Read ngakarimojong Yer. 49 Bible Online

Yer. 49 - ngakarimojong bible

Yer. 49

¹Alimu Ekapolon ŋakiro nu aŋuna a Ŋiamoni: “Emamukatar mono Ŋisirael ŋidwe ŋulusapa a? Emamukatar mono ikes ekeruman a? Kaanukiro nai emyekiniata ikes ŋikelipak neni a Milikom ikamarete akwap a ŋituŋa a Gad? Kaanukiro eboikinotor ŋituŋa ŋulu ilipete Milikom lotaunio a ŋituŋa a Gad?

²Aŋun, kire jik, ebunit apaki ŋina aramakinia ayoŋ eli aŋuna ke ejie a ŋolo itijiere Raba, etaun ŋolo a Ŋiamoni, aruwor Raba ereŋorot ŋolo etukotor ŋamoru, icunyaryo ŋirerya keŋ. Inyakarete Ŋisirael akwap kec aneni a ŋulu apotu kikamasi aneni kec akwap kec.

³Okoe ŋituŋa a Esibon, kiwololoto, anerae aruwor Ai ereŋorot! Okoe ŋituŋa a Raba, kigworo icelasi! Tonapa ŋiguniyae, kiwololoto, kibuŋata ŋawat kus a ŋadase, anerae eyaaryo akuj kus Milikom nakwap ace kaapei ka ŋisacaradotin ka ŋiketiyak keŋ.

⁴Kaanukiro iturotor iyes aŋuna ka agogoŋu kus? adaun agogoŋu kus okoe ŋituŋa ŋulu emam akikinyoma. Ipotu iyes kikinyoma ebari kus ibasi, ‘Ŋae epedori akitijikin iwon?’

⁵Alosi ayoŋ ayauni neni kus ekabule aneni a ŋikidunyet kus a daadaŋ, ido ikielaryo iyes daadaŋ ŋinituŋanan eemi bon, tomamukaun ituŋanan ecunakini ŋulu irimito car.

⁶“Nai ekaku enyakakini ayoŋ ŋarereŋisyo neni a Ŋiamoni.” Ekapolon alimu ŋun.

⁷Alimu Ekapolon ŋolo a ŋajoresyo ŋakiro nu aŋuna ke Edom, “Nyeriŋa mono aosou eyai lotuŋa ŋulu a Teman a? Adaun mono ŋakitatameta aneni a ŋikaosok a? Aŋopiya mono aosou kec a?

⁸Okoe ŋituŋa ŋulu iboiyete alo Dedan! Toema, toboŋutu, todokutu kwap toŋopa anaturukanin, anerae abuni ayoŋ ayaun ŋican neni a ŋituŋa a Esau, anerae adolu apaki ŋina esicania ayoŋ ikes.

⁹Ani mono kepotu neni kus ŋikalemak ŋaraito a epiini, nyimyekinete mono ikes ŋaraito ŋadi alokito a? Ani mono kepotu ŋikokolak nakwaare; nyelemarete mono ikes ŋiboro ŋulu ecamito bon a?

¹⁰Nai ani eruwor ayoŋ, alema ayoŋ ibore daadaŋ aneni a ŋituŋa ke Esau. Esileereu ayoŋ ŋakiboisyo ŋuna sek eŋopeneniata ikes, nyeriŋa ikes ililiŋiyarete ŋuna irworosi. Amunyar ŋiletok kec, ŋiyeneta kec ka ŋikidunyet kec, aŋopiyasi ikes.

¹¹Kimyekisi ŋikokyok kus, ete ayoŋ ikes toyara ka kimyekisi ŋapuseru kus ekekinyoma ayoŋ.”

¹²Ŋakiro ŋuna alimu Ekapolon ikes nu, “Ani kepedorete ŋituŋa ŋulu nyemaikina toryamut ŋican aryamun ŋican, kaanukiro ibucarotor iyes nyisicana? Nyikimyekinio iyes nyisicana, emaikina iyes ikisicani.

¹³Adau ayoŋ elope akikoŋ atemar eruwor Bosira etaun ŋolo inyasuna ka ŋolo ejamuwaritae, eruwor ecaryoit ka ŋolo isitiyaete ŋituŋa akicenio ŋuluce, eruworosi ŋitaunio keŋ daadaŋ ŋicaryo ŋikaru ka ŋikaru.”

¹⁴Abu ayoŋ otema, “Akalimoki Ekapolon ayoŋ ŋakiro ka eyakuun ekiyakia nakwapin, ebala iŋes, ‘Tocunakinos daadaŋ iwapei, ido potu kitijikis ikes, tonyoutu aŋuna ke ejie!’

¹⁵Eketiditeuni ayoŋ iyes alotooma ŋakwapin, ikijamuwarete ŋituŋa iyes.

¹⁶Ikimodik iyes ekabule ŋolo iinakinito iyes lotuŋa ka akituro a ŋitai kus. Iyes lu ŋulu iboiyete alokidiama ŋatabab ka alokidiama emukura. Tari kiboiyete iyes alokidiama ŋimoru ikwa ŋigolei, akacakuni ayoŋ iyes a ina.

¹⁷“Aŋuna a ŋican a ŋulu epote Edom, eruwor Edom akwap ŋina einakini ŋituŋa ekabule, ituŋanan daadaŋ ŋini itori diyete keŋ ebuli ka ijutujutakini aŋuna a ŋican a ŋulu etiyakin nen.

¹⁸Lopite ŋolo amunaarere Sodoma ka Gomora kaapei ka ŋikidunyet kec, emamukaun ituŋanan iboi alo Edom, mam tari ŋini eduki ere keŋ nen.

¹⁹Lopite ŋolo elomunia eŋatuny anamoni a Yorodan toloma neni edakasi ŋibaren, abuni ayoŋ neni a Ŋiedomi erita ikes pa etenito, ido aseuni ayoŋ ŋini acamit ayoŋ kipuka akwap kec. Ŋae ikikwaan ka ayoŋ? Ŋae epedori akisitakin ayoŋ? Alikepukan epedori akitijiore ayoŋ?

²⁰Aŋun, kiirasi ŋakiro ŋuna eyeunit Ekapolon aŋuna a ŋituŋa ke Edom ka ŋakiro ŋuna ecamit iŋes akitiya neni a ŋituŋa a Teman. Kire jik, erikoryo ŋidwe kec iwace ka ebuli ŋituŋa daadaŋ aŋuna a ŋakiro kec.

²¹Ani inyasunio Edom, emaranikini akwap, iiraryo akigworo kec ananam a ŋina Areŋan.

²²Ipumakin ŋimoe akirem Bosira lopite ŋolo ipumakinor egole ibore epetarit ŋabebenuk keŋ. Akoloŋit ŋin ebuli ŋikajiok a Edom lopite ŋolo ebulyo aberu ŋina eryeba aŋuna ka akidoun.”

²³Erae nu ŋakiro ŋuna abu Ekapolon tolimu aŋuna a Damasko ebala, “Iyaloloŋiete ŋituŋa ka Amas ka ŋulu ka Aripad, anerae eirasi ikes ŋakiro ŋuna aronok, einaiya ikes ekabule, emaranete ŋawat kec lopite ŋolo emarania anam ŋina nyepedorete ŋakipi akinapakin.

²⁴Apalagagiasi ŋituŋa a Damasko aema aŋuna ke ekabule, ekamu ikes amaran, einaiya ikes aryeba ka akiyaloloŋ ikwa aberu ŋina eryeba aŋuna ka akidoun.

²⁵Okoe kepoloto ŋakiro ŋuna eelarotor ŋituŋa alotaun a ŋolo sek ituruunitoe, etaun ŋolo sek eleleba alelyan.

²⁶Aŋun, earyo ŋisorok keŋ analapatui a etaun ka emunyaryo ŋasigarya keŋ daadaŋ akoloŋit ŋin.

²⁷Enokakini ayoŋ akim narwatata a Damasko, enomiyari akim ŋin ŋaduketa a Ben-Adad ŋunajiet.”

²⁸Erae nu ŋakiro ŋuna abu Ekapolon tolimu aŋuna a Kedar ka aŋuna a ŋapukasinei ka Asor a ŋuna abu erwosit Nebukadinesar ŋolo a Babilon kilou: Alimu Ekapolon ebe, “Tonyoutu, toremo Kedar, tomunyasi ŋituŋa ŋulu iboiyete anakwapin a ŋuna alo Kide.

²⁹Toŋatasi ŋiemae kec ka ŋamesekin kec, toŋatasi ŋanaŋgae kec ka ŋiboro kec daadaŋ; yaasi aŋuna kus ŋikaala kec, ido iiraryo akigworo a ŋituŋa a ŋul ebasi, ‘Eyai ekabule ŋiwaetin daadaŋ.’

³⁰Toema, toloto neni alwanan, toŋopa aneni ecukul, okoe iyes ŋituŋa ŋulu iboiyete alo Asor, anerae ayeu erwosit Nebukadinesar ŋolo a Babilon akitijikin iyes, ayeu ŋakiro ŋuna ikimanitor iyes.

³¹“Tonyoutu, toloto kitijikis ŋituŋa a akwap a ŋina iboi emam ŋace, akwap ŋina emam ŋimoe imanito. Akwap ŋina emam ŋipukei, kori ŋasuwa ŋuna egolere ŋipukei a etaun, akwap ŋina iboi bon.

³²Eŋataryo ŋikaala kec, eŋataryo ŋaatuk kec. Ealari ayoŋ lowaetin daadaŋ ŋituŋa ŋulu ebanyito ŋakyes kec, ka ayauni ayoŋ neni kec ŋican alowaetin a daadaŋ.

³³“Eruwor Asor neni eperete ŋikweei, eruwor ecaryoit ŋikaru ka ŋikaru; mam ituŋanan elosi akiboi nen, kori elomi nabo lotaun ŋol.”

³⁴Erae nu ŋakiro ŋuna abu Ekapolon tolimok Yeremia ekadwaran aŋuna ke Elam, apaki ŋina esyakinia erwosit Sedekia ŋolo a Yudaya akipuka.

³⁵Tolimu Ekapolon ŋolo a ŋajoresyo tema, “Kiirasi, alemari ayoŋ agogoŋu a Elam, a etaun a ŋolo ikinyomito ikes

³⁶ka etukutuni ayoŋ neni keŋ ekuwuam alowaetin a daadaŋ a ŋuluomwon, ealari ayoŋ ikes lokuwuamin ŋul daadaŋ, mam akwap ŋina nyerikoryo ŋituŋa a Elam.

³⁷Etubuli ayoŋ ŋituŋa a Elam alokiŋaren ŋimoe kec ka alokiŋaren ŋulu imanito akiyar kec, ayauni ayoŋ ŋican neni a ŋituŋa a Elam, aryenyanikini ayoŋ ikes anaŋoit kaŋ, eyakiyari ayoŋ ŋikaarak neni kec toara ikes tari ŋina emunyaryata ŋikaarak ikes daadaŋ,

³⁸Tosodi ewuakini ayoŋ ekicoloŋ kaŋ ŋolo ka apukan Elam, oar erwosit kec ka ŋikapolok ŋulu ipukatotor iŋes.

³⁹Nai ekaku enyakakini ayoŋ ŋarereŋisyo neni a ŋituŋa ka Elam.”