Read ngakarimojong Yer. 48 Bible Online

Yer. 48 - ngakarimojong bible

Yer. 48

¹Kirwor Ekapolon ŋolo a ŋajoresyo, Akuj a Ŋisirael ŋakiro nu aŋuna a Moab tema, “Ekaŋ iyoŋ Nebo, ikituruwor iyoŋ ereŋorot, esirumi Kiriasaim ŋileec, ekamar iŋes; esirumi aduketait keŋ ŋinajiet ŋileec, aritakin kwap;

²adaun arwon a Moab. Apotu ikes toyeta ŋuna aronok aŋuna a Moab alo Esibon ebasi, ‘Potu, olemasi iŋes anaraakau akwap!’ Okoe iyes daŋ ŋituŋa ŋulu a ŋikerep, ikisililiŋio, ikiwuapakini iyes daŋ ejie.

³“Okoe, kiirasi akigworo alo Oronaim, ebasi ŋituŋa igworosi, ‘Aryamun bare ca ekasile ka akinyasuno ŋina apolon!’

⁴Amunaar Moab, igworosi ŋidwe a ŋituŋa a Moab,

⁵Itipeete ikes anadokaret Luis igworosi nooi, epupyo ikes igworosi apaki ŋina etiyaunotor Oranaim, igworosi ikes epipilikinito ŋakiro ŋuna ka akinyasuno.

⁶Toema! Toiutu ŋawat kus, kitiyata ikwa esigirya ŋolo etyaŋaar naloŋisat!

⁷“Kire jik, aŋuna iponiata iyes kikinyoma ŋaduketa kus ŋunajiet ka abaru kus, iyes daŋ ikikamaryo. Eyaaryo akuj kus Kemos nakwap ace kaapei ka ŋisacaradotin keŋ ka ŋiketiyak keŋ.

⁸Ebuni ekamunyaran lotaunio daadaŋ ka emam etaun ebucar, emunyaryo ŋituŋa ŋulu eya nakadipaalae ka ŋulu eya nadipoe, lopite ŋolo alimunio Ekapolon.

⁹“Tosubakisi ŋamoru ŋuna idokokinio nalyalin a ŋituŋa a Moab, anerae eapi akinyasuno a Moab, eruwor ŋitaunio a Moab ŋireŋoroto, ŋulu emam ŋituŋa iboiyete alotooma kec.

¹⁰“Ilamam ituŋanan ŋini ekalanyana akitiya etic a Ekapolon ka ilamam ituŋanan ŋini nyisitiyae ekileŋ keŋ aarya ŋituŋa.

¹¹“Ŋinapei anasorokanu kec eboiyete ŋituŋa a Moab emam ŋace, eboiyete ikes a ekisil lopite ŋolo esipor epiini anamoti, epiini ŋolo ŋilocokin anibore a ipei neni a ŋinice, mam tari nyerikoro ŋituŋa a Moab nakwap ace, aŋun ikwaan ikes ka epiini ŋolo nyemunaara abobou keŋ ka nyemunaara eure keŋ.”

¹²Aŋun, alimu Ekapolon ebe, “Kire jik, ebunit apaki ŋina eyakikinia ayoŋ neni a ŋituŋa a Moab ŋituŋa ŋulu emunyarete ikes, ebukorete ŋituŋa ŋul epiini a Moab anamoti, tobwaŋabwaŋaasi ŋamoti kec.

¹³Irumete nai ŋituŋa a Moab ŋileec aŋuna a akuj kec Kemos lopite ŋolo erumyata ŋituŋa a Isirael ŋileec aŋuna a akuj Besel a ŋina ekinyomito ikes.

¹⁴Ikokinete iyes ibasi, ‘Ikirae isua ŋikelounak ka ŋikajiok ŋulu etirok’?

¹⁵Adolu ekenyasunan Moab ka ŋitaunio keŋ ka aari ŋisorok keŋ ŋulu sek eminae nooi, Erwosit ŋolo erae ekiro keŋ Ekapolon ŋolo a ŋajoresyo iŋes alimu ŋun.

¹⁶Aapuu akisicanio a Moab ka iburuburuuna amunyaro keŋ.

¹⁷Iyes ŋikidunyet a Moab, kigworo aŋuna keŋ ka iyes daadaŋ ŋulu iyenete ekiro keŋ, temasi iyes, ‘Enyasun bare ca apukan keŋ ŋina agogoŋon, adaun bare ca akibuses a apukan keŋ!’

¹⁸“Iyes ŋulu iboiyete alo Dibon, totiyaunos anakibois kus a ŋina ka apolou, ido kiboikinos nadeudeui, anerae adolu ekenyasunan Moab ikimanit iyes, amunaiya ŋaduketa kus ŋunajiet.

¹⁹Towua alodiyete erot kiŋolikis, okoe iyes ŋituŋa ŋulu iboiyete alo Aroe! Kiŋita ekile ŋolo ekeri ka aberu ŋina esiit ebe, ‘Anukiro etiyakin?’

²⁰Esirumi Moab ŋileec, anerae enyasun iŋes, kiwololoto ka kigworo! Tolimosi alodiyete Arinon atemar enyasun Moab.

²¹“Abu atubokino lotaunio ŋulu eya nakwap ŋina emam ŋikamukumukui, ŋitaunio ŋul ikes lu: Olon, Yasa, Mepaas,

²²Dibon, Nebo, Bes-Dibilasaim,

²³Kiriasaim, Bes-Gamul, Bes-Meon,

²⁴Kirios, Bosira ka ŋitaunio a akwap a Moab daadaŋ ŋulu alwanak ka ŋulu eapiyete.

²⁵Alimu Ekapolon atemar alemari apolou a Moab ka abilibilakini kwap.

²⁶“Kitemerakisi ŋituŋa keŋ, anerae apotu kitopoloor make kimana Ekapolon, kimyekisi ŋituŋa a Moab kibelibelo analyakan kec pei, eruwor ikes daŋ ŋulu ekyenare.

²⁷Apotu ŋituŋa a Isirael toruwor ŋulu ikyenatar iyes, tari ŋina pa aryamunitere ikes erukito ka ŋikokolak, nai apaki daadaŋ ŋina irworotor iyes aŋuna kec imuŋimuŋite iyes ŋakyes.

²⁸Kimyekisi ŋitaunio, kiboiyosi natabab, okoe iyes ŋituŋa a Moab! Kitiyata ikwa akuri ŋina eduki akai keŋ nakituk a akabaat ataaba.

²⁹Eirar isua ŋuna ka akituro a ŋituŋa a Moab. Iturosi ikes nooi, itopolooro make, iturosi, ejamuwaka ka itopolooro bon nooi alotai kec.

³⁰Alimu Ekapolon ebe, ‘Ayoŋ elope ayeni akituro kec, erae akituro kec acaryoit, erae ŋiticisyo kec ŋulu ka amodiyo.’

³¹Aŋun, ewololoe ayoŋ aŋuna a ŋituŋa a Moab, egworo ayoŋ aŋuna a ŋituŋa a Moab a daadaŋ, egworo ayoŋ aŋuna a ŋituŋa a Kir-Eres.

³²Egwori ayoŋ aŋuna kus akilo ŋina egworor aŋuna a Yaser. Okoe etaun Sibima, ikwaan iyoŋ ka ekitoe a epiini ŋolo elyarito ŋaten keŋ yaaye anam ŋina Atwan, todolo tari Yaser. Adolu ekamunyaran ŋaraito kon ŋuna ka akamu ka ŋaraito kon ŋuna a epiini.

³³Alemar alakara ka alelyanu anakwap a Moab a ŋina sek ileleba ŋaraito. Etojoŋo ayoŋ epiini alel anacuet a epiini; mam ŋituŋa ecuyete epiini eosi ka alakara, nyeriŋa ecelet erae ŋolo ka alakara.

³⁴“Iyes ŋituŋa a Esibon ka ŋulu ka Eleale, kiworoutu todol akigworo kus Yaas, todolo ŋitoilon kus alo Soar tari Oranaim ka Egilas-Selisiya, anerae aono tari ecowa ŋolo a Nimirim.

³⁵Tosodi, alimu Ekapolon atemar, amunyari ayoŋ alo Moab ŋituŋa daadaŋ ŋulu einanakinete ŋamuronisya anakiboisyo a ŋuna aoyak ka ŋulu einanakinete ŋainakineta neni a ŋakujo kec.

³⁶Aŋun, iyaloloŋi etau kaŋ aŋuna a Moab ka aŋuna a ŋituŋa a Kir-Eres lopite ŋolo ekusya ituŋanan apilu apaki ŋina iyaloloŋere, anerae adaun abaru kec ŋina apotu toryamut.

³⁷“Abanyasi ikes daadaŋ ŋakyes kec ka ŋipeneka kec, eyakasi ŋajemei nakan kec a daadaŋ ka anapa ikes daadaŋ ŋiguniyae anacirin kec.

³⁸Iwololoete ŋituŋa alokidiama ŋakais ka analapatui a etaun a Moab, anerae eela ayoŋ Moab lopite ŋolo ebwaŋarere amot ŋina emam ituŋanan ecamit.

³⁹Erono nooi akielar a Moab! Erono nooi epite ŋolo iwololoto ikes! Erono nooi epite ŋolo alemarere ajokis alo Moab, epite ŋolo edoŋio erae ŋileec bon. Aŋun, edoŋ Moab erae akwap ŋina ejamuwaritae ŋina a ŋinyas aneni a ŋikidunyet keŋ a daadaŋ.”

⁴⁰Alimu Ekapolon ŋakiro nu ebe, “Kiirasi, emotun egole Moab, emotun iŋes epetarit ŋabebenuk keŋ, imanit ŋituŋa a Moab.

⁴¹Ikamaryo ŋitaunio, ikamaryo tari ŋaduketa ŋunajiet. Akoloŋit ŋin ikokinete ŋitai a ŋikajiok a Moab ŋulu ka aberu a ŋina eryeba aŋuna ka akidoun.

⁴²Emunyaryo ŋituŋa a Moab, anerae apotu ikes kitopoloorosi make toŋero Ekapolon.

⁴³Okoe ŋituŋa ŋulu iboiyete alo Moab, eyakasi kiŋaren kus ekabule, akipany ka aloc!

⁴⁴“Ŋini eemi aŋuna a ekabule ibusokin nakipany, ŋinituŋanan daadaŋ edokuni anakipany ikamuni aloc, anerae ayauni ayoŋ ŋiboro ŋul Moab, alokaru a ŋolo a akisicanio kec.

⁴⁵“Ieŋunete ŋituŋa ŋulu irimito alotolimon a Esibon eupit, anerae anepu akim alo Esibon, anepu arira alokai a Sikon, anomiya ŋaitae a ŋimoru a akwap a ŋituŋa a Moab a ŋulu sek eminasi ejie.

⁴⁶Ekaŋ iyes, okoe iyes ŋituŋa a Moab! Amunyar ŋituŋa a akuj Kemos anerae ekamar ŋidwe kus ŋulusapa ka arikor ŋidwe kus ŋulupesur.

⁴⁷Kikote neni daŋ alorwa a ŋulu esidyok, enyakakini ayoŋ ŋituŋa a Moab ŋarereŋisyo kec.” Atubokino a Moab iŋes ŋin.