Read ngakarimojong Yer. 50 Bible Online

Yer. 50 - ngakarimojong bible

Yer. 50

¹Erae nu ŋakiro ŋuna abu Ekapolon kirwor aŋuna a Babilon ka aŋuna ka akwap a Ŋibabiloniyae aneni a ekadwaran Yeremia ebala,

²“Tolimosi anakwapin a daadaŋ ka kiserata, kikyaasi abendera ka kiserata, nyimunono ŋakiro nu, temasi iyes, ‘Ekamar Babilon, esirumi Bel ŋileec, akadaki Merodak. Esirumi ŋitorubei a ŋakujo kec ŋileec, akadaki ŋakujo kec.’

³“Eponito alo Kuju ŋituŋa a akwap ŋulu itijikinete iŋes, itoruworete ikes akwap a Babilon ereŋorot ka mam ituŋanan ebuni akiboi a nen, eemete ŋityaŋ ka ŋituŋa a nen.

⁴“Alorwa a ŋul ka anapaki a ŋin, epote ŋituŋa a Isirael ka ŋulu a Yudaya kaapei igworosi iwarito Ekapolon Akuj kec.

⁵Iŋisete ikes ŋituŋa neni eyai erot ŋolo elosere Sion kiteorito ina, epote nai ikes kimorikinos ke Ekapolon alotooma acamunet ŋina a ŋikaru ka ŋikaru, acamunet ŋina nyimuryakin nabo.

⁶“Apotu ŋituŋa kaŋ towoliyosi ikwa ŋamesekin ŋuna eoliyorito, etooliyosi ŋikeyokok kec ikes, ayaasi ikes kidiama ŋimoru, aloseneneete ikes alomoru tari lokamukumukui, emuryak ikes neni sek eperete.

⁷Amunyasi ŋituŋa ŋulu aryamununeete ikes ŋituŋa kaŋ ka irworosi ŋimoe kec ebasi, ‘Mam ŋuna aronok etiyatae isua, anerae aseca ikes aneni a Ekapolon a ŋolo erae neni keŋ eyarikinito ikes, Ekapolon ŋolo arae akigeno atapapaa kec.’

⁸“Toema alo Babilon, toloto anakwap a Ŋibabiloniyae, kitiyata ikwa ŋikorwa ŋulu erikito ŋakinei,

⁹anerae alosi ayoŋ akitonyoun ka ayaun atukot a ŋituŋa a ŋakwapin a ŋuna ejioko anakwap a ŋina alo Kuju akitijikin ŋituŋa a Babilon, icodorete ikes aŋuna ka akitijikin ŋituŋa a Babilon, a nen ikamaryo Babilon. Ikwaan ŋikaleŋeleŋe a ŋikajiok a ŋul ka ŋulu a ekajion a ŋolo eyeni akisitiya ŋikaleŋeleŋe, ekajion ŋolo nyeboŋununui emam ibore eŋatunit.

¹⁰Eŋataryo ŋiboro a Ŋibabiloniyae, eryamunete ŋulu eŋatarete ŋiboro kec ŋiboro ŋulu itemokino.

¹¹“Okoe ŋikaŋatarak ŋiboro a ŋituŋa kaŋ, tari kilakara iyes, tari kilelyanete iyes, tari kitopolooro iyes, tari kicurosi iyes ikwa ŋatak alonya, tari kicelasi isibito ŋaŋolei,

¹²isurumyo akwap kus ŋileec nooi, elemaryo ajokis aneni a etaun a ŋolo ikidounere iyes. Kire jik, eruwor iŋes akoŋinait alotooma ŋakwapin ŋunace daadaŋ, ituruworyo akwap kus aloŋisat, akwap ŋina eonit ka aloŋisat.

¹³Aŋuna ka anyunyura a ŋina ke Ekapolon, emamukaun ŋituŋa iboiyete anakwap kus, nai eruwor iŋes ereŋorot ŋolo asilon nooi, ebuli ituŋanan daadaŋ ŋini itori diyete Babilon, ijutujutakini aŋuna ka akinyasuno keŋ a daadaŋ.

¹⁴Iyes ŋulu iyakatar ŋakawo a ŋikaleŋeleŋe ka ŋikaleŋeleŋe, kicodosi toremo Babilon. Toguma ŋituŋa keŋ a ŋikaleŋeleŋe, nyideut ŋikaleŋeleŋe ŋidi, anerae asec iŋes aneni ke Ekapolon.

¹⁵Tocelutu neni keŋ alowaetin a daadaŋ ibasi, ‘Nyeriŋa iŋes ecamit ejie, aritakin ŋaduketa a Babilon ŋuna aoyak kwap, aritakin ŋarwatatain keŋ kwap, erae ŋun akinyaŋar ŋina ke Ekapolon. Kitiyata neni keŋ lopite ŋolo etiyator iŋes.

