Read ngakarimojong Yer. 25 Bible Online

Yer. 25 - ngakarimojong bible

Yer. 25

¹Alokaru a ŋolo a ŋiomwon ipukat erwosit Yeoiakim lokoku a Yosia a ŋolo a Yudaya (Torae ŋol ekaru ŋolo esyaunan ipukat erwosit Nebukadinesar ŋolo a Babilob) kirwor Ekapolon neni a Yeremia aŋuna a ŋituŋa a Yudaya a daadaŋ,

²abu Yeremia ekadwaran tolimok ŋakiro ŋun ŋituŋa a Yudaya daadaŋ ka ŋituŋa daadaŋ ŋulu eboiyete alo Yerusalem.

³Ŋakiro ŋun ikes nu: Ameun alokaru a ŋolo a ŋitomon ka ŋiuni ipukat Yosia lokoku ka Amon a ŋolo a Yudaya tari nakoloŋit na, erae tokona ŋikaru ŋatomoniarei ka ŋiuni, erwor Ekapolon ŋakiro keŋ neni kaŋ ka adau ayoŋ akirwor ŋakiro ŋun neni kus ŋinapaki daadaŋ, nai nyiirara iyes.

⁴Tari ŋina arubakinitor Ekapolon ikiyakiyanakini iyes ŋiketiyak keŋ ŋikadwarak nyiirara iyes, kori nyepupokina daŋ,

⁵apaki ŋina ikilimokiniata ŋikadwarak iyes ebe, “Kilocokisi ŋipitesyo kus ŋulu aronok tokona, iyes ŋituŋa daadaŋ, kimyekisi akitiya ŋuna aronok, ido ipote iyes akiboi jik anakwap a ŋina abu Ekapolon ikiinak iyes ka neni atapapaa kus ŋinapei koloŋ sek tari ŋikaru ka ŋikaru,

⁶Nyiwuapa ŋakujo ŋace anakitiyanakin ka anakilipenen neni kec ka nyikitoŋoa ayoŋ a ŋiboro a ŋulu itiyaununeete iyes a ŋakan kus, kitiyata iyes ŋun nyetiyakini ayoŋ aronis adio neni kus.”

⁷Nai nyiwuapa iyes ŋakiro kaŋ, aŋun ikitoŋoa iyes ayoŋ a ŋiboro kaŋ, aŋun ikitoŋoa iyes ayoŋ a ŋiboro a ŋulu itiyaununeete iyes a ŋakan kus, ŋakiro ŋun ikiinakis iyes ŋican.

⁸Aŋun, alimu Ekapolon ŋolo a ŋajoresyo ebe, “Aŋuna pa aponere iyes kiwuapae ŋakiro kaŋ,

⁹Anyarauni ayoŋ ŋituŋa a ŋikabilae a ŋulu a lo Kuju ka a eketiyan kaŋ Nebukadinesar ŋolo a Babilon, ayauni ayoŋ ikes kitijioto akwap na anyarauni ayoŋ ikes kitijioto ŋituŋa a Yudaya ka ŋituŋa a ŋakwapin a daadaŋ a ŋuna idunyatar ikes. Amunyari ayoŋ ikes jik, eturuwo ikes ŋulu ebulit ka ŋulu irumito ŋileec ta ŋulu inyasuna ŋikaru ka ŋikaru.

¹⁰Alemari ayoŋ aneni kec ecelet ŋolo ka alelyanu ka ecelet ŋolo ka alakara, alemari ayoŋ ecelet ŋolo a eteran ka ŋolo a ateran, ecelet ŋolo ka amoru a ŋinakiryeet ka akica ŋina a etaa.

¹¹Inyasunio akwap na daadaŋ ka eruwor acaryoit, ido epote ŋituŋa a ŋakwapin a ŋun akitiyanakin erwosit a Babilon ŋikaru ŋatomonikanikaarei.

