Read ngakarimojong Yer. 42 Bible Online

Yer. 42 - ngakarimojong bible

Yer. 42

¹Apotu nai ŋikarikok daadaŋ ŋulu a ŋajorei ka Yoanan lokoku a Karea, Asaria lokoku a Osaia ka ŋituŋa daadaŋ ameun a ŋulucaryo tari ŋulu etopolooritae toloto

²neni a ekadwaran Yeremia, tolimokis iŋes temasi, “Kitiya ejok, topupok adyekitoi kosi, kilip neni a Ekapolon Akuj kon aŋuna kosi aŋuna a ŋipiya a lu a daadaŋ, anerae ikidoŋ isua ikirae ŋidikudyo bon, alotooma ŋikalalak, lopite ŋolo iteo iyoŋ.

³Kimyek Ekapolon Akuj kon ikitoodik isua neni emaikina tolotoi ka ŋuna emaikina kitiyae.”

⁴Tolimok ekadwaran Yeremia ikes tema, “Ejok nooi, alosi ayoŋ elip Ekapolon Akuj kus lopite ŋolo iŋitatar iyes, ido ŋakiro daadaŋ ŋuna ikiboŋokini Ekapolon iyes, akalimokini ayoŋ iyes, nyekemunoni ayoŋ iyes ŋakiro ŋadi.”

⁵Tolimokis daŋ ikes Yeremia temasi, “Ikilipi toruwor Ekapolon ŋolo iyookino ka esuuda ŋolo ikinyoma anakisican isua erae keŋeri akiwuap ŋuna daadaŋ ikilimokini Ekapolon Akuj kon isua aneni kon.

⁶Kejokak kori keroko, ikitiyae isua ŋuna elimuni Ekapolon Akuj kosi ŋina ikiyakiyaritae isua iyoŋ neni keŋ, ikotere emamukaun ŋuna aronok aneni kosi ŋina ikiwuapya isua ŋuna elimuni Ekapolon Akuj kosi.”

⁷Ani elunyar ŋirwa ŋitomon, kirwor Ekapolon neni a Yeremia.

⁸Tonyarau nai Yeremia Yoanan lokoku a Karea ka ŋikarikok a ŋajoresyo daadaŋ ŋulu arukito ka iŋes ka ŋituŋa daadaŋ ameun a ŋulucaryo tari ŋulu itopolooritae,

⁹tolimok Yeremia ŋituŋa daadaŋ tema, “Alimu Ekapolon Akuj a Ŋisirael ŋina ipotu iyes ikiyakiyasi ayoŋ neni keŋ alimokin adyekitoi kus ebe,

¹⁰‘Ani ca kirubakis iyes iboiyete anakwap a na eketogogoŋi ayoŋ iyes, nyakalemari, akadupakini ayoŋ iyes, nyakamunyari, anerae ekesiyaloloŋ ayoŋ ŋican ŋulu abu ayoŋ oyau neni kus.

¹¹Nyikuryaketa aŋuna ke erwosit a Babilon, lopite ŋolo sek ikuryaketa iyes, nyikuryaketa aŋuna keŋ, anerae ikirukit ayoŋ ka iyes, aŋuna ka aiun iyes ka alakun iyes anapedor keŋ.

¹²Ekesyoni ayoŋ iyes ka ikisyoni iyes erwosit a Babilon, ikinyakari iŋes iyes nakwap kus.’

¹³Nai ani kirubakis iyes ibasi, ‘Nyikirubakini isua ikiboi anakwap a na,’ irae ŋulu iŋerito akiwuap ŋakiro a Ekapolon Akuj kus

¹⁴ka ibasi, ‘Mam, ikilosi isua nakwap a Ijipit, neni nyikiŋolikinia isua ejie, kori nyikiirarya eruye a arupepe, kori nyikinyamia akoro a ŋuna emamukatar ŋamugati, ido eboiyoto a ina,’

¹⁵kiirasi nai ŋakiro a Ekapolon okoe iyes ŋipiya a Ŋiyudayan; alimu Ekapolon ŋolo a ŋajoresyo Akuj a Ŋisirael ebe, ‘Ani kire kimuketo iyes alosit Ijipit ka akiboi a ina,

¹⁶ikiryamuni iyes anakwap a Ijipit ekileŋ ŋolo ikerito iyes ka ikiwuapakini iyes ilosete Ijipit akoro ŋina ikerito iyes ka itwakete a nen.

¹⁷Ŋituŋa daadaŋ ŋulu imuketo alosit akiboi Ijipit, eyaryo a ekileŋ, eari akoro ka edeke, mam ikes ipei daŋ ŋini eiun alocan a ŋulu eyakuuni ayoŋ neni kec.’

¹⁸“Erae nu ŋakiro ŋuna alimu Ekapolon ŋolo a ŋajoresyo, Akuj a Ŋisirael ebe, ‘Lopite ŋolo abunio aŋoit kaŋ ka anyunyura kaŋ toyakaun neni a ŋituŋa a ŋulu eboiyete alo Yerusalem, ikwaŋinapei, ebuni anyunyura kaŋ neni kus daŋ apaki ŋina ilosyoto iyes Ijipit, iruworosi iyes ŋituŋa ŋulu icenere ŋuluce ka ŋulu inyasere ŋuluce, ikijamuwarete ŋituŋa iyes ka iyanyio ŋituŋa isitiyao ekiro kus. Nyiŋolikinete iyes akibois na nabo.’

¹⁹Okoe ŋipiya a ŋituŋa a Yudaya, ikilimok iyes Ekapolon atemar nyilot Ijipit. Toyenete atemar akalimok ayoŋ iyes ŋakiro ŋun nakoloŋit na,

²⁰ido toyenete atemar ioliyosi iyes ijal akiyar kus, anerae ipotu iyes ŋilopeyek ikiyakiyasi ayoŋ neni ke Ekapolon Akuj kus ibasi, ‘Kilip aŋuna kosi neni ke Ekapolon Akuj kosi, ido ŋakiro daadaŋ ŋuna ikilimokini iyoŋ Ekapolon Akuj kosi, tolimokinae isua ka itiyao isua ŋun.’

²¹Aŋun, akalimok ayoŋ iyes nakoloŋit na ŋakiro ŋuna akalimoki Ekapolon ayoŋ, nai nyiwuapa iyes ŋakiro a Ekapolon Akuj kus, anakiro daadaŋ a ŋuna abu iŋes ekeyakuunia ayoŋ alimokin iyes.

²²Toyenete nai ejok atemar, itwakete iyes a ekileŋ, akoro ka a edeke anakibois a ŋina icamito iyes alosit akiboiyo.”