Read ngakarimojong Yer. 32 Bible Online

Yer. 32 - ngakarimojong bible

Yer. 32

¹Alokaru a ŋolo a ŋitomon ipukat erwosit Sedekia Yudaya, torae daŋ ekaru ŋolo a ŋitomon ka ŋikanikauni ipukat Nebukadinesar, kiruwor Ekapolon neni a Yeremia.

²Apaki ŋin, erikaunito ŋasigarya a erwosit a Babilon Yerusalem, ayai ekadwaran Yeremia nalapatu ŋina ayakasi ŋasigarya ŋuna eyokiyete akai a apukan a erwosit a Yudaya,

³neni abu erwosit Sedekia kicik atemar kiboiyo Yeremia nyelot iwace. Kebu Sedekia tema, “Kaanukiro idwarya iyoŋ ebe, ‘Alimu Ekapolon atemar ainakini ayoŋ etaun lo napedor a erwosit a Babilon ka ikamari iŋes etaun lo.

⁴Nyesii erwosit Sedekia ŋolo a Yudaya anapedor a Ŋibabiloniyae, nai kire jik einakinio iŋes napedor a erwosit a Babilon, tosodi irworikinosi ikes iteosi ŋireetin,

⁵erikori erwosit a Babilon Sedekia Babilon, erubakini iŋes iboi a ina tari ŋina atamunia ayoŋ iŋes, tari kitiji iyoŋ Ŋibabiloniyae, nyilouni iyoŋ ikes.’ ”

⁶Tolimu Yeremia tema, “Abu Ekapolon okolimok ayoŋ ebe,

⁷Ebunit Anamel lokoku a mamae kon a Salum alimokin iyoŋ atemar, togyel emanikor kaŋ ŋolo eyai Anasos, anerae ikwapei iraakar iyoŋ eyenet kaŋ, iyakar iyoŋ apedor ŋinagyelet iŋes.

⁸Abu nai lokaaya kaŋ Anamel bu neni kaŋ ayai ayoŋ nalapatu ŋina eboiyoto ŋasigarya ŋuna iyokiyete akai ka apukan, kitiyakin ŋun lopite ŋolo alimunitor Ekapolon. Tema Anamel neni kaŋ, ‘Togyel emanikor kaŋ ŋolo eyai Anasos nakwap ŋina a Benjamin, anerae iyakar iyoŋ apedor ŋinagyelet ka ŋina ituruworya iŋes emanikor kon, togyel iŋes aŋuna kon.’ Abu nai ayoŋ oyenu atemar erae ŋun ŋakiro ŋuna alimunit Ekapolon.

⁹“Abu nai ayoŋ ogyelu aneni alokaaya kaŋ ka Anamel emanikor ŋolo ayai Anasos, ido epimak iŋes ŋicekelya ŋulu ke esilipa ŋitomon ka ŋikanikaarei.

¹⁰Abu ayoŋ ewuak akan kaŋ nacamunet ŋin, ogolok, oryamu ŋisuudae, tosodi epim ŋisiliŋa a ŋakipimet.

¹¹Tosodi oya abaruwa ŋina ka acamunet a ŋina agyelunia ayoŋ emanikor, ŋina ayakasi ŋakiro ŋuna ka acamun ka ŋuna iwuapyo, ido ayai daŋ abaruwa apei ŋina pa agolokinitoe;

¹²abu ayoŋ oinak abaruwa ŋina ka acamunet ŋin neni a Baruk a lokoku a Neria a ŋolo arae lokoku a Mesaia, toyai nen lokaaya kaŋ Anamel ka ŋisuudae ŋulu apotu kiwuakis ŋakan kec nabaruwa ŋina ka acamunet kaŋ ka Anamel, aya daŋ nen Ŋiyudayan ŋulu eboiyete analapatu a ŋina a ŋasigarya a ŋuna iyokiyete akai ka apukan.

¹³Abu ayoŋ ecik Baruk alokiŋaren ŋituŋa ŋul daadaŋ atemar,

¹⁴alimu Ekapolon ŋolo a ŋajoresyo, Akuj a Ŋisirael ebe, ‘Kijaa ŋabaruwae nu ŋina egolokinitoe ka ŋina eŋaara ŋuna ka acamunet kaŋ ka Anamel akigyel emanikor keŋ, kiwuak ikes namot, ikotere erubakinete eyakasi apaki ŋina aoyan nyemunaara,

¹⁵anerae alimu Ekapolon ŋolo a ŋajoresyo, Akuj a Ŋisirael atemar egyelyo moi nabo anakwap a na ŋakais, ŋimanikorin ŋulu a ŋikinyom ka ŋimanikorin ŋulu edupitae ŋikito a epiini.’ ”

¹⁶Torubak Yeremia irworo tema, “Kadau ayoŋ ainakin abaruwa ŋina ka acamunet neni a Baruk alokoku a Neria, abu ayoŋ elip neni ke Ekapolon otema,

¹⁷Okoe Ekapolon Akuj, arae iyoŋ isubuni nakuj ka nakwap ka apedor kon a ŋina apolon ka akan kon a ŋina agogoŋon, mam ibore ikipiyori iyoŋ.

