Read ngakarimojong Yer. 40 Bible Online

Yer. 40 - ngakarimojong bible

Yer. 40

¹Kedau Nebusaradan ekapolokiniton a ŋasigarya a Babilon akimyekin Yeremia alosit alo Rama, anerae abu iŋes ya Yeremia eenen a ŋiriko kaapei ka ŋituŋa ŋulu arikoryo alo Yerusalem ka alo Yudaya daadaŋ, ŋulu arikoryo Babilon.

²Abu ekapolokiniton a ŋasigarya a Babilon ya Yeremia nawae tema neni keŋ, “Abu Ekapolon Akuj kon tolimu atemar esicani akibois na,

³tosodi tokona esiyook Ekapolon ŋakiro ŋun, ido etiya ikwapei alimunitor, anerae ipotu iyes daadaŋ toseca aneni ke Ekapolon, nyiwuapa ŋakiro keŋ. Aŋun, etiyakin ŋakiro ŋun neni kus.

⁴Topupok tokona, adau ayoŋ alacar nakoloŋit na ŋiriko ŋulu aya nakejen kon. Ani kicamit iyoŋ alosit ka ayoŋ Babilon, bua apena, ekericakini ayoŋ iyoŋ ejok, nai ani pa kicamit iyoŋ alosit ka ayoŋ Babilon, nyemaikina ibu, kiŋolik, eyai akwap ŋin daadaŋ kiŋaren kon, tolot neni itami iyoŋ ejok ka iyookino iyoŋ alosit.

⁵Ani kidoŋi iyoŋ, toboŋo nai neni a Gedalia alokoku ka Aikam a ŋolo arae lokoku a Sepan, a ŋolo abu erwosit a Babilon toseu aruwor ekepukan a ŋitaunio a Yudaya, kiboiyoto ka iŋes alokidiŋ ŋituŋa kon, kori tolot neni daadaŋ ikijoikinit iyoŋ alosit.” Aŋun, abu ekapolokiniton a ŋasigarya a Babilon inak Yeremia akimuj ka ainakinet, kimyek nai iŋes tolot.

⁶Abu nai Yeremia tolot Mesipi neni a Gedalia alokoku ka Aikam, kiboiyoto ka iŋes kaapei ka ŋituŋa ŋulu aponi kimyekinae anakwap a Yudaya.

⁷Ani iirarete ŋikarikok a ŋajoresyo a Ŋiyudayan ka ŋasigarya kec ŋulu ariŋa eyakasi nariet ecamito akitiji Ŋibabiloniyae, atemar aseu erwosit a Babilon Gedalia lokoku ka Aikam aruwor ekepukan a akwap a Yudaya ka apolokin ŋikilyok, ŋaberu ka ŋidwe, ŋituŋa ŋulu akulyakaka anakwap kec ŋulu aponi nyerikor Babilon,

⁸apotu ŋikarikok a ŋajoresyo ŋul toloto neni a Gedalia a ŋolo ayai Misipa. Ŋikarikok ŋul ikes Isimael lokoku a Nesania, Yoanan lokoku a Karea, Seraia lokoku a Tanumes, ŋidwe a Eipai a ŋolo arae Enetopasit ŋulusapa, Yaasania lokoku a Emaakesait, apotu ikes toloto kaapei ka ŋajorei kec.

⁹Abu Gedalia lokoku ka Aikam a ŋolo arae lokoku a Sapan kikoŋ neni a ŋikarikok ka neni a ŋajorei kec tema, “Nyikuryaketa akitiyanakin Ŋibabiloniyae. Kiboiyoto anakwap yok, kitiyanakis erwosit a Babilon, mam ŋuna aronok itiyakin neni kus.

¹⁰Ani eruwor ayoŋ, eboi ayoŋ alo Misipa okowoik iyes alokiŋaren Ŋibabiloniyae ŋulu epote neni yok; nai iyes, emaikina tolema ŋaraito a epiini, ŋaraito ŋuna ka akamu ka akimyet, kiŋadakis ikes loboro kus ka kiboiyoto alotaunio a ŋulu idaut iyes akikamar.”

¹¹Ikwaŋinapei ani iirarete Ŋiyudayan ŋulu aya Moab ka nakwap a Ŋiamoni ŋulu aya Edom ta nakwapin ŋunace atemar emyek erwosit a Babilon ŋipiya a ŋituŋa alo Yudaya ka aseu Gedalia lokoku ka Aikam a ŋolo arae lokoku a Sapan akipuka ŋituŋa ŋul,

¹²apotu Ŋiyudayan toboŋut anakiboisyo a daadaŋ a ŋuna keponi ikes kielarae, toboŋut nakwap a Yudaya neni a Gedalia a ŋolo ayai Misipa, tosodi apotu ikes tolema ŋaraito a epiini ŋuna alalak ka ŋaraito ŋuna ka akamu ŋuna alalak.

¹³Apotu Yoanan lokoku a Karea kaapei ka ŋikarikok a ŋajorei a ŋuna ariŋa eyakasi nariet potu neni a Gedalia Misipa.

¹⁴Kiŋita ikes Gedalia temasi, “Iyeni mono iyoŋ atemar eyakuu Baalis erwosit a Ŋiamoni Isimael lokoku a Nesania akiar iyoŋ a?” Nai towou Gedalia lokoku ka Aikam akinup ŋakiro kec.

¹⁵Tolot nai Yoanan lokoku a Karea akisirwor Gedalia alo Misipa anakimunono tema, “Kimyekinae ayoŋ olot oar Isimael lokoku a Nesania ka mam ituŋanan eyenuni ŋakiro ŋun. Kaanukiro elemarya iŋes akiyar kon, ido kielaros Ŋiyudayan daadaŋ ŋulu acunakina neni kon, ido totwaka ŋipiya a Yudaya?”

¹⁶Nai tolimok Gedalia lokoku ka Aikam Yoanan lokoku a Karea tema, “Nyitiya ŋakiro ŋuna ikote ŋun, anerae irworo iyoŋ alyokonu aŋuna a Isimael.”