Read ngakarimojong Yer. 4 Bible Online

Yer. 4 - ngakarimojong bible

Yer. 4

¹Irworo Ekapolon ebala, “Okoe ŋituŋa a Isirael, ani kiboŋut iyes neni kaŋ, ani kilemasi iyes asiilyo kus alokiŋaren kaŋ ka pa kikimyekis iyes nabo ayoŋ,

²ido kikoŋo itemasi, ‘Ikwapei eyarya Ekapolon,’ anakiro a ŋuna a kire, anakiyookino ka anajokis, iterereŋi Ekapolon ŋituŋa a ŋakwapin ka iturokinosi ikes aŋuna a Ekapolon.”

³Irworo Ekapolon neni a ŋituŋa a Yudaya ka neni a ŋituŋa a ŋulu iboiyete alo Yerusalem ebala, “Kitata ŋimanikorin kus ŋulu nyitatae, nyiekis ŋikinyom kus neni eya ŋikukwa.

⁴Okoe ŋituŋa a Yudaya ka ŋulu iboiyete alo Yerusalem, kiricakisi acamunet kus ka ayoŋ Ekapolon kus, kitaleutu ŋawat kus aŋuna kaŋ. Ani pa kitiyata iyes ŋun, ebuni anyunyura kaŋ neni kus erirae ikwa akim, enomiyari ibore daadaŋ ka emam ituŋanan ituduŋe iŋes, itiyakinosi ŋun aŋuna ka aronis a ŋina itiyaete iyes.”

⁵Tolimosi alo Yudaya ka kiserautu alo Yerusalem ebe, “Tokutakisi amomwara a emesek anakwap a daadaŋ, kiworoutu ke ecelet a ŋolo apolon ibasi, ‘Ocunakinos iwapei, oloto lotaunio ŋulu eya ŋaduketa ŋunajiet!’

⁶Tododasi abendera Sion toema, ikotere iunosi, nyididyoto, anerae ayaunit ayoŋ aronis alo Kuju ka akinyasuno ŋina alalan nooi.

⁷Elomunit anakibois keŋ ekenyasunan ŋakwapin lopite ŋolo elomunia eŋatuny anamoni, aloma iŋes anakibois keŋ akituruwor akwap kus acaryoit; eruwor ŋitaunio kus ŋulu inyasunitae, ŋulu emam ŋituŋa iboiyoto.

⁸Aŋuna a ŋakiro a ŋun, tonapa ŋiguniyae, kiwololoto ka kigworo ibasi, ‘Eriŋa anyunyura ŋina eŋoitor Akuj nyeloto aneni kosi.’ ”

⁹Irworo Ekapolon ŋakiro nu ebe, “Akoloŋit ŋin edaun ainakina aneni a erwosit ka aneni a ŋulu ipukato ka iŋes, ekadakini ŋisacaradotin ka eumokinete ŋikadwarak.

¹⁰Abu nai ayoŋ otema, ‘Okoe, Ekapolon Akuj, kire idau iyoŋ amodikin ŋituŋa a Yerusalem analimokin ikes atemar emam ŋace eyakaun neni kus,’ toarete bo ŋimoe ikes!”

¹¹Apaki ŋin, elimokinio ŋituŋa a Yerusalem atemar ekutunit ekuwuam ŋolo amwanan aneni kaŋ, ekutunit alomoru a ŋulu emam ŋikito, ekutunit analoŋisat neni a ŋituŋa kaŋ a ŋulu eya locan, meere akutar ŋulu aronok, kori akitojokun.

¹²Mam, egogoŋ ekuwuam ŋolo iyakuunit Ekapolon akilo ŋol, ayoŋ Ekapolon erworo atubokinit ikes.

¹³Topupokisi! Ebunit Ekapolon lopite ŋolo eponiata ŋidouwon, eponito ŋagaari keŋ ekerete ikwa ekuwuam ŋolo ipiripiri ekusi, epiraka ŋaŋolei keŋ akilo ŋigolei. Utukui iwon! Enyasunoi iwon!

¹⁴Okoe ŋituŋa a Yerusalem, kitesegutu ŋitai kus, kitesegutu ikes anajoŋore akitiya aronis, ikotere iyes ikiunio. Tari ori imyekinito iyes ayere akitiya ŋuna aronok alotai kus?

¹⁵Alimosi ŋikiyakitono alotaun Dan ka eserata alokamukumukui a Epuraim ŋakiro ŋuna ka akinyasuno.