¹⁸Itoodikinit iyoŋ amina ŋina nyiryaŋiryaŋa nanyameta ŋalipyo, nai isicani ŋidwe aŋuna a ŋasecisya a ŋikauruunak kec. Okoe Akuj ŋina apolon ka ŋina etiron ŋina erae ekiro kon Ekapolon ŋolo a ŋajoresyo,

¹⁹iloit iyoŋ daadaŋ anakitatam ka aloticisyo, ite iyoŋ ŋuna daadaŋ itiyaete ŋituŋa ka itaci iyoŋ ŋinituŋanan lopite ŋolo eyakatar ŋuna iwuapit iŋes ka lopite ŋolo itiyatotor ikes ŋiticisyo kec.

²⁰Ibu iyoŋ kitiya ŋakujuwuanisya ka ŋaumonokineta anakwap a Ijipit ka alorwa a lu itiyae iyoŋ ŋunapei alo Isirael ka alokidiŋ ŋituŋa daadaŋ ŋulu a ŋakwapin, ido ituruwo iyoŋ ekiro kon ŋolo eyenen tari nakoloŋit na.

²¹Ibu iyoŋ iyau ŋituŋa kon Ŋisirael anakwap a Ijipit itoodianakini ikes ŋakujuwuanisya ka ŋaumonokineta ka a apedor kon a ŋina apolon ka a akan kon a ŋina agogoŋon ka anakiro a ŋuna ikitubulete,

²²ido ibu iyoŋ inak Ŋisirael akwap na ŋina ibu iyoŋ kiik atapapaa kec atemar iinakini ŋiletok kec, akwap ŋina eleleata ŋakile ka ao.

²³Apotu ikes tolomut nakwap na kituruwosi ŋina kec, nai apotu ikes nyiwuapa ŋakiro kon, kori ŋikisila kon, apotu nyitiyata ŋuna ilimokinit iyoŋ ikes akitiya. Aŋun, ibu iyoŋ iyau ŋican lu daadaŋ neni kec.

²⁴Kiŋolik, ŋakititisyo ŋuna edukunitoe kidiama, ŋuna irikaunitere etaun ecamitae akikamar. Kiŋolik etaun neni ikoni, aapiki ŋituŋa a etaun ejie, akoro ka edeke, aapuu etaun akipotokin napedor a Ŋibabiloniyae a ŋulu itijiete iŋes. Eyookin ŋakiro ŋuna ibu iyoŋ tolimu lopite ŋolo iteo iyoŋ alope.

²⁵Nai, okoe Ekapolon Akuj tari ŋina itemokinitor iyoŋ ainakin etaun napedor a Ŋibabiloniyae, ibu iyoŋ ikilimok ayoŋ ebe, ‘Togyel emanikor a ŋisiliŋa ka toryamu ŋisuudae.’ ”

²⁶Kirwor Ekapolon neni a Yeremia tema,

²⁷“Topupok, arae ayoŋ Ekapolon, Akuj a ŋituŋa a daadaŋ; eyai mono ibore ekepiyori ayoŋ akitiyakin a?

²⁸Aŋun, alimu ayoŋ Ekapolon atemar ainakini ayoŋ etaun lo napedor a Ŋibabiloniyae ka napedor a erwosit Nebukadinesar a ŋolo a Babilon, ido ikamari iŋes etaun lo.

²⁹Epote Ŋibabiloniyae ŋulu itijiete ŋituŋa a etaun a lo, inokakinete akim kicunyakis etaun, icunyarete ikes ŋakais ŋuna ainanakinere alokidiama kec ŋainanakineta neni a Baal ka ainanakinere ŋainakineta a ŋimaten neni a ŋakujo a ŋunace, ŋakiro ŋuna apotu eketoŋoa ayoŋ.

³⁰Mam ŋakiro ŋuna ajokak ŋuna etiyata ŋituŋa a Isirael ka ŋulu a Yudaya, nai ŋakiro ŋuna aronok bon etiyata ikes alokiŋaren kaŋ, ameun ŋina pei erae ikes ŋisorok, mam ŋakiro ŋuna ajokak ŋuna etiyata ŋituŋa a Isirael, nai eketoŋoa ayoŋ a ŋiboro a ŋulu itiyaete ikes a ŋakan kec.

³¹Etonyout ŋakiro a etaun a lo aŋoit ka anyunyura kaŋ ameun anakoloŋit a ŋina adukere etaun akitodol nakoloŋit na, aŋun alemari ayoŋ etaun lo ojoŋo akitere,

³²aŋuna a ŋiticisyo a ŋulu aronok a ŋulu itiyaete ŋituŋa a Isirael ka ŋituŋa a Yudaya, ŋiticisyo ŋulu eketoŋoeta ikes ayoŋ, ŋulu apotu ikes kaapei ka ŋirwosi ŋikapolok, ŋisacaradotin, ŋikadwarak ka ŋituŋa ŋulu iboiyete a lo Yudaya ka ŋulu iboiyete alo Yerusalem.

³³Akamuleno ikes ayoŋ tari ŋina arubakinitor ayoŋ etatami ikes, nyiirara ikes ŋakiro kaŋ ka nyecamuna ŋuna etatami ayoŋ.

³⁴Apotu ikes tosipokis ŋitorubei ŋulu ka asiilyo Kai ŋina enyaritae a ekiro kaŋ, kinyasut Akai ŋin.

³⁵Apotu ikes toduko ŋakiboisyo ŋuna aoyak ŋuna ilipere neni a Baal nakadipaalat alokoku a Inom, ikotere einanakiniata ŋidwe kec ŋulusapa ka ŋulupesur neni a Molek, tari daŋ pa kalimokinit ayoŋ ikes akitiya ŋun, nyepena tari ŋakiro ŋun natameta kaŋ atemar kitiyata ikes ŋiticisyo ŋulu ka asiilyo ŋul, ŋulu apotu kiteseca ŋituŋa a Yudaya.

³⁶“Aŋun, alimu ayoŋ Ekapolon, Akuj a Ŋisirael aŋuna ke etaun a lo a ŋolo irworosi iyes ibasi ‘Ainakin etaun lo napedor a erwosit a Babilon a ekileŋ, a eron ka a edeke,’

³⁷Topupokisi, alosi ayoŋ acunun ikes anakwapin a daadaŋ a ŋuna abu ayoŋ erita ikes anaŋoit ka ananyunyura ta analilit kaŋ a ŋina apolon. Enyakuni ayoŋ ikes nakibois na, ido esiboikini ayoŋ ikes emam ŋace.

³⁸Eruworosi ikes ŋituŋa kaŋ ka aruwor ayoŋ Akuj kec.

³⁹Ainakini ayoŋ ikes etau epei ka epite epei, ikotere eketopoloorito ikes ayoŋ ŋapakio daadaŋ aŋuna ka ajokis kec ka ajokis a ŋidwe kec ekaku kec.

⁴⁰Ewuakini ayoŋ acamunet ŋina a ŋikaru ka ŋikaru ka ikes, arubakini ayoŋ jik etiyae ŋuna ajokak neni kec, ewuakini ayoŋ lotai kec akitopoloorit ayoŋ, ikotere nyakaŋero nabo ikes ayoŋ.

⁴¹Alelyani ayoŋ aŋuna ka akitiya ajokis neni kec ka etogogoŋi ayoŋ ikes anakwap a na anakikinyoma, etiyae ayoŋ ŋun a etau kaŋ a daadaŋ ka a akiyar kaŋ a daadaŋ.

⁴²“Lopite ŋolo ayaunia ayoŋ ŋican ŋulu apolok lu daadaŋ lotuŋa lu, ikwaŋinapei ayauni ayoŋ ŋiboro daadaŋ ŋulu ajokak ŋulu tokona eik ayoŋ ikes.

⁴³Egyelyo ŋimanikorin anakwap a na a ŋina irworotor iyes atemar aruwor ereŋorot neni emam ŋituŋa, kori ŋityaŋ, ainakin napedor a Ŋibabiloniyae.

⁴⁴Egyelyo ŋimanikorin a ŋisiliŋa, iwuakinete ŋituŋa ŋakan kec nabaruwae ŋuna ka acamunet a ŋina egyelere ŋimanikorin ŋul, ido togolokinoe ŋabaruwae ka emaikina toyakas ŋisuudae, itiyakin nu anakwap a Benjamin, anakiboisyo a ŋuna idunyito Yerusalem, lotaunio a Yudaya, anakwap a ŋina a ŋikamukumukui, alo Sepela, alo Negeb, anerae enyakuni ayoŋ ŋituŋa nakwap kec. Adau ayoŋ Ekapolon alimun ŋun.”