Read ngakarimojong Yer. 19 Bible Online

Yer. 19 - ngakarimojong bible

Yer. 19

¹Abu Ekapolon okolimok ayoŋ tema, “Tolot togyel amot aneni a ekayan ŋamoti. Torukosi kaapei ka ŋikasikou a ŋituŋa ŋidi ka ŋisacaradotin ŋulu apolok ŋidi,

²toloto nakadipaalat ŋina a lokoku a Inom ŋina eyai lopuke ŋolo enyaritae Epuke a atabok. Kisera a nen ŋakiro ŋuna akalimokini ayoŋ iyoŋ.”

³Tolimok ŋituŋa ebe, “Okoe ŋirwosi a Yudaya ka ŋituŋa ŋulu iboiyete alo Yerusalem, kiirasi ŋakiro a Ekapolon, irworo Ekapolon ŋolo a ŋajoresyo Akuj a Ŋisirael atemar ayauni ayoŋ nakibois na ŋican ŋulu ani iirari ituŋanan toryaŋakin kijik ŋaki,

⁴anerae akaŋero ŋituŋa kaŋ ayoŋ ka enyasut akibois na aŋuna ainakiniata a nen ŋainakineta neni a ŋakujo a ŋace, ŋakujo ŋuna pa ayenete ikes, kori atapapaa kec, kori ŋirwosi a Yudaya ka aŋuna elelebikiniata ikes akibois na ŋaokot a ŋituŋa a ŋulu emam ŋakiro esecito,

⁵arubakis daŋ edukete ŋakiboisyo ŋuna aoyak aŋuna a Baal, apeyo anakim ŋidwe kec ikwapei ŋainakineta ŋuna epeyo aŋuna a Baal, ŋakiro ŋuna nyicika, kori nyetubuno ayoŋ atemar kitiyae ka nyetamuna ayoŋ ŋakiro kaŋ tari ŋina erae atamun.

⁶Aŋun, kire jik, alimu Ekapolon atemar epote ŋirwa ŋulu nyenyaraere nabo akibois na Topes, kori akadipaalat alokoku a Inom, nai enyarao iŋes akadipaalat ŋina eŋolere.

⁷Tosodi anakibois a na, eturuwori ayoŋ ŋakiro ŋuna eyeete ŋituŋa a Yudaya ka Yerusalem ŋakoŋinae. Ainakini ayoŋ tomunyarae ikes a ekileŋ alokiŋaren ŋimoe kec, earete ŋulu imanito ikes ŋituŋa a Yudaya ka ŋituŋa a Yerusalem. Emyekini ayoŋ ŋawat kec toruwor akimuj a ŋikyeny ka a ŋityaŋ a ŋulu ka ariet.

⁸Eturuwori ayoŋ etaun lo ŋolo a ŋinyas, etaun ŋolo ejamuwaryo. Ebuli ituŋanan daadaŋ itori diyete keŋ ka ejamuwari etaun ŋol aŋuna a ŋinyas a daadaŋ a ŋulu etiyakin lotaun ŋol.

⁹Tosodi ainakini ayoŋ ŋituŋa a Yudaya ka ŋulu a Yerusalem tonyama ŋawat a ŋidwe kec a ŋulusapa ka a ŋulupesur, enyamete daadaŋ ŋawat a ŋikidunyet kec anapaki a ŋina irikaunere etaun ka alocan a ŋulu iteryamunete ŋimoe kec ŋulu ecamito akiar ikes.

¹⁰“Ibwaŋi nai iyoŋ amot ŋin iteete ŋulu irukorete ka iyoŋ,

¹¹ido tolimok ikes ebe, ‘Alimu Ekapolon ŋolo a ŋajoresyo atemar, enyasuni ayoŋ ŋituŋa lu ka etaun lo, abwaŋi ikes lopite ŋolo ebwaŋia ituŋanan eborosit ŋolo eyeunit ekayan ŋamoti, eborosit ŋolo nyedonyunun jik. Enukete ikes ŋituŋa kec Topes tari ŋina emamukaunor neni enukakinio ŋituŋa.

¹²Etiyae ayoŋ ŋun nakibois na ka neni a ŋituŋa a ŋulu iboiyete a nen, kikwaanikin etaun lo ka Topes.

¹³Itoroniyaryo ŋakais a Yerusalem ka ŋakais a ŋirwosi a Yudaya, lopite ŋolo etoroniyarere Topes, itoroniyaryo ŋakais daadaŋ ŋuna aponi inakinae ŋainakineta alokidiama kec neni a ŋiboorei a ŋulu alokidiama ka neni ainanakinere ŋainakineta ŋuna a ŋimaten neni a ŋakujo a ŋace.’ ”

¹⁴Ani eboŋuni Yeremia alo Topes aneni eyakiyarit Ekapolon iŋes adwarya ŋakiro, abu iŋes towo analapatu a ŋina a Akai ka Akuj, tolimok ŋituŋa daadaŋ tema,

¹⁵“Alimu Ekapolon ŋolo a ŋajoresyo Akuj ŋina a Ŋisirael ebe, ‘Ayauni tokona ayoŋ lotaun lo ka lotaunio a Yudaya daadaŋ ŋican daadaŋ ŋulu adau ayoŋ alimun aremokino ikes, anerae etogogoŋo ŋituŋa kec ŋakyes, awout akiirar ŋakiro kaŋ.’”