Read ngakarimojong Yer. 46 Bible Online

Yer. 46 - ngakarimojong bible

Yer. 46

¹Kirwor Ekapolon neni a Yeremia a ekadwaran aŋuna a ŋituŋa a ŋakwapin.

²Tolimu Ekapolon aŋuna a Ijipit, aŋuna ka asigar a Parao Neko a erwosit a ŋolo a Ijipit, asigar ŋina ayai Karikemis diyete aŋolol Eupurate ŋuna a asigar a ŋina abu erwosit Nebukadinesar ŋolo a Babilon kilou alokaru a ŋolo a ŋiomwon ipukat Yeoakim lokoku a Yosia a ŋolo a Yudaya. Tema Ekapolon,

³“Tosubakisi ŋaupala kus ŋuna cicik ka ŋuna apolok, ido kicodosi aŋuna ke ejie.

⁴Toena ŋaŋolei kus, todokakisi naŋolei kus, toreikinos neni emaikina iyes pena aŋuna ke ejie, tonapito ŋakopiyae ŋuna ke ejie, topwatasi ŋakwaaras kus, tonapa ŋiboro ŋulu jiet.

⁵Kaanukiro eteo ayoŋ ikes ebulit? Aema ikes, aboŋosi ebulit, eloun ŋikajiok kec, ido ikirikasi ekerete, iŋoliununeete kaku, eyai ekabule lowaetin kec daadaŋ.

⁶Nyepedorito tari ŋulu apiranak akiem toekasi, nyepedorito tari ŋikajiok akisi, emasakinosi daadaŋ Kuju diyete aŋolol Eupurate.

⁷“Ŋae ŋin ŋini iwonyunit esibit aŋolol Nile. Esibit ŋakipi aŋolol ŋuna ipumasi?

⁸Anyou Ijipit esibit aŋolol Nile, esibit ŋakipi aŋolol ŋuna ipumasi. Ebasi ŋituŋa a Ijipit ebe, ‘Emaikina iwon onyouto, emaikina oburusiyasi akwap daadaŋ, emaikina omunaasi ŋitaunio ka omunyasi ŋituŋa ŋulu iboiyete alotooma kec.’

⁹Okoe ŋaŋolei kicodosi, okoe ŋikametok ŋagaari ŋuna iritae a ŋaŋolei, toema nooi, kimyekisi ŋikajiok toema kiŋaren, ŋikajiok ŋulu eponito alo Esiopia ka Libya eryoŋito ŋaupala kec ka ŋikilyok ŋulu eyenete akisitiya ŋikaleŋeleŋe ŋulu eponito alo Lidia.

¹⁰Erae akoloŋit ŋin ŋina ke Ekapolon Akuj ŋina a ŋajoresyo, akoloŋit ŋina ka akinyaŋar ŋakiro a ŋimoe keŋ. Eari ekileŋ ikes tari ŋina eupya, tari ŋina eronikiniata ŋaokot a ŋimoe ikes. Eari Ekapolon Akuj ŋina a ŋajoresyo ŋimoe keŋ erae amuronot anakwap a ŋina alo Kuju alodiyete aŋolol Eupurate.

¹¹Ŋituŋa a Ijipit toloto Gilead toryamut ekitoe ŋolokimadet ŋajemei, isitiyata iyes ŋikito ŋulu a akwap kus nai nyeŋaleuno iyes; nyiŋaleunete iyes.

¹²Eirasi ŋituŋa a ŋakwapin ŋuna a ŋileec kus ka ealakin akigworo kus akwap daadaŋ; anerae aarasi ŋikajiok make atwaka daadaŋ kaapei.”

¹³Ŋakiro ŋuna abu Ekapolon tolimok Yeremia ekadwaran aŋuna ka abunore a Nebukadinesar a erwosit a Babilon akitijikin ŋituŋa a akwap a Ijipit. Tema Ekapolon neni a Yeremia,

¹⁴“Tolimo ŋakiro nu alo Ijipit, kiserau ikes alo Migidol, kiserau ikes alo Mempis ka alo Tapanes ebe, ‘Tolemutu ŋaŋolei kus, ido totena, anerae emunyaryo a ekileŋ ŋikidunyet kus.’

¹⁵Kaanukiro emasakinere akuj kus Apis kwap? Kaanukiro pa arubakinia ewoi akuj ŋina erae agogoŋu kus? Pa apedorit arubakin ewoi, anerae emasak Ekapolon iŋes kwap.

¹⁶Adau akigukin ŋasigarya kus ŋuna alalak, amunyarosi, abu ipei tema neni a ŋinice, ‘Bua, oboŋosi lotuŋa yok ka nakwap ŋina ikidounere iwon, osiwa alokileŋ a ŋimoe.’

¹⁷Elimokinete ikes Parao erwosit a Ijipit ekiro ece ebe, ‘Ekacelan ŋolo abu totwania apaki keŋ ŋinakipukaet.’

¹⁸Ayoŋ Ekapolon, erwosit ŋolo a ŋajoresyo alimu ebe, ‘Ikwapei ayarya ayoŋ, ebunit ipei ŋini ikwaan ka emoru Tabor alokidiŋ ŋimoru ka ŋini ikwaan ka emoru Karimel alodiyete anam.’

¹⁹Toena ŋiboro kus aŋuna ka arikoro, okoe iyes ŋituŋa ŋulu iboiyete alo Ijipit Ituruworyo Mempis ekoŋinait, ereŋorot neni emam ŋituŋa eyakasi.

²⁰“Ikwaan Ijipit ka ataok ŋina ebusan, nai ebunit neni keŋ alo Kuju ecucut ŋolo inyasuni.

²¹Tari ŋikajiok keŋ ŋulu ipaŋgaunitae, ikwaan ka ŋitak ŋulu atumak, ikes daŋ ibelekin toema kaapei, nyewoikinete ŋimoe, anerae adolu akoloŋit ŋina isicanere ikes, adolu apaki ŋina ka amunyaro kec.

²²“Aema ŋituŋa a Ijipit igworosi ikwa emun ŋolo eemi, anerae eponito ŋimoe keŋ ka agogoŋu, eponito neni keŋ etiŋito ŋaepe, esibito ŋituŋa ŋulu eukonorete ŋikito.

²³Eyapakinete ŋituŋa ŋul ŋikito a ŋamon a Ijipit kwap, tari daŋ kemutoko nooi ŋamon kec, anerae elalak ŋimoe ŋul akilo tari emaase, nyimarun ikes.

²⁴Isirumyo ŋituŋa a Ijipit ŋileec, einakinio ikes neni a ŋituŋa a ŋulu alo Kuju.”

²⁵Tolimu Ekapolon ŋolo a ŋajoresyo, Akuj a Ŋisirael tema, “Kiirasi, ayauni ayoŋ akisicanet neni ka Amon a akuj a Tebes ka neni a Parao, Ijipit ka ŋakujo keŋ ta ŋirwosi keŋ, neni a Parao ka daadaŋ ŋulu ikinyomito iŋes.

²⁶Epotokini ayoŋ ikes neni a ŋulu imanito akiyar kec, neni a erwosit Nebukadinesar a ŋolo a Babilon ka neni a ŋikapolok a ŋulu ipukatotor iŋes. Ekaku, epote ŋituŋa akiboi alo Ijipit lopite ŋolo ayakatar alorwa a ŋulu a koloŋ.”

²⁷“Nai ani eruwor iyes, nyikuryaketa iyes ŋiletok a Yakob, iyes ŋiletok a Ŋisirael nyikikadanak, anerae alosi ayoŋ aiun iyes anakwapin a ŋuna alwanak aiuni ayoŋ ŋiletok kus anakwap a ŋina aponi torikoroe ikes. Eboŋunete ŋiletok a Yakob kiboikinos a ekisil emam ŋace, ido mam ituŋanan itukuryani ikes.

²⁸Ŋituŋa kaŋ ŋiletok a Yakob, nyikuryaketa, anerae ikirukit ayoŋ ka iyes amunyari ayoŋ ŋituŋa a ŋakwapin a ŋuna abu ayoŋ ekeelak iyes, nai nyakamunyari ayoŋ iyes. Ekesicani ayoŋ iyes alotooma akiyookino, nai nyekemyekini ayoŋ iyes nyisicana.”