Read ngakarimojong Yer. 3 Bible Online

Yer. 3 - ngakarimojong bible

Yer. 3

¹Ŋakiro ŋuna irworo Ekapolon ikes nu, “Ani kelak ekile aberu keŋ, ido tolot aberu ŋin aneni keŋ toruwor aberu a ekile a ece eboŋori mono iŋes neni a aberu a ŋin a? Nyeruwor mono ŋun ŋuna emunaarete akwap ŋin a? Itiyata iyes amalao ka ŋulu iminatar ŋulu alalak; ipedorete nai iyes aboŋun neni kaŋ a?

²“Kirereosi kidiama kiŋolikis ŋikamukumukui epite ŋolo aororunioto! Eyai mono akibois ne ŋina nyitiyatotor iyes ŋuna ka amalao a? Iboiyonokinosi iyes nawaetin a ŋirotin a ŋulu iminasi, lopite ŋolo iyokiunitotor ŋikeyokok ŋibaren analoŋisat. Imunaasi iyes akwap aŋuna ka amalao ka aronis kus.

³Aŋun, ikimiki iyes akiru, ido nyebuno neni kus akiru ŋina ieteunio akwap; kikote neni daŋ, irubakinito iyes itamete mono ekiŋaren ŋuna ka amalao, iŋero iyes acamun atemar ikiryamu ŋileec.

⁴Pa mono ariŋa sek iyes ikinyarito ayoŋ ibasi, ‘Papa, irae iyoŋ ekone kaŋ eriŋa ayoŋ asorokana,

⁵akaŋoikini mono iŋes ayoŋ ŋikaru ka ŋikaru ka erubakini mono iŋes eŋoit jik tari nasalunet a?’ Erae ŋol epite ŋolo irworotor iyes, nai idaut iyes akitiya aronis daadaŋ ŋina ipedorito akitiya.”

⁶Abu Ekapolon kirwor neni kaŋ alorwa a ŋulu epukator erwosit Yosia tema, “Iŋolik iyoŋ ŋuna adaut ŋituŋa a Isirael ŋulu emam anupit ŋul akitiya, epite ŋolo alosyoto ikes akilip lokamukumukui daadaŋ ka lokito daadaŋ ŋulu alibak akitiya ŋuna ka amalao a nen a?

⁷Abu ayoŋ otam otema, ‘Kedaut ikes akitiya ŋakiro ŋun daadaŋ eboŋunete ikes neni kaŋ,’ nai apotu ikes nyeboŋut ka apotu ŋikaitotoi kec ŋituŋa a Yudaya kiŋolikis ŋakiro ŋun.

⁸Apotu ŋituŋa a Yudaya kiŋolikis atemar aŋuna amalaaniyaryata ŋituŋa a Isirael ŋulu emam anupit ŋul, abu ayoŋ erita ikes atubokinit aŋuna ka amalao. Kikote neni daŋ apotu ŋituŋa a Yudaya ŋikaitotoi kec ŋulu adyakarito nyekuryaketa, nai apotu ikes daŋ toloto akilip neni a ŋakujo.

⁹Aŋuna atakania aneni a Ŋisirael esibit ŋakiro ŋuna ka akilip neni a ŋakujo ŋacaryo, apotu ikes tomunaasi akwap kec, apotu ikes kilipa neni ka amoru ka neni a ekitoe.

¹⁰Kikote neni daŋ apotu ŋituŋa a Yudaya nyeboŋut neni kaŋ a ŋitai kec a daadaŋ, nai anakitusubuna ŋulu kaŋ nyerae bo.”

¹¹“Abu nai Ekapolon kirwor neni kaŋ tema, ‘Etoodiut ŋituŋa a Isirael ŋulu emam anupit kec atemar nyiilit ikes nooi aŋuna ka asecit lopite ŋolo iilitor ŋikalyokonok, ŋituŋa ŋulu a Yudaya.

¹²Tolot kiserak ŋituŋa ŋulu alowae a ŋolo alo kuju ŋakiro nu atemar; toboŋutu, iyes ŋituŋa a Isirael ŋulu emam anupit, nyarubakini ayoŋ ekete iyes akaŋoikinit, anerae arae ayoŋ ŋolo esyonion, nyarubakini ayoŋ aŋoit ŋikaru ka ŋikaru.

¹³Nai emaikina iyes tocamut ŋuna ikiilitor iyes, emaikina iyes tocamut atemar ipotu iyes toŋero Ekapolon Akuj kus, ido toloto akilipenen neni a ŋakujo alokwap ŋikito ŋulu alibak daadaŋ ka nyiwuapa iyes ŋakiro kaŋ.

¹⁴Okoe ŋidwe ŋulu emam anupit, toboŋutu neni kaŋ, anerae arae ayoŋ Ekapolon kus. Akayaari ayoŋ iyes, ipei alotaun, ŋiarei alokal, okoya iyes lotaun Sion.

¹⁵“‘Akainakini ayoŋ iyes ŋikepukak ŋulu iwuapito ŋakiro kaŋ, ikipukaete nai ikes iyes ka aosou ka ayenut.

¹⁶Ani ipitunete iyes ilalakunete anakwap ŋirwa ŋul, nyelimunete nabo ŋituŋa ŋakiro ŋuna ka Asaduku a ŋina ka acamunet ke Ekapolon, emam ŋini etamuni Asaduku ŋin, kori emitakini, kori iwuakini natameta keŋ, kori emam nabo ace itiyaunio.

¹⁷Apaki ŋin, enyarao Yerusalem etaun ŋolo ipukator Ekapolon, ido ecununosi ŋituŋa a ŋakwapin Yerusalem, ecununosi ikes Yerusalem kiŋaren Ekapolon, nyerubakinete nabo ikes iwuapito akisyanu kec ŋina aronon.

¹⁸Alorwa a ŋul, imorikinosi ŋituŋa a Isirael ka ŋituŋa a Yudaya, epote ikes kaapei anakwap a ŋina alo Kuju a ŋina arikoritae ikes, epote nai ikes nakwap ŋina abu ayoŋ oinak atapapaa kec toruwor ŋina kec.

¹⁹“‘Abu ayoŋ otam epite ŋolo eketuruworya iyes ŋidwe kaŋ, ido okoinak iyes akwap ŋina ajokan, akwap ŋina ajokan, akilo ŋakwapin daadaŋ. Abu ayoŋ otamak atemar ikinyaraete iyes ayoŋ papa kosi ka nyiŋerete iyes akiwuap ŋakiro kaŋ.

²⁰Nai, lopite ŋolo eesikinia aberu ŋina nyikinyoma ekile keŋ, ipotu iyes daŋ toruwor ŋulu nyikinyoma aneni kaŋ okoe ŋituŋa a Isirael.’ ”

²¹“Epupio etoil ŋolo ebunit alokidiama ŋikamukumukui ŋulu aororut, epupio akigworo ka adyekitoi a ŋituŋa a Isirael, anerae enyasut ikes epite ŋolo eboiyoto, emuryak ikes Ekapolon Akuj kec.

²²Toboŋutu iyes ŋituŋa ŋulu emam akikinyoma, eketojokuni ayoŋ iyes anakiro aŋuna iponiata ikiŋeryoto ayoŋ. “Irworosi iyes ibasi, ‘Isua lu ikiboŋu neni kon, anerae irae iyoŋ Ekapolon Akuj kosi.

²³Kire jik, erae akilip neni a ŋakujo alokidiama ŋikamukumukui acaryoit, erae ainakina nooi akilip neni a ŋakujo alokidiama ŋimoru acaryoit. Kire jik, erae neni a Ekapolon Akuj yok eyai aiuno a Ŋisirael.’

²⁴“Ameun anasoroko yok, etoŋopiyasi ŋakiro ŋuna a ŋileec ŋuna itiyao iwon ibore daadaŋ ŋini apotu atapapaa yok toryamut, ŋamesekin kec, ŋaatuk kec, ŋidwe kec ŋulusapa ka ŋulupesur.

²⁵Emaikina iwon opero alokwap ka ŋileec yok, emaikina ikirapuwasi iwon ŋileec ŋulu nyitopolooritere iwon Ekapolon, anerae ikisec iwon aneni a Ekapolon Akuj yok, iwon kaapei ka atapapaa yok; ameun anasoroko yok tari nakoloŋit na, ido nyiwuapa iwon ŋuna irworo Ekapolon Akuj yok.”