¹⁶Tolimokisi ŋituŋa a ŋakwapin ebe, “Eyakasi ŋikiyakitono ŋul ne!” Kiserata ŋakiro nu neni a ŋituŋa a Yerusalem ebe, “Eponito anakwap a ŋina alwanan; ŋituŋa ŋulu ikirikaunete iyes, ecelasi ikes imanito ŋitaunio a Yudaya.

¹⁷Irikaunete ikes Yerusalem lopite ŋolo irikaunitotor ŋiketeok emanikor, anerae akaŋero ayoŋ ŋituŋa a Yerusalem.

¹⁸Ayaut ŋakiro ŋuna iwuapito iyes ka ŋuna itiyaete iyes ŋakiro nu neni kus. Akinyasuno kus iŋes ŋin, okoe kepipiliar! Adolu akinyasuno ŋin lotai kus.”

¹⁹Aryeba ayoŋ! Aryeba ayoŋ! Akanomo ayoŋ apipilu! Akanyamete ŋakiro etau! Idoŋae etau kaŋ nooi, nyapedori ayoŋ akililiŋ, anerae apupi ayoŋ eruye ŋolo amomwara a emesek, apupi ayoŋ eli ŋolo ke ejie.

²⁰Ikirika akinyasuno, enyasunoi, aruwor akwap daadaŋ acaryoit. Enyasun ŋiemae a ŋituŋa kaŋ atipei enyasun alotooma apaki ŋina euruwuana ŋanaŋgae ŋuna inenetoe tooma ŋiemae.

²¹Tari ori ete ayoŋ abendera ka apupi eruye amomwara a emesek?

²²Irworo Ekapolon ebala, “Ebaŋaaka ŋituŋa kaŋ, nyakayenete ayoŋ, erae ikes ŋidwe ŋulu ebaŋaaka, emam ŋakiro eyenete. Eyenete ikes akitiya aronis, nai nyeyenete akitiya ajokis.”

²³Abu ayoŋ eŋolik akwap, okoe, acaryoono, amam ibore ayai; abu eŋoliya kidiama, amam akica ayai.

²⁴Abu eŋoliya lomoru, okoe, amaranete, ido eiŋiiŋasi ŋikamukumukui pa awuasi aiwapei.

²⁵Abu ayoŋ oŋoleŋolek, okoe amam ituŋanan ayai ipei daŋ, aris ŋikyeny daadaŋ keporosi.

²⁶Abu nabo ayoŋ oŋoleŋolek, okoe eŋolik akwap ŋina sek ajok keruwor aloŋisat, eŋolik ŋitaunio keŋ daadaŋ keruworosi ŋulu inyasuna aŋuna ka aŋoit a Ekapolon a ŋina a dedeŋan.

²⁷Erae ŋun ŋuna irworo Ekapolon ebe, “Eruwor akwap daadaŋ ereŋorot, kikote neni daŋ, etasaluni ayoŋ akwap jik.

²⁸Aŋuna a ŋakiro a ŋun, igworete ŋituŋa anakwap ka iryoniar kidiama, anerae adau ayoŋ akirwor ka acamit ayoŋ akitiyakin ŋun, eriŋa ayoŋ alosikinit akitiya ŋun, nyemyekini ayoŋ akitiyakin ŋun.”

²⁹“Ani iiraryo eruye a ŋikametok ŋaŋolei ka ŋolo a ŋulu etiŋito ŋikaleŋeleŋe, esurosi ŋituŋa alotaunio a daadaŋ, elomarete ŋituŋa namon; edokarete ikes natabab; imyekinete ŋituŋa ŋitaunio daadaŋ, mam ŋini erubakini iboi alotaun a edio.

³⁰Okoe Yerusalem, aema ŋituŋa aneni kon, anijokis enapitotor ŋituŋa kon ŋilowi ŋulu areŋak, anukiro esiritotor ŋituŋa kon a ŋinapen a ŋulu itiyaunitae a egolid ka iosyata eraŋgi nakonyen kec? Isibusasi ŋituŋa kon koŋin, ikijamuwarito iyes ŋulu ikiminasi iyes, iwarito ikes akiar iyes.

³¹Abu ayoŋ eira akigworo ŋina esibit akigworo ka aberu a ŋina eryeba aŋuna ka akidoun, abu ayoŋ eira akigworo ŋina ka aryeba a ŋina ikwaan ka ŋina a aberu a ŋina eapi akidoun ikoku keŋ ŋini kiyae. Arae ŋin akigworo a ŋituŋa a Sion, a ŋulu eŋaamete ieŋasi, topetarito ŋakan kec ebasi, ‘Oitakoi! Adaunoi isua eriŋa ŋikaarak nyedoluno.’ ”