuna ekiro kaŋ akipuro ka apolou, nai apotu ikes nyiwuapa ŋakiro kaŋ.”

¹²Kirwor Ekapolon neni kaŋ tema, “Emaikina iyoŋ tolimok ikes ŋakiro nu atemar, ebala Ekapolon Akuj a Ŋisirael ebe, ‘Emaikina kilelebikinae epiini namoti daadaŋ ŋuna sek ituranakinio epiini?’ Nai ikilimokinete ikes iyoŋ ebe, ‘Itami iyoŋ nyikiyeni isua atemar emaikina epiini kiwuakinae namoti ŋuna sek ituranakinio epiini a?’

¹³Tosodi, ilimokini iyoŋ ikes ebe, ‘Eapi ayoŋ akitemerakin ŋituŋa a akwap ana, ikes ŋirwosi ŋulu ipukato ŋituŋa lopite ŋolo epukator Daudi, ŋisacaradotin, ŋikadwarak ka ŋituŋa daadaŋ ŋulu iboiyete alo Yerusalem.

¹⁴Etidiŋakini ayoŋ ikes make, ediŋakinosi ŋikauryak ka ŋidwe kec, kori nyaiuni idio tuŋanan apaki ŋina abunio ayoŋ amunyar ikes.’ ”

¹⁵Ŋituŋa a Isirael kiirasi ka topupokisi nyisyaaketa anerae adau Ekapolon akirwor.

¹⁶Kitopoloosi Ekapolon Akuj kus eriŋa iŋes nyeyauna akiryonut nyikigukinia iyes alomoru apaki ŋina edoiyorya akoloŋ, kiirasi ŋakiro keŋ eriŋa iŋes nyelemara akica ŋina iitanito iyes eriŋa iŋes nyeyauna akiryonut ŋina alalan.

¹⁷Nai ani pa kiirasi iyes ŋakiro keŋ, alosi ayoŋ akigwor anakimunono aŋuna kaakituro kus egwori ayoŋ nooi kibwaliyasi ŋakiyo ŋakonyen kaŋ anerae erikoryo ŋituŋa a Ekapolon nakwap ace.

¹⁸Abu nai Ekapolon okolimok ayoŋ tema, “Tolimok erwosit ka arwosit ebe, ‘Kitiditeun bon anerae alemar ebokot ŋolo ebusan anakou kon,

¹⁹erikaun ŋitaunio ŋulu eya Negeb mam ituŋanan epedori atubor neni kec, arikor ŋituŋa a Yudaya daadaŋ nakwap ace, arikor ikes daadaŋ mam ŋini edoŋ.’”

²⁰Ŋituŋa a Yerusalem, kirereiyosi kiŋolikis, ŋituŋa ŋulu eponito alo Kuju. Ai eya ŋamesekin kus ŋulu aponi ikiinakin iyes, ai eya ŋamesekin kus ŋuna ebusak?

²¹Anukiro ilimunete iyes apaki ŋina eponiata ŋituŋa ŋulusek iriito ka iyes? Nyiryabakinosi iyes lopite ŋolo eryabar aberu ŋina eapi akidoun a?

²²Tosodi ani kitama iyes alotai kus ebe, “Kaanukiro etiyakinotor ŋakiro nu neni kosi?” Etiyakin ŋun neni kus anerae alalaketa ŋiticisyo kus ŋulu aronok, ŋakiro ŋun iŋes ikirasere iyes.

²³Epedorete mono ŋituŋa ka Esiopia akilocokin eyakae a ŋawat kec a? kori epedori eris akilocokin ŋameriyek keŋ a? Iŋes atemar iyes daŋ ipedorete akilocokin ŋiticisyo kus ŋulu aronok toruworos ŋulu a jokak.

²⁴Ekeelari ayoŋ iyes lopite ŋolo ekutarya ekuwam ŋikabinin analoŋisat.

²⁵Erae ŋun ŋakiro ŋuna itiyakin neni kus anerae ekemuryak ayoŋ iyes, ido igyenokinosi amodiyo.

²⁶Ayoŋ elope alacari ŋilowi kus ekemyek iyes ilerete kiŋolikis ŋituŋa ŋileec kus.

²⁷Adau ayoŋ akiŋolikin ŋiticisyo kus ŋulu aronok, epite ŋolo iloseneneoto iyes akilip neni a ŋitorubei aŋakujo alomoru ka anakadipaalae ikerete isibito ekile ŋolo imunit aberu a ekidunyet keŋ kori ikwa