¹²Ekaku a ŋikaru a ŋatomonikanikaarei esicani ayoŋ erwosit a Babilon ka ŋituŋa a akwap a ŋin, akwap a Ŋibabiloniyae, aŋuna ka asecit kec, eruwor akwap ŋin acaryoit ŋikaru ka ŋikaru.

¹³Esiyookini ayoŋ aŋuna ka akwap a ŋin ŋakiro daadaŋ ŋuna abu ayoŋ olimu emanit iŋes, iyookin ŋakiro daadaŋ ŋuna a ŋiman ŋuna abu Yeremia todwar ŋuna igiritae lokitaabo lo, ŋakiro ŋuna a ŋituŋa a ŋakwapin a daadaŋ,

¹⁴anerae epote ŋituŋa a ŋakwapin a ŋuna alalak ka ŋirwosi ŋulu agogoŋok akituruwor ikes ŋipi, ido esicani ayoŋ ŋituŋa ka ŋirwosi ŋul aŋuna a ŋiticisyo kec ka aŋuna a ŋiboro a ŋulu itiyaununeete ikes a ŋakan kec.”

¹⁵Abu Ekapolon Akuj a Ŋisirael okolimok ayoŋ tema, “Tolema anakan kaŋ ekopo lo ŋolo ileleba epiini ŋolo ka anyunyura kaŋ, inak ŋituŋa a ŋakwapin a daadaŋ a ŋuna ekeyakiyari ayoŋ iyoŋ neni kec tomata epiini ŋol.

¹⁶Emasete ikes epiini ŋol, ido kiteritereonor ka tobaŋaaniyasi aŋuna a ejie a ŋolo eyakikini ayoŋ ikes.

¹⁷“Aŋun, abu ayoŋ ejau ekopo anakan a Ekapolon, oinak ŋituŋa daadaŋ a ŋakwapin a ŋuna abu Ekapolon ekeyakiya ayoŋ neni kec, apotu ikes tomata epiini ŋolo ayai lokopo ŋol.

¹⁸Ŋituŋa ŋulu apotu tomata epiini ikes lu: Ŋituŋa a Yerusalem ka ŋituŋa a ŋitaunio a Yudaya, ŋirwosi keŋ ka ŋikapolok. Apotu ŋitaunio ŋul toruworos ŋireŋoroto, ŋicaryo ŋulu ejamuwanaryo ka ŋulu icenio, lopite ŋolo eyakatar nakoloŋit na.

¹⁹Eryamunete ŋituŋa lu daŋ ŋican ŋul: Parao erwosit a Ijipit, ŋiketiyak keŋ, ŋikapolok ŋulu ipukatotor iŋes ka ŋituŋa keŋ daadaŋ,

²⁰ŋituŋa ŋulu inyalal daadaŋ, ŋirwosi daadaŋ ŋulu ka akwap a Us, ŋirwosi daadaŋ ŋulu ka akwap a Ŋipilistin, ikes Askelon, Gasa, Ekiron, ŋipiya ŋulu ka Acidod;

²¹eryamunete ŋituŋa ŋulu eya Edom, Moab ka Ŋiamoni,

²²ŋirwosi daadaŋ ŋulu a Tiro, ŋirwosi daadaŋ ŋulu a Sidon ka ŋirwosi a ŋakwapin a daadaŋ a ŋuna alokekwaye anam a ŋuna idunyito anam;

²³eryamunete ŋituŋa ŋulu eya Dedan, Tema, Bus ka ŋituŋa daadaŋ ŋulu ikebito ŋipeneka kec,

²⁴ŋirwosi daadaŋ ŋulu ka Arabia ka ŋirwosi daadaŋ ŋulu a ŋituŋa a ŋulu inyalal a ŋulu iboiyete analoŋisat;

²⁵ŋirwosi daadaŋ ŋulu a Simiri, ŋirwosi daadaŋ ŋulu ke Elam ka ŋirwosi daadaŋ ŋulu a Media,

²⁶ŋirwosi daadaŋ ŋulu a ŋakwapin a ŋuna alo Kuju, a ŋuna eapiyete ka a ŋuna alwanak eryamunete ŋulutuŋa ŋun ekaku a ŋuluce; eryamunete ŋapukasinei daadaŋ ŋuna ka akwap a daadaŋ ŋican ŋul. Ekaku kec daadaŋ, toryamu nai erwosit a Sesak.

²⁷“Ilimokini nai iyoŋ ikes ebe, ‘Alimu Ekapolon ŋolo a ŋajoresyo, Akuj a Ŋisirael atemar tomata, tomerakinos, toleka, ido kibusokinos nyinyout nabo aŋuna a ejie a ŋolo eyakuunit ayoŋ neni kus.’

²⁸“Ani kewout ikes akijaar ekopo anakan kon ikotere tomata, ilimokini nai iyoŋ ikes ebe, ‘Alimu Ekapolon ŋolo a ŋajoresyo atemar emaikina iyes tomata!

²⁹Kiirasi, ageu ayoŋ ayaun ŋican lotaun lo ŋolo enyaritae a ekiro kaŋ, ido ikokinete iyes ipuunosi anakisicanio ai? Nyibucarosi iyes pa ikisicanitae, anerae anyarau ayoŋ ŋituŋa akitijiore ŋituŋa ka akwap a daadaŋ.’

³⁰“Aŋun, idwari iyoŋ neni kec ŋakiro nu daadaŋ, ido tolimok ikes ebe, ‘Egirokini Ekapolon alokidiama ka irworikini anakibois keŋ a ŋina asegan, egirokini iŋes nooi imanit ŋituŋa keŋ, eceluni lopite ŋolo ecelatar ŋituŋa ŋulu ecuyete epiini, eceluni imanit ŋituŋa ŋulu iboiyete anakwap.

³¹Iiraryo ecelet a Ekapolon alowaetin a daadaŋ a ŋulu ka akwap, anerae eyakar Ekapolon akisitakinet neni a ŋituŋa a ŋakwapin. Ebunit iŋes akitub ŋakiro a ŋituŋa a daadaŋ, ido totubok atwanare neni a ŋulu iilit aŋuna itiyatotor aronis.’ ”

³²Alimu Ekapolon ŋolo a ŋajoresyo ebe, “Kiirasi, elosete ŋican anakwap a apei, kiroposi nakwap ŋinace ka ebunit ekuwuam ŋolo agogoŋon anakisaleta a akwap!

³³“Epetakin ŋawat a ŋituŋa a ŋulu eari Ekapolon kwap, ameun a epeiwae akisalet a akwap tari ŋoloce nyigworyo ŋituŋa ŋul, kori nyecunakinio, kori nyenukyo, imyekinio ikes a nen kikwaanikinos ka aoret alokidiama ŋalup.”

³⁴Iyes ŋikepukak, kiwololoto ka tocelutu igworosi, kibelibelokinos lokuron, iyes ŋikepukak a ŋituŋa, anerae adolut ŋirwa ŋulu ikiarere iyes ka ŋirwa ŋulu ikielarere iyes, ido ikielar lopite ŋolo ielaror amot ŋina ajokan.

³⁵Eŋopikini ŋikepukak neni eemete, nyebucarosi jik ŋikapolok a ŋituŋa.

³⁶Kiirasi epite ŋolo igworotor ŋikepukak, kiirasi epite ŋolo igworotor ŋikapolok a ŋituŋa, anerae amunya Ekapolon ŋituŋa kec,

³⁷enyasun neni sek iboiyoto ikes emam ŋace, enyasun nen aŋuna ka aŋoit a ŋina adedeŋan a ŋina a Ekapolon.

³⁸Emyek Ekapolon akibois keŋ, lopite ŋolo imyekinia eŋatuny adui keŋ, anerae aruwor akwap a ŋituŋa keŋ acaryoit aŋuna a aryenyeo a ŋituŋa a ŋulu amunyasi ŋituŋa keŋ ka aŋuna a aŋoit keŋ a ŋina aryenyaanan.