Read ngakarimojong Yer. 5 Bible Online

Yer. 5 - ngakarimojong bible

Yer. 5

¹Okoe ŋituŋa a Yerusalem, tokera ilosete ka iboŋete alorotin a etaun kus, toŋoleŋolekisi, ido kiŋolikis, kiwara nalapatui a etaun kus kiŋolikis erae kipedorete aryamun idiotuŋanan ŋini itiyae ŋuna iyookino, ŋini iwarit ŋakiro ŋuna a kire, ikotere apedori ayoŋ akisyon Yerusalem.

²Tari kirworosi ikes ebe, “Ikwapei eyarya Ekapolon,” nai ikoŋete ikes alyokonu.

³Okoe Ekapolon, meere mono ŋuna a kire ite iyoŋ a? Idau iyoŋ akisican ikes, nai eriŋa aryeba nyenomoro ikes; idau iyoŋ akitonomor ikes, nai aŋero ikes akiwuap ŋuna icamit iyoŋ. Etogogoŋ ikes ŋakyes kec lopite ŋolo egogoŋio ataaba; aŋero ikes aboŋun neni kon.

⁴Abu nai ayoŋ otema, “Erae lu ŋikulyak make, emamukatar ikes ŋatameta, anerae nyeyenete ikes ŋuna iitanit Ekapolon aneni kec, nyeyenete ikes ŋikisila ŋulu ka Akuj kec.

⁵Emaikina ayoŋ olot neni a ŋikabarak erwor neni kec, kire eyenete ikes acamit ŋina ke Ekapolon, eyenete ikes ŋikisila a Akuj kec.” Nai aŋero ikes daadaŋ apolou a Ekapolon, awout akiwuap ŋakiro keŋ.

⁶Aŋun, eari eŋatuny ŋolo ebunit anamoni ikes, emunyari epeot ŋolo ebunit analoŋisat ikes. ite eris ŋitaunio kec eremokino; ituŋanan daadaŋ ŋini elomuni kiŋa alotaunio kec, enyilinyiliyaryo, anerae elalak ŋasecisya kec ka epol nooi epite ŋolo aŋeryoto ikes akiwuap ŋuna ebookoi.

⁷Alipite nai ekesyonio ayoŋ iyoŋ? Akaŋero ŋituŋa kon ayoŋ, ido ikoŋete elimito ŋulu nyerae Akuj. Ani etani ayoŋ ikes kimwoko, aloto ikes akilip neni a ŋakujo, eloseneneete ka atoonyi nakais a ŋakujo.

⁸Apotu ikes kitiyata ikwa ŋaŋolei ŋuna itanitae ejok, abu ŋinituŋanan torubak irworo aŋuna aberu a ekidunyet keŋ.

⁹Emaikina mono ayoŋ nyesican ikes aŋuna a ŋakiro a ŋun a? Nyemaikina mono ayoŋ enyaŋa ŋakiro a ŋituŋa ka akwap a ŋina ikoŋina a?

¹⁰Eyakiyari ayoŋ ŋimoe kiteleteloosi ŋikito a epiini keŋ, nai nyiteletelosi daadaŋ. Alimokini ayoŋ ikes totubutuboosi ŋaten kec, anerae meere ŋaten ŋun ŋuna a Ekapolon.

¹¹Itiyakinio ŋun, anerae emam akikinyoma aneni a ŋituŋa a Isirael ka aneni a ŋituŋa a Yudaya.

¹²Erworo ikes alyokonu aŋuna ke Ekapolon, atemasi ikes, “Emam ŋuna itiyakini Ekapolon. Emam aronis ebuni neni kosi, nyeyakaun ejie kori eron neni kosi.”

¹³Irworosi ikes ŋakiro nu, ikwaan ŋikadwarak ka ekuwuam, anerae emam akirot ŋina ka Akuj aneni kec, aŋun, itiyakinio neni kec daŋ ŋakiro ŋunapei irworosi ikes.

¹⁴Aŋun, alimu Ekapolon Akuj ŋina etiron ŋakiro nu, “Aŋuna alimunioto ŋituŋa ŋakiro ŋun, esikwaanikini ayoŋ akirot ŋina ilimuni iyoŋ ka akim, esikwaanikini ayoŋ ŋituŋa ŋul ka ŋakito, ido enomiyari akim ikes.

¹⁵Okoe ŋituŋa a Isirael, eyakuuni ayoŋ neni kus ŋituŋa ŋulu ka akwap a ŋina alwanan, erae ikes ŋituŋa ka akwap a ŋina agogoŋon ka ŋinaŋorot, erae ikes ŋituŋa ŋulu nyiyenete iyes aŋajep kec, kori nyipedorete iyes ayenun ŋakiro ŋuna irworosi ikes.

¹⁶Erae ŋikajiok a akwap a ŋin ŋituŋa ŋulu earete emam akisyon, erae ikes daadaŋ ŋikajiok ŋulu adedeŋak.

¹⁷Irikarete ikes ŋikinyom ŋulu ilemunete iyes alomanikorin kus ka akimuj kus daadaŋ, emunyarete ikes ŋidwe kus ŋulusapa ka ŋulupesur, irikarete ikes ŋamesekin ka ŋaatuk kus, irikarete ikes ŋikito kus ŋulu a epiini ka ŋiboboryo; inyasunete ikes ŋitaunio kus ŋulu eyakatar ŋaduketa ŋunajiet, ŋitaunio ŋulu sek ikinyomito iyes.

¹⁸“Nai tari alorwa a ŋul, nyakamunyari ayoŋ iyes jik todaunos,

¹⁹ido ani etemarete ŋituŋa kus ebe, ‘Kaanukiro etiyaa Ekapolon neni kus ŋakiro nu daadaŋ?’ Ilimokinete iyes ikes ebe, ‘Ikwapei ikiesikiniata iyes ayoŋ, ido aruwor ŋakujo ŋunagelae itiyanakinete iyes anakwap kus, ikwaŋinapei, ipote iyes akitiyanakin ŋituŋa ŋulugelae anakwap a ŋina erae meere ŋina kus.’ ”

²⁰Irworo Ekapolon ŋakiro nu ebala, “Tolimokisi ŋiletok a Yakob ka kiserakisi ŋituŋa a Yudaya atemar,

²¹Okoe iyes ŋituŋa ŋulu ibaŋaaka ka ŋulu nyitamete, kiirasi ŋakiro nu, iyes ŋulu iyakatar ŋakonyen, nai nyiteete iyes, ŋulu iyakatar ŋaki, nai nyipupete.

²²Nyikikerito mono iyes ayoŋ a? Nyimaranete mono iyes alokiŋaren kaŋ a? Abu ayoŋ ewuak asinyon toruwor ekukoru a anam ekukoru ŋolo agogoŋon ŋolo nyepedori anam akitor, tari kenaŋanaŋaete ŋikaguragurae a ŋakipi, nyepedorete akitor nen tolunyar, tari kerwosi nooi, nyepedorete akitor kidiama ŋikukorin ŋul.

²³Nai eyakatar ŋituŋa lu ŋitai ŋulu esyaak ka ŋulu aŋerok; ariwo ikes nawae ka ekemyekis ayoŋ.

²⁴Nyirworosi ikes alotai kec make ebe, ‘Okerito Ekapolon Akuj yok, ŋina ikiinanakini akiru anapaki a ŋina itemokino, iŋes ikiinanakini akiru ŋina ka akiceeret ka ŋina ka atepunet, ŋina itemokinit aŋuna yok ŋisabito ŋulu elemere.’

²⁵Eriwo ŋasecisya kus ajokis ŋin aneni kus, alemasi ŋasecisya kus ajokis ŋin aneni kus,

²⁶anerae eyakasi ŋasyaanisya lotuŋa kaŋ; elemanarete ikes ŋiboro a ŋuluce. Ikamete ikes ŋituŋa lopite ŋolo ikamya ekalokan ŋatapemo a atawuatat.

²⁷Ileleba nakais kec ŋiboro ŋulu ekokounitae, lopite ŋolo ilelebatar ŋikyeny neni idyasyo ikes. aŋun, aruworosi ikes ŋarwonita ka ŋikabarak,

²⁸atuma ikes ka amalimal ŋawat kec, itiyaete ikes aronis jik; nyetubete ikes ŋakiro a ŋikokyok anakiyookino, ikotere kilout ŋikokyok ŋini isitakinit ikes ka nyiŋarakinito ikes ŋituŋa ŋulu a ŋican toiun.

²⁹Emaikina mono ayoŋ nyesican ikes aŋuna a ŋakiro a ŋun a? Nyemaikina mono ayoŋ enyaŋa ŋakiro a ŋituŋa a akwap a ŋina ikoni na a?

³⁰Atakanut nakwap ŋakiro ŋuna etakadakinak ka ŋuna a ŋinyas;

³¹edwarete ŋikadwarak alyokonu ka ipukato ŋisacaradotin lopite ŋolo elimokiniata ŋikadwarak ikes, italakarito ŋakiro ŋun ŋituŋa kaŋ, nai anu itiyaete iyes apaki ŋina ebunio asalunet?”