¹⁶Tolemasi ŋiketak alo Babilon, tolemasi ŋikalemak kaapei ka ŋileŋia ŋulu elemere; aŋuna ke ejie a ŋolo a ŋikesicanak, emaikina ŋinituŋanan toboŋo lotuŋa keŋ, emaikina ŋinituŋanan toboŋo nakwap keŋ.’

¹⁷“Ikwaan ŋituŋa a Isirael ka ŋamesekin ŋuna irisito ŋiŋatunyo. Ekiŋaren abu erwosit ka Asiriya toar ikes, ido ekaku amunya ikes erwosit Nebukadinesar ŋolo a Babilon.

¹⁸Aŋun, alimu Ekapolon ŋolo a ŋajoresyo, Akuj a Ŋisirael atemar, alosi ayoŋ akisican erwosit a Babilon, akwap keŋ lopite ŋolo abunio ayoŋ esicania erwosit ka Asiriya.

¹⁹Enyakuni ayoŋ Ŋisirael nakwap kec, eryamunete ikes akimuj alo Karimel, alo Basan ka alokamukumukui a Epuraim, imwokete ikes alo Gilead.

²⁰Alimu Ekapolon atemar alorwa a ŋul ka anapaki a ŋin, iwaryo asecit aneni a Ŋisirael, ido nyeryamunio, iwaryo asecit alotuŋa a Yudaya, ido nyeryamunio, anerae isyoni iyoŋ ŋipiya a ŋituŋa a ŋulu abu ayoŋ emyek nyeara.

²¹Kitipeiyosi nakwap a Merasaim, toloto kitijioto ŋituŋa keŋ, kitijikis ŋituŋa a Pekod, tomunyasi ikes daadaŋ nyidoŋ tari ipei. Kitiyata daadaŋ ŋuna akalimok ayoŋ iyes akitiya.

²²Epupyo ecelet a ejie anakwap, eyai akinyasuno ŋina apolon.

²³Apotu ŋituŋa a Babilon kicakicaka ŋituŋa a ŋakwapin a daadaŋ, nai tokona, ecakicaki ikes daadaŋ, abul ŋituŋa daadaŋ aŋuna amunaarere Babilon.

²⁴Okoe Babilon, ibu iyoŋ tolokak aloc, ido abu aloc ŋin ikirum iyoŋ pei, nai pa iyeni iyoŋ ŋun, aponi ikiryamun iyoŋ ka ikikamun, anerae ibu iyoŋ kitepeg Ekapolon.

²⁵Aŋaa Ekapolon akai ŋina iŋadatae ŋiboro keŋ ŋulu ke ejie, alemu iŋes kiŋa ŋiboro ŋulu ka anyunyura keŋ, anerae eyakar Ekapolon ŋolo a ŋajoresyo etic ŋolo emaikina kitiya anakwap a Ŋibabiloniyae.

²⁶Potu alowaetin a daadaŋ akitijiore Babilon, toŋaasi ŋidulae keŋ, totukokisi ikwa nyikinyom ŋawat a ŋituŋa keŋ a ŋulu etwakito, ido tomunyasi iŋes jik; nyimyekis idiobore keŋ kidoŋ.

²⁷Toara ŋasigarya keŋ daadaŋ torikosi ikes neni eŋolere. Acakec, adolu akoloŋit kec, adolu apaki ŋina ka akisicanio kec!

²⁸“Kiirasi! Eponito ŋikerimitok ka ŋikadokinok anakwap a Babilon, alimor alo Sion epite ŋolo enyaŋarya Ekapolon Akuj yok ŋakiro a Ŋibabiloniyae, inyaŋi iŋes ŋuna apotu ikes kitiyata Kai ka Akuj.

²⁹“Tonyarautu ŋulu isitiyaete ŋakawo a ŋikaleŋeleŋe ka ŋikaleŋeleŋe potu akitijiore Babilon. Kirikautu iŋes, nyimyekis ituŋanan ipei daŋ tosi. Totacakisi ikes ikwapei etiyatotor ikes, kitiyata neni kec ŋunapei apotu ikes kitiyata, anerae apotu ikes toŋero Ekapolon ŋolo asegan ŋolo a Isirael.

³⁰Aŋun, etwanikinete ŋisorok kec nalapatui a etaun ka emunyaryo ŋasigarya kec daadaŋ akoloŋit ŋin.” Ekapolon iŋes Alimu ŋun. Alimu Ekapolon ŋolo a ŋajoresyo ebe,

³¹“Okoe iyes ŋituŋa a Babilon ŋulu iturosi, akaremokino ayoŋ iyes, anerae adolu akoloŋit kus, adolu apaki ŋina alosyo ayoŋ akisican iyes.

³²Igukini ŋiketurok kibusokinos, emam ituŋanan itonyouni ikes, ecunyakini ayoŋ akim lotaunio kec ka enomiyari ibore daadaŋ ŋini eyai diyete kec.”

³³Alimu Ekapolon ŋolo a ŋajoresyo ebe, “Isicanitae ŋituŋa a Isirael ka ŋituŋa a Yudaya daŋ, ewounitotor ŋikekamarak kec ikes, nyecamito akimyekin ikes toloto.

³⁴Egogoŋ Ekalakunan kec, erae ekiro keŋ Ekapolon ŋolo a ŋajoresyo. Kire jik eji iŋes aŋuna kec, ikotere eyauni ekisil nakwap kec, nai eyauni iŋes egurigur ŋoloruba neni a ŋituŋa a Babilon.”

³⁵Alimu Ekapolon ebe, “Earyo a ekileŋ Ŋibabiloniyae ka ŋituŋa ŋulu iboiyete alo Babilon, earyo a ekileŋ ŋikapolok ka ŋikaosok a Babilon.

³⁶Earyo a ekileŋ ŋikerujak keŋ, earyo a ekileŋ ŋikajiok a Babilon, ikotere eruworotor ikes ŋibaŋaanotin, ikotere emunyaryo ikes.

³⁷Earyo a ekileŋ ŋaŋolei keŋ ka emunaaryo ŋagaari keŋ ŋuna iritae a ŋaŋolei ta ŋasigarya ŋunagelae ŋuna eyakasi kidiŋ keŋ, ikotere epalagagiata ikwa ŋaberu. Eŋatunio a ekileŋ ebari keŋ daadaŋ, ikotere eŋataryo.

³⁸Edaun ŋakipi anaŋololin keŋ, ikotere eokyoto deu; anerae erae Babilon akwap ŋina ileleba ŋitorubei a ŋakujo, einakina ikes nooi aŋuna a ŋitorubei a ŋakujo.

³⁹“Aŋun, elomete ŋityaŋ ŋulu ka ariet ka ŋibuin Babilon, elomete ŋikaleeso daŋ nen, nyiboikinosi nabo ŋituŋa Babilon, nyeyakaun ŋituŋa nen ŋanyameta daadaŋ.

⁴⁰Alimu Ekapolon atemar, lopite ŋolo ekamarya Ekapolon Sodoma ka Gomora ka ŋikidunyet kec, ikwaŋinapei, mam ituŋanan eyakaun Babilon ka mam ituŋanan ebuni akiboi a nen.

⁴¹“Kiirasi, eponito ŋituŋa alo Kuju, eponito ŋituŋa a akwap a ŋina agogoŋon ka ŋirwosi ŋulu alalak, esubanakinosi aponare alowaetin ka akwap a ŋulu alwanak.

⁴²Etiŋito ikes ŋakawo a ŋikaleŋeleŋe ka ŋakwaaras, ededeŋ ŋituŋa ŋul ka nyisyonioko. Epol eruye ŋolo ebunit aneni kec ikwaan ka eruye ka anam, emeto ikes ŋaŋolei, ŋaŋolei ŋuna icodorito esibit ŋikajiok eya lojie, eponito ikes akitijiore iyes ŋituŋa a Babilon.

⁴³“Eira erwosit a Babilon atemar eponito ŋimoe ŋul, alilimiyosi ŋakan keŋ, ebwaliya iŋes aryeba ŋakiro ŋun, aryeba ŋina ikoni ŋina ka aberu a ŋina eapi akidoun.

⁴⁴“Lopite ŋolo elomunia eŋatuny anamoni a Yorodan, toloma neni a ŋibaren, abuni ayoŋ neni a Ŋibabiloniyae erita ikes alo Babilon, ido aseuni ayoŋ ŋini ecamit kipuka iŋes. Ŋae ikwaan ka ayoŋ? Ŋae epedori akisitakin ayoŋ? Alikepukan epedori akitijiore ayoŋ?”

⁴⁵Aŋun, Kiirasi ŋakiro ŋuna eyeunit Ekapolon aŋuna a ŋituŋa a Babilon ka ŋakiro ŋuna ecamit iŋes akitiya nakwap a Ŋibabiloniyae: Kire jik, erikoryo ŋidwe kec iwace ka ebuli ŋituŋa daadaŋ aŋuna a ŋakiro kec.

⁴⁶Apaki ŋina iirare eruye ŋolo ikamarere Babilon, emaranikini akwap, ido iirarete ŋituŋa a ŋakwapin akigworo